Ngaahi Founga ʻe 3 ke Fakafisingaʻi ʻa Sētane pea Fili ʻa Sīsū Kalaisí
ʻE lava ke tokoniʻi koe ʻe hono maʻu ʻo e mahino ki he meʻa naʻe hoko ʻi he maama fakalaumālié, ke ke fakahoko ha ngaahi fili lelei ʻi he taimí ni.
Tā fakatātā ʻa Dean MacAdam
ʻI he taimi naʻe fakahā mai ai ʻe he Tamai Hēvaní ʻEne palaní ki heʻetau fiefia mo e fakalakalaka taʻengatá, naʻá Ne talaʻofa ke fekauʻi mai ha Fakamoʻui ke tokoniʻi kitautolu. ʻI hono ʻeke ʻe he Tamai Hēvaní, “Ko hai te u fekauʻí?” (ʻĒpalahame 3:27), naʻe folofola ange ʻe Sīsū Kalaisi, “ko [e] ʻAlo ʻOfaʻanga [ʻo e Tamaí] mo e Tokotaha kuo Fili [ʻe he Tamaí] talu mei he kamataʻangá” (Mōsese 4:2), ʻo pehē, “Ko au ʻeni, fekauʻi au” (ʻĒpalahame 3:27). Naʻe ʻikai ke Ne kole ha meʻa, naʻá Ne finangalo pē ke fai ʻa e finangalo ʻo ʻetau Tamaí (vakai, Mōsese 4:2).
Pea haʻu leva ʻa Lusifā. Naʻá ne toe pehē foki, “fekauʻi au” (vakai, Mōsese 4:1). Ka naʻe siokita ʻa Lusifā, ʻo ʻikai ke ne fie feilaulau maʻatautolu. Naʻá ne fiemaʻu ʻa e ngeiá, mālohí, mo e nāunaú maʻana pē (vakai, Mōsese 4:1). Naʻe loto ʻa Lusifā ke fakaʻauha ʻetau tauʻatāina ke filí. ʻOku ʻikai mahino ʻa e founga naʻá ne fakakaukau ke fakahoko ai ʻení. Ka ʻoku tau ʻiloʻi ka ʻikai ʻetau tauʻatāina ke filí, he ʻikai ke tau teitei lava ʻo fakalakalaka pea hoko ʻo hangē ko ʻetau Tamai Hēvaní. ʻA ia, ko hono moʻoní, naʻe angatuʻu ʻa Lusifā ki he Tamai Hēvaní mo ne fakasītuʻaʻi ʻEne palaní.
Naʻe fakatupu ʻe he angatuʻu ʻa Lusifaá ha tau ʻi he langí, ʻa ia naʻe “kapusi hifo ia ki lalo;” pea “naʻá ne hoko ko Sētane” (Mōsese 4:3–4). Naʻe muimui ha vahe tolu ʻe taha ʻo e kau tau ʻo e langí ʻiate ia (vakai, Tokāteline mo e Ngaahi Fuakava 29:36). Ka naʻa tau fakaʻaongaʻi ʻetau tauʻatāina ke filí ʻo muimui ʻia Sīsū Kalaisi.
ʻOku kei hokohoko atu pē ʻa e tau naʻe kamata ʻi he langí ʻi he ʻahó ni. ʻOku hokohoko atu ʻa e fekumi ʻa Sētane mo hono kau muimuí ke fakafepakiʻi kitautolú. Ko ha ngaahi founga eni ʻe tolu ke ʻilo ai ʻa e ngaahi founga mo e filioʻi ʻa Sētané, fakaʻehiʻehi mei heʻene ngaahi tauhelé, mo fili ʻa Sīsū Kalaisi ʻi he kotoa ʻo ʻetau moʻuí.
1. ʻOua Naʻa Tuku Ke Ikuna ʻa e Loto-ʻItá
ʻI he ngaahi taʻu lahi kuohilí, naʻe tuʻotaha ʻeku feinga ke fakalotoʻi hoku ngaahi kaungāmeʻa ʻi he akó ke ʻoua naʻa fai ʻenau ngāue mei ʻapí he naʻe teʻeki fai haʻakú. Naʻá ku hala, ka naʻá ku fakakaukau kapau te mau tō kotoa ki he fakatuʻutāmakí, te u ongoʻi lelei ange fekauʻaki mo au. ʻOku fakamanatu mai ʻe he tōnounou hoku ʻulungāngá ʻa e ʻulungaanga ʻo Sētane kiate kitautolú. Koeʻuhí ko ʻene mamahí, ʻokú ne fiemaʻu ke fakaʻauha ʻetau tuʻunga malava ke maʻu ʻa e moʻui taʻengatá.
