Ko Ha Taʻu Foʻou

Ko Sānuali ʻeni! Ko ha taʻu foʻou. Ko ha taimi ʻo e ngaahi kamataʻanga foʻoú.

Mahalo te ke fokotuʻu ha taumuʻa ki he taʻu foʻou ko ʻení. ʻOku fili ʻe ha kakai ʻe niʻihi ha foʻi lea ke ne fakafofongaʻi ʻenau ngaahi taumuʻa ki he taʻu ʻoku hanganaki maí. ʻI he taʻu ní, ʻe tokanga taha ʻa e toʻu tupu ʻi he kotoa ʻo e māmaní ki ha veesi folofola ʻe taha: Mōsese 6:34, “ʻAʻeva mo au.” Ko ha fakaafe ʻeni naʻe ʻoange ki he palōfita ko ʻĪnoké.

ʻI he fononga ʻa ʻĪnoke ʻi he fonuá, naʻe nofo ʻiate ia ʻa e Laumālie ʻo e ʻOtuá. Pea folofola ʻa e ʻEikí kiate ia. Naʻá Ne akoʻi ia fekauʻaki mo ʻEne palani ʻo e fiefiá, ʻa ia te ne ʻoatu ʻa e taumuʻa mo e ʻuhinga ʻo e moʻuí. Hili hono fakamatalaʻi ʻe he ʻEikí ʻEne palaní, naʻá Ne ʻoatu ha fakaafe kia ʻĪnoke: “ʻAʻeva mo au.”

ʻI hoʻo faifononga ʻi he taʻu foʻou ko ʻení, mahalo te ke ʻilo ai haʻo fekumi ki he fiefiá, taumuʻá, mo e ʻuhingá. Te ke lava ʻo ako mei he talanoa ʻo ʻĪnoké mo fakaafeʻi ʻa e ʻEikí ke hoko ko ha konga ʻo hoʻo fonongaʻanga ʻi he taʻu ní.

Te ke lava ʻo fili ke ʻaʻeva mo Ia. ʻI hoʻo fai iá, ʻoku fakatatali mai ha ngaahi tāpuaki.

ʻE hoko ʻeni ko ha taʻu lelei.