Ko Hoʻo Mape Foki ki ʻApí
Ko e hā ʻoku matuʻaki mahuʻinga ai ke mahino e palani ʻo e fakamoʻuí?
Tā fakatātā ʻa Mackenzie Alexander
ʻI he Tohi ʻa Molomoná, naʻe kamata ʻe he palōfita ko Seilomí ʻene lekōtí ʻaki ʻene pehē, “Ko e hā mo ha toe meʻa te u lava ʻo tohi ʻo lahi ange ʻi he meʻa kuo tohi ʻe heʻeku ngaahi tamaí? He ʻikai koā kuo nau fakahā ʻa e palani ʻo e fakamoʻuí?” (Seilomi 1:2)
Kapau naʻá ne fakakaukau ko e meʻa pē ia naʻa tau fiemaʻú, ta ʻoku pau ʻoku matuʻaki mahuʻinga ʻa e palani ʻo e fakamoʻuí!
Pea ʻoku pehē ia! Ko e mape haohaoa ia ki heʻetau moʻuí. Naʻe pehē ʻe Palesiteni Lāsolo M. Nalesoni ʻe taha, “ʻOku toʻo ʻe he mahino ʻo e palani fakaofo ʻa e ʻOtuá ʻa e meʻa fakamisitelí mei he moʻuí mo e taʻepaú mei hotau kahaʻú.”
ʻE tokoniʻi fēfē leva koe ʻe he mape ko ʻení ke ke ikunaʻi ʻa e ngaahi meʻa taʻepau ʻo e moʻuí?
Naʻá Ku Haʻú Mei Fē?
Ko e ʻOtuá ʻa hoʻo Tamai Hēvaní. Naʻá ke nofo mo Ia kimuʻa pea toki fanauʻi mai koé. ʻOkú Ne ʻofa ʻiate koe!
Naʻe fakamatalaʻi ʻe ʻEletā ʻĀlani T. Filipe ʻo e Kau Fitungofulú ʻo pehē, “Naʻe ʻikai ke ke tupukoso pē, pe [ʻikai] ha mātuʻa, pe hoko noa pē ʻi he anga e ʻalu ʻa e taimí. ʻI he ʻi ai ʻa e palaní, ʻoku ʻi ai ʻa e taha naʻá ne [faʻu] ia.”
ʻI he taimi ʻoku faingataʻa ai ʻa e moʻuí, ʻoku fakafiemālie ke ʻiloʻi ʻokú ke ʻi hení ʻi ha taumuʻa pea ʻoku tokangaʻi koe ʻe ha Tamai Hēvani ʻofa.
Ko ‘Eku ʻAlú Ki Fē?
ʻOku ʻikai ke ke ʻi hení ke ʻauhē taumuʻavalea—ʻoku ʻi ai ha feituʻu ʻokú ke fakataumuʻa ki ai! ʻOku finangalo ʻa e Tamai Hēvaní ke ke foki mai ki ʻapi kiate Ia mo hoko ʻo hangē ko Iá. Naʻá Ne teuteu ʻa e palani ʻo e fakamoʻuí koeʻuhí ka ke lava ʻo maʻu kotoa ʻa e ngaahi tāpuaki ʻo Hono puleʻangá (vakai, Tokāteline mo e Ngaahi Fuakava 14:7).
ʻE tokoniʻi koe ʻi hoʻo ʻiloʻi e palani ʻa e Tamai Hēvaní ʻi hoʻo moʻuí. ʻI he taimi te ke “sio lōloa” mo fakakaukau fakasilesitiale aí, ʻe faingofua ange hono fakahoko ha ngaahi fili lahi—ʻo kau ai ʻa e fili ke muimui ʻia Sīsū Kalaisí.
Te u Aʻu Fēfē Nai Ki Aí?
Makehe mei hono ʻomi ha feituʻu ke tau fakataumuʻa ki aí, ʻoku toe hā foki ʻi he palani ʻo e fakamoʻuí ʻa e hala ke tau aʻu ai ki aí.
Ko Sīsū Kalaisi ʻa e sīpinga haohaoa ʻo e muimui ʻi he hala foki ki ʻapí. Kapau te ke hanga kiate Ia—pea ʻaʻeva mo Ia—te Ne tokoniʻi koe ke ke foki ki he Tamai Hēvaní pea hoko ʻo hangē ange ko Iá. Naʻe fakamatalaʻi ʻe ʻEletā Sēsio R. Vākasi ʻo e Kau Fitungofulú ʻo pehē, “ʻOku tau takitaha maʻu ha holi ke foki ki hotau ʻapi fakalangí, pea ko Sīsū Kalaisi ʻa hotau faifakahinohino fakalangí. Ko Ia ʻa e halá.”
Fēfē Kapau Te u Hē?
Naʻa mo e ʻi ai ha mapé, te ke ala afe ʻi ha hala ʻoku ʻikai totonu. Te ke kei fai pē ha ngaahi fehalaaki. Kae ʻoua naʻa siva hoʻo ʻamanakí! Kuo ʻomi ʻe he Tamai Hēvaní ha Huhuʻi koeʻuhí ke ke lava maʻu pē ʻo fakatomala, tafoki kiate Ia, pea hoko ʻo hangē ange ko Iá. Manatuʻi: “ʻOku ʻikai ke tau nofo ʻi he hala ʻo e fuakavá ʻaki ʻa e ʻikai ke tau teitei fai ha fehalaākí. ʻOku tau nofo ʻi he hala ʻo e fuakavá ʻaki ʻa e fakatomala ʻi he ʻaho kotoa peé.”
ʻI hoʻo ako ʻa e palani ʻo e fakamoʻuí, manatuʻi naʻe faʻu ia ʻaki ʻa e ʻofá. ʻOku finangalo ʻa e Tamai Hēvaní ke ke foki mai ki ʻapi. Pea kapau te ke muimui ʻi Heʻene mapé, te Ne tokoniʻi koe ke ke aʻu ki ai.