Ko e hā te u lava ʻo fai kapau ʻoku ou fefaʻuhi mo e loto-hohaʻá pe loto-mafasiá?

ʻI he taʻu ʻe ua kuo maliu atú, kuó u fefaʻuhi ai mo e loto-hohaʻá mo e loto-mafasiá koeʻuhí ko ha ngaahi liliu lahi naʻe hoko ʻi heʻeku moʻuí ʻi he taimi pē ʻe taha: Naʻá ku hiki, hiki foki mo ʻeku ongo kuí, pea mālōlō ʻeku faʻētangatá mei he kanisā penikiliasí, lolotonga iá ʻoku lolotonga faitoʻo ʻeku kui fefiné ki he kanisā huhú. Naʻe ʻomi foki ʻe heʻeku kamata ʻi he ako lotolotó ha loto-hohaʻa lahi kiate au. Ko ha feituʻu foʻou ia mo ha kakai foʻou mo ha ngaahi aʻusia, pea naʻá ku fuʻu ongoʻi lōmekina.

Lolotonga ʻa e taimi ko ʻení, naʻá ku ongoʻi hangē kuo tamateʻi ha meʻa kamosi ʻo e māmá pea ʻikai ha toe ʻamanaki lelei. Naʻe kamata ke u hohaʻa fakaʻaho pea ʻikai ke u ʻilo ʻa e meʻa ke faí.

Naʻá ku fakatokangaʻi leva naʻe ʻi ai ha Fakamoʻui ʻofa te Ne tokoniʻi au. Ko ia naʻá ku ʻalu ki heʻeku Tamai Hēvaní