Ko Hono Fakaleleiʻi ʻo e Fakamolemolé

ʻI heʻeku kalasi fitú, naʻe ʻi ai ha kiʻi tamasiʻi naʻe houtamaki mai kiate au. Naʻá ne fakamafola ha ngaahi talanoa fakamamahi, taʻemoʻoni fekauʻaki mo au pea ʻai ʻa e kakai kehé ke nau tui naʻe ʻikai ko ha tokotaha lelei au. Naʻe ʻikai fakakau au ʻe he kakaí koeʻuhi ko e sasala holo ʻa e ngaahi talanoa naʻá ne fakamafolá, pea naʻe aʻu ʻo tui ha niʻihi ʻo hoku ngaahi kaungāmeʻá ki ai. Naʻá ku talanoa ki heʻeku ongomātuʻá mo ha taha ʻo ʻeku kau faiakó fekauʻaki mo ia, ka naʻá ku fuʻu ilifia ke talanoa ki he kiʻi tamasiʻí fekauʻaki mo ia.

Lolotonga e faʻahitaʻu māfaná, naʻá ku kau ki ha polokalama kemi ʻa e kau ifí, pea naʻe kau ʻa e kiʻi tamasiʻi ko ʻení he kulupu lēsoni tatau mo au. ʻI he kamataʻangá, naʻá ku loto-mamahi ʻi he pau ke u toe feohi mo iá. Ka naʻá ku fakakaukau ke u talanoa ki ai. Hili ʻa e lēsoni hono uá, naʻá ku talaange ʻoku ʻikai moʻoni ʻa e ngaahi meʻa naʻá ne lea ʻaki fekauʻaki mo aú peá u fehuʻi ange pe ko e hā naʻá ne faʻu ai ʻa e ngaahi meʻa ko iá.

Naʻá ne kole fakamolemole pea iku ʻo vetehia ki he tokotaha kotoa pē ʻi he akó naʻe loi ʻa e ngaahi fakamatala ko iá. Pea naʻá ku fakamolemoleʻi ia. Naʻá ku fakaafeʻi ia ʻi he kemi ʻa e kau ifí ke ma pele lolotonga ʻemau taimi mālōloó pea faifai pē pea ma hoko ko ha ongo kaungāmeʻa.

ʻI heʻeku hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko ʻeku taumuʻá ke hoko ko ha tokotaha faʻa fakalelei. ʻOku ou feinga ke u kaungāmeʻa mo e taha kotoa pē. Naʻe akoʻi au heʻeku tangataʻeikí fekauʻaki mo e faʻa fakamolemolé pea ko e taimi ʻokú ke fakatomala ai ko hoʻo ngaahi angahalá, ʻoku folofola mai e ʻEikí ʻe “ʻikai te [Ne] toe manatu ki ai” (Tokāteline mo e Ngaahi Fuakava 58:42). ʻE lava ʻe he fakamolemolé ʻo fakaleleiʻi ha ngaahi meʻa lahi.

Ko Sīsū Kalaisi ʻa e tokotaha tā sīpinga maʻongoʻonga tahá. ʻOkú Ne haohaoa. ʻOku ou ʻilo kapau te u muimui kiate Ia, te u lava ʻo hū ki he puleʻanga fakasilesitialé mo Ia pea mo e Tamai Hēvaní.