Ko e Faingataʻa ʻo Hono Halá
Mahalo he ʻikai faingofua maʻu pē ʻa e hala ʻo e Fakamoʻuí, ka te Ne ʻaʻeva mo kitautolu mo tataki kitautolu ʻi he feituʻu ʻoku tau fie ʻalu ki aí.
Ngaahi tā fakatātā ʻa Yukai Du
ʻOku tau faʻa fili ha hala koeʻuhí he ʻokú ne tataki kitautolu ʻi he feituʻu ʻoku tau fie ʻalu ki aí. Ka ʻoku ʻi ai ʻa e meʻa lahi ange ʻi ha hala fonongá ka ʻoku ʻikai ko e feituʻu pē ʻoku fakataumuʻa ki aí. ʻOku ʻi ai foki mo e potu fonuá—ʻa e faʻahinga kelekele te ne tataki ai kitautolú.
ʻOku fakaafeʻi kitautolu ʻe Sīsū Kalaisi ke tau ʻaʻeva mo Ia (vakai, Mōsese 6:34; Maika 6:8; 1 Sione 2:6; Tokāteline mo e Ngaahi Fuakava 19:23). Ko e hala ʻokú Ne fakaafeʻi kitautolu ke ʻaʻeva aí, ko e hala ʻo e fuakavá—ʻa e hala ki he melinó, fiefiá, mo e moʻui taʻengata mo ʻetau Tamai Hēvaní—ʻa ia ʻoku tau fiemaʻu ke ʻi aí.
Ka ʻoku fēfē ʻa e hala ko ʻení? Ko e faʻahinga potu fonua fēfē te tau kolosi ai ʻi heʻetau ʻaʻeva mo e Fakamoʻuí?
Fāsiʻi
“ʻOku fāsiʻi ʻa e matapaá, mo lausiʻi ʻa e hala, ʻoku fakatau ki he moʻuí” (Mātiu 7:14).
ʻI he taimi ʻoku ongoʻi fakangatangata ai Hono halá, ʻoku ʻi ai hono ʻuhinga. ʻOku hanga ʻe he fāsiʻi ʻo e halá ʻo taʻofi koe mei haʻo tuʻu ʻi ha feituʻu te ke ala lavea pe hē ai.
Hangatonu
“ʻOku hangatonu ʻa hono ngaahi halá” (ʻAlamā 37:12).
ʻOku ʻikai pikopiko Hono halá. Ko e hala hangatonu taha ia ki heʻetau taumuʻa ʻo e moʻui taʻengatá. ʻOku ʻikai toe afeafe. Ka ko e taimi ʻe niʻihi ʻoku tau pehē. Koeʻuhí ko e Fakalelei ʻa e Fakamoʻuí, te tau lava ʻo fakatomala fakavavevave pea foki ki Hono halá.
Tahifo mo Faʻa Tokakovi
“[ʻOku] tahifo ʻa e hala [ki ʻapi ki he ʻOtuá] pea tokakovi he taimi ʻe niʻihi,” (Palesiteni Henry B. Eyring ʻo e Kau Palesitenisī ʻUluakí, “Tokoniʻi Kinautolu ke Nau Toe Foki ki ʻApi,” konifelenisi lahi ʻo ʻEpeleli ʻo e 2010 [Ensign pe Liahona, Mē 2010, 25]).
ʻE lava ke fuʻu faingataʻa ʻa e lue ʻi he tahaké, pea mahalo he ʻikai te ke lava ʻo sio ki he tumuʻaki ʻo ha tafungofunga ʻokú ke kaka ai. Ka ʻoku fakamālohia mo poupouʻi koe ʻe he Fakamoʻuí ʻi hoʻo feinga ke fai ʻa e ngaahi meʻa faingataʻa ʻokú Ne fakaafeʻi koe ke ke faí.
Mahalo ko e makamaka ʻi ho halá ʻe kehe ia mei he niʻihi kehé. Ko ho ngaahi faingataʻaʻiá mo e tūkungá ʻoku ʻaʻau pē ia. Ka ko e Fakamoʻuí ʻa e kaungā fononga lelei tahá pea te Ne tokoniʻi koe ke ke fehangahangai mo e faingataʻa kotoa pē.
Maama Feʻunga
“Ko hoʻo folofolá ko e tūhulu ia ki hoku vaʻé, mo e maama ki hoku halá” (Saame 119:105). “ʻAʻeva ʻi he māmá, ʻo hangē ʻoku ʻi he māmá iá” (1 Sione 1:7).
ʻI he taimi ʻoku fakapoʻuli ai ho halá, ʻe lava ke fakamaama ʻe he Fakamoʻuí ho halá, neongo kapau ʻoku feʻunga pē ia ki ha foʻi sitepu ʻe taha mo ha toe foʻi taha ʻi hoʻo fononga ki ʻapi ki hoʻo Tamai Hēvaní.
Malu
“ʻIo, neongo ʻeku ʻeveʻeva ʻi he teleʻa ʻo e malumalu ʻo e maté, ʻe ʻikai te u manavahē ki ha kovi: he ʻokú ke ʻiate au” (Saame 23:4).
Neongo pe ʻoku ngali fakailifia, fakamamahi, pe faingataʻa fēfē ho halá, ka te ke lava ʻo maʻu ʻa e nongá ʻi hoʻo ʻiloʻi ko e taimi ʻokú ke ʻaʻeva ai mo Sīsū Kalaisí, te Ne ʻaʻeva mo koe pea tataki koe ki he malú, ʻo foki ki he Tamai Hēvaní.