ʻI Heʻeku Manavasiʻi Fekauʻaki mo Hoku Kahaʻú, Naʻe Tokoniʻi Au ʻe he ʻOtuá

Naʻá ku ongoʻi hangē naʻe taulōfuʻu mai ʻa e ngaahi faingataʻa kotoa kiate au ʻi he kamataʻanga ʻo hoku taʻu fakaʻosi ʻi he akó. ʻI he uhouhonga ʻo e fakafonu foomu ki he ʻunivēsití mo e kole sikolasipí, naʻá ku fefaʻuhi moʻoni mo e loto-hohaʻá pea naʻá ku fakakaukauʻi ʻa e fili kotoa pē ʻo fuʻu tōtuʻa. Naʻá ku loto ke fili ʻa e halanga haohaoá ke ʻoua naʻá ku fehalaaki.

Pea ʻi ha vaʻinga pasiketipolo ʻa e ako māʻolungá, naʻá ku foua ai ʻa e hulutuʻa ʻo e loto-tailiilí. Naʻá ku ʻi tuʻa ʻi he fakapoʻulí peá u ongoʻi hangē ʻoku taulōfuʻu mai ʻa e loto-tailiilí. Ko e momeniti fakailifia taha ia ʻo ʻeku moʻuí. Ka naʻe fekauʻi mai ʻe he Tamai Hēvaní ha taha ke tokoniʻi au—ko ha sōtia mālōlō naʻe mahino ki ai hoku tūkungá peá ne ngāue fakavavevave ʻi heʻene sio mai ki heʻeku fāinga ke mānavá.

Hili iá, naʻá ku fekumi ki ha tokoni kae ʻikai fai ʻa e meʻa kotoa ʻiate au pē. Naʻá ku fekumi ki ha ngaahi tali mo ha fakafiemālie ʻi hono ako ʻa e folofolá mo e ʻalu ki he seminelí. Naʻá ku ako ke u ongoʻi taau ke hū ki he temipalé mo maʻu hoku tāpuaki fakapēteliaké ʻaki ʻeku tokanga taha ki hoku vā fetuʻutaki mo e Tamai Hēvaní.

ʻOkú Ne ʻafioʻi au. ʻOkú Ne ʻafio mai kiate au, pea ʻoku ʻi ai ʻEne palani maʻaku pea mo ʻEne fānaú kotoa. Ko e taimi ʻe niʻihi ʻokú te tangi ʻi he fakapoʻulí. Ka ʻoku ʻi ai ʻa e ʻOtuá. Ko ha fānau ʻofeina koe ʻa e ʻOtuá, pea ʻoku ʻi ai Haʻane ngāue fakalangi maʻau ke ke fai.