Ngaahi Fehuʻí mo e Ngaahi Talí
“Ko e hā ʻa e founga lelei taha te u lava ai ʻo vahevahe ʻa e ʻfuaʼ ʻo e ongoongoleleí mo e niʻihi kehé, koeʻuhí ke nau ʻilo ʻa e lahi hono mahuʻinga kiate aú?”
“Moʻui ʻaki e ongoongoleleí ʻi ha founga ʻoku ʻikai ha toe veiveiua ʻokú ke kehe. Kapau ʻe ʻilo ʻe he kakai kehé ʻokú ke feinga ke moʻui fakatatau mo hoʻo tuí, te nau fie ʻilo ki ai. Ko e taimi lelei taha ia ke vahevahe ai hoʻo fakamoʻoní, hoʻo ʻofa kia Kalaisí, pea mo e fiefia ʻoku ʻai ʻe he ongoongoleleí ke ke maʻú.”
Mikaelal A., taʻu 17, ʻAsilia, Sipeini
“Ko e taha ʻo e ngaahi fua ʻo e ongoongoleleí ko e fiefiá. Vahevahe ʻa e fiefia ʻokú ke maʻu ʻia Kalaisí ʻaki haʻo malimali pē mo tokoniʻi e niʻihi kehé ʻo hangē ko ia naʻe mei fai ʻe Sīsuú. ʻI he taimi ʻoku ʻeke atu ai ʻe he kakaí pe naʻe fēfē ho fakaʻosinga ʻo e uiké, vahevahe hoʻo ngaahi aʻusia ʻi he lotú ke tokoniʻi kinautolu ke nau ʻiloʻi e mahuʻinga ʻo Sīsū Kalaisi kiate koé.”
ʻIlisa S., taʻu 16, Uikilou, ʻAilani
“Te u lava ʻo fakaafeʻi ʻa e kakaí ki he lotú koeʻuhí ke nau lava ʻo sio ki he leleí ʻiate kinautolu pē!”
Kali L., taʻu 11, Tekisisi, USA
“ʻOku ou maʻu ha ngaahi tāpuaki lahi ʻo fakafou ʻi he Fakalelei ʻa e Fakamoʻuí, ʻa ia ʻokú ne fakafonu ʻeku moʻuí ʻaki ʻa e fiefia. ʻOku fakafiemālieʻi au ʻi he ʻi ai ʻa e Tamai Hēvaní mo ʻomi kiate au ʻa e loto-falala ke vahevahe ʻa e fiefia ko iá. ʻI hono vahevahe ʻeku ngaahi meʻafoakí mo e ngaahi tāpuakí mo e niʻihi kehé, te ne fakahaaʻi moʻoni kiate kinautolu, ʻa hono mahuʻinga ʻo e ongoongoleleí kiate aú.”
Malieta M., taʻu 16, Tuamasanga, Haʻamoa
“Ko hono moʻui ʻaki ʻo e ongoongoleleí ʻi ʻapi pea ʻi he kakaí ko e fuofua sitepu ia ki hono vahevahe lelei iá! Mahalo he ʻikai fie fanongo ʻa e kakaí ki he meʻa ʻokú ke lea ʻakí, ka te nau sio ki he meʻa ʻokú ke faí, pea ko ha fakamoʻoni mālohi ia.”
ʻEsiteisi M., taʻu 19, Palaipa, Palāsila
“Te u lava ʻo vahevahe lelei taha ʻa e ʻfuaʻ ʻo e ongoongoleleí mo e niʻihi kehé ʻaki ʻeku hoko ko ha faʻifaʻitakiʻanga lelei kiate kinautolu mo fakaafeʻi kinautolu ki he ngaahi ʻekitivitií.”
Mekilaine B., taʻu 15, Kalefōnia, USA