Kalasi Foʻou, Ngaahi Faingamālie Foʻou
Hiki ki ha kalasi pe kōlomu foʻou? Ko ha ngaahi meʻa siʻi pē ʻeni ke hanganaki atu ki ai!
Ngaahi tā fakatātā ʻa Cinta Fosch
ʻOku faʻa ʻomi ʻe he kamataʻanga ʻo e taʻu foʻoú ha ngaahi liliu lahi—ʻo malava ke kau ai hano fai ha liliu ki ha kalasi pe kōlomu kehe ʻi he lotú! Tatau ai pē pe ʻokú ke mavahe mei he Palaimelí, hū ki he Fineʻofá pe kōlomu ʻo e kaumātuʻá, pe hiki pē ki he kalasi hoko ʻa e Kau Finemuí pe kōlomu ʻo e Lakanga Taulaʻeiki Faka-ʻĒloné, ko ha meʻa ʻeni ʻe tolu ke fakatuʻamelie ki ai.
1. Kakai Foʻou
Mahalo ʻe ngali fakailifia ke ʻi ha kalasi mo ha kakai ʻoku nau matuʻotuʻa ange ʻiate koe, ka ʻoku lahi ange ʻa e meʻa ʻoku mou faitatau aí ʻi he meʻa te ke ala fakakaukau atu ki aí. Ko e kau ākonga kotoa kimoutolu ʻa Sīsū Kalaisi ʻoku feinga ke muimui kiate Ia. Ko e liliu ʻo e ngaahi kalasí ko ha faingamālie ia ke fanongo ai ki ha ngaahi fakakaukau foʻou mei he kakai ʻoku kehekehe ʻenau ngaahi aʻusiá meiate koé—mo ha faingamālie ke maʻu ai ha ngaahi kaungāmeʻa foʻou.
2. Ngaahi ʻEkitivitī Foʻou
ʻOku fakalata ʻa e ngaahi polokalama ʻa e Kau Talavoú mo e Kau Finemuí! Mahalo te ke maʻu ha ngaahi founga foʻou ke fetuʻutaki ai mo e toʻu tupu kehé, kau ai ʻa e ngaahi ʻekitivitī fakakalasí mo fakakōlomú mo e nofo kemí. ʻI hoʻo taʻu 14 pē, te ke lava foki ʻo fakahoko ha ngaahi konifelenisi KFT, hulohula, mo e semineli.
ʻI hoʻo hoko ko ha tokotaha lahi kei talavoú, te ke lava ʻo ʻalu ki he ʻinisititiutí mo e ngaahi ʻekitivitī kuo palani ʻe hoʻomou Fineʻofá, kōlomu ʻo e kaumātuʻá, pe uooti pe feituʻu tānakiʻanga ʻo e kau taautaha kei talavoú.
3. Ngaahi Faingamālie Foʻou
ʻI hoʻo matuʻotuʻa angé, ʻokú ke maʻu ai ha ngaahi faingamālie lahi ange ke ngāue ʻi he Siasí, hangē ko hono fakahoko ʻo e papitaiso maʻá e kau pekiá, tāpuakiʻi ʻo e sākalamēnití, pe fakahoko ha uiuiʻi (kau ai ha ngāue fakaetauhi). Fakaʻaongaʻi lelei ʻa e ngaahi faingamālie ko ʻení ki he tupulaki fakalaumālié pea fiefia ʻi he founga ʻoku nau fakamālohia ai hoʻo fehokotaki mo e Tamai Hēvaní, Sīsū Kalaisi, mo e kakai ʻokú ke tokoniʻí.
ʻI hoʻo fakahoko ʻa e hiki ki ha kalasi foʻoú, manatuʻi “ʻoku mou taha kotoa pē ʻia Kalaisi Sīsū” (Kalētia 3:28). ʻI hoʻo fakatefito hoʻo aʻusia ʻi he siasí ʻiate Iá, te Ne tokoniʻi koe ke ke maʻu ʻa e fiefiá ʻi ha feituʻu pē ʻokú ke ʻi aí.