Unutea J.

Faitā ʻa Stephane Sayeb

Ko ha hoʻatā efiafi, pea ʻoku ou manatuʻi lelei ʻa e meʻa naʻe hokó. Naʻe kole mai ʻe heʻeku faʻeé ke u tangutu ʻo fanongo koeʻuhí naʻe ʻi ai haʻane meʻa ke kole mai kiate au. Naʻá ne toki maʻu pē ha ʻīmeili ne kole mai ai ke u fai ha lea ʻi he konifelenisi fakasiteikí. ʻI heʻene talamai ʻení, naʻá ku hohaʻa: ʻOku ʻikai ke u saiʻia ke lea ʻi muʻa ʻi ha haʻofanga kakai. Naʻá ku sio fakamamaʻu kiate ia.

Naʻá ne ʻomi ha taimi ke u fakakaukau ai ki ai mo kole ki he ʻEikí. Naʻá ne toe talamai foki ko ha founga lelei ia ke fakaafeʻi ai ʻeku tangataʻeikí, ʻa ia ʻoku ʻikai ko ha mēmipa, ke haʻu ki heʻemau konifelenisi fakasiteikí ko ha fuofua taimi ia ke ne kau mai ai ki ai. Ko ia naʻá ku fakakaukau ki ai, pea naʻá ku lotu fakataha mo ʻeku fineʻeikí.

Naʻá ku loto-fiemālie ke u lea ʻi he konifelenisí. Hili iá, naʻa mau ʻaukai mo lotu fakafāmili lahi koeʻuhí ke lava ʻe he Laumālié ʻo ueʻi au pea ke lava ʻe heʻeku leá ʻo tokoni ki he moʻui ʻa e kakaí, tautautefito ki heʻeku tangataʻeikí.

ʻOku ou ʻilo naʻe ongo ki heʻeku tamaí ʻa e ʻaho ko iá. ʻI he taimi naʻá ku fai ai ʻeku leá, naʻá ku sio hangatonu kiate ia ke ne lava ʻo ʻiloʻi ʻoku moʻoni ʻeku ngaahi leá mo ʻeku tui ki he ʻOtuá, neongo pe ʻoku lahi pe siʻisiʻi.

ʻOku ou ʻilo ʻoku ʻofa ʻa e Fakamoʻuí ʻiate au koeʻuhí he ʻokú Ne ʻi ai maʻu pē ke tokoniʻi au, tautautefito ki he lolotonga ʻa e faingataʻa ko ʻení. Pea neongo kapau ʻoku ʻi ai haʻaku veiveiua, ʻoku ou ʻiloʻi te Ne ʻi ai maʻu pē ke tokoniʻi au. Neongo pe ko e hā ʻa e tūkunga ʻoku ou ʻi aí, ko e meʻa pē kuo pau ke u faí ko e tafoki kiate Ia ʻi he loto-fakamātoato.