ʻOku matuʻaki fakakeheʻi ʻa Sētane heʻene ʻitá ʻo ne feinga vavale—neongo ʻene ʻiloʻi ʻe iku ulungiá—ke “fakamafola ʻa e ngaahi ngāue ʻo e fakapoʻulí” (Hilamani 6:28), ke fakamamahiʻi ʻa e tokolahi taha ʻo kitautolu te ne lavá.
ʻOku ʻikai ko e palani naʻa tau filí ʻa e mamahi ʻa Sētané. Te tau lava ʻo fakaʻaongaʻi ʻetau tauʻatāina ke filí ke hokohoko atu ʻetau muimui ʻia Sīsū Kalaisí pea hokohoko atu hono fakafisingaʻi ʻa e ngaahi fakatauele ʻita, taʻemahuʻinga, mo fakangatangata ʻa Sētané. Naʻe foaki ʻe he Fakamoʻuí ʻEne moʻuí kae lava ke tau aʻusia ʻa e meʻa ʻokú Ne ʻafioʻi te tau lava ʻo aʻusiá mo aʻusia ʻa e melie ʻo e moʻui taʻengatá.
2. ʻOua ʻe Fakavaivai ki he Manavasiʻí
ʻOku ou faʻa fifili ʻi he taimi ʻe niʻihi pe ko e hā ʻe fili ai ʻa e konga hono tolu ʻo e fānau fakalaumālie ʻa e ʻOtuá ke fakafisingaʻi ʻEne palaní. ʻOku ʻiloʻi ʻe Sētane ko e manavasiʻí mo e veiveiuá ko ha ongo founga lelei ia ke holoki ʻaki ʻa e tuí. Mahalo te Ne ʻahiʻahiʻi kitautolu ke tau veiveiua ʻi hotau mahuʻingá pe fakalotoʻi kitautolu he ʻikai ke tau lava ʻo maʻa ʻi he Fakalelei ʻa Sīsū Kalaisí. Pe te ne feinga ke tau fakavaivai ki he manavasiʻi fekauʻaki mo e fakatomalá pe muimui ki he palani ʻa e ʻOtuá.
ʻI he taimi ʻoku tau fehangahangai ai mo e ngaahi ʻahiʻahí mo e faingataʻá, te tau lava ʻo fili ke falala ki he palani ʻa e ʻOtuá pea kia Sīsū Kalaisi. Kuó Ne kātekina ʻa e meʻa kotoa pē koeʻuhí ke Ne lava ʻo hoko ko hotau mālohinga ʻi he taimi ʻoku tau fehangahangai ai mo e manavasiʻí, pea ʻe faifai pē pea tau ikunaʻi ʻa e meʻa ko iá ʻo fakafou ʻiate Ia.
3. Tali ʻa e Meʻa Kotoa ʻOku ʻOatu ʻe he Fakamoʻuí Maʻaú
Ko e tefitoʻi taumuʻa ʻa e Tamai Hēvaní mo Sīsū Kalaisí ʻoku kaunga kotoa ia ki hotau tuʻunga fakaʻeiʻeikí mo hono fakaivia kitautolú. Ko hai mo ha toe taha ʻoku nau fie tokoniʻi kitautolu ke tau aʻusia hotau lelei tahá mo tukupā kakato ke ʻomi ʻa e meʻa kotoa ʻoku nau maʻú maʻatautolu? ʻE lava ke tau maʻu ʻa e meʻa kotoa pē ʻa e Tamaí! ʻOku foaki mai ʻeni kiate kitautolu ʻo fakafou pē ʻia Sīsū Kalaisi.
ʻI heʻeku fakakaukau ki he mālohi taʻesiokita mo e huhuʻi ʻa e Fakamoʻuí, ʻoku ou fie muimui kiate Ia. Ko Sīsū Kalaisi ʻa e helo haohaoa ʻo e palani haohaoá. ʻI heʻetau fili Iá, ʻokú Ne tokoniʻi kitautolu ke tau ikunaʻi ʻa e filí, muimui ki he palani ʻa e Tamai Hēvaní, mo aʻusia hotau ikuʻanga fakalangí.