Ako Hili ʻa e Mole ʻEku Kui Fefiné

Tā fakatātā ʻa Katelyn Budge

Naʻe faingataʻa kiate au ʻa e mole ʻeku kui fefiné. Naʻá ma fuʻu vāofi ʻaupito. Naʻá ku fuʻu ongoʻi loto-mamahi ʻaupito. Naʻá ku ongoʻi hangē kuo mole atu ʻa e ʻamanaki lelei naʻá ku fiemaʻú.

Kimuʻa peá ne mālōloó, naʻe ʻikai ke u fuʻu mālohi ʻi he ongoongolelei ʻo Sīsū Kalaisí. Naʻá ku fakafalala ki he fakamoʻoni ʻa e niʻihi kehé. Kae lolotonga ʻa e fuofua uike ko ia ʻo e mamahí, naʻá ku ʻalu ki ha kalasi fakalotu ʻa ia naʻe akoʻi ai ʻe ha faiako fekauʻaki mo e Fakalelei ʻa Sīsū Kalaisí mo e palani ʻo e fakamoʻuí ʻa e Tamaí. Naʻá ku fakatokangaʻi te u lava ʻo toe sio ki heʻeku kui fefiné. ʻE lava ke tau toe fakataha ʻi he moʻui ka hokó ʻo fakafou ʻi he ngaahi ouau fakatemipalé.

Naʻe fakamālohia ʻe he meʻá ni ʻeku fakamoʻoní. Naʻe kamata ke u tokanga lahi ange ki hoku Fakamoʻui ko Sīsū Kalaisí pea ke ako lahi ange fekauʻaki mo ʻEne ongoongoleleí. ʻI he taimi ní, ʻoku ou fekumi ki ha ngaahi tali ʻo fakafou ʻi he folofolá mo e Haʻu, ʻo Muimui ʻIate Aú. ʻOku ou saiʻia ke fanongo ki he ngaahi lea ʻo e konifelenisí, tautautefito ki he palōfita ko Lāsolo M. Nalesoní. ʻI heʻeku fanongo ki he ngaahi leá, falala ki he folofolá, lotu mo fakalaulaulotó, mo kolea ʻa e Laumālie Māʻoniʻoní, ʻe lava ke mālohi ʻeku fakamoʻoní.

Kuo tokoniʻi foki au ʻe he seminelí ke u ako mo faifeinga ke hangē ko hotau Fakamoʻui ko Sīsū Kalaisí, ʻi heʻeku ngāue ʻi he tuí, vakai ki he ngaahi meʻá mei ha fakakaukau ʻoku taʻengatá, mo fekumi ki ha ʻilo lahi ange ʻo fakafou ʻi he ngaahi maʻuʻanga tokoni kuo fokotuʻú.

Falala ki he Tamai Hēvaní pea mo Sīsū Kalaisi. ʻOua naʻá ke fakafalala pē ki hoʻo ʻiló ka kiate Kinaua. ʻOkú Na lava ʻo tokoniʻi mo tataki kitautolu ʻi ha faʻahinga ʻahiʻahi pe faingataʻa pē te tau fehangahangai mo ia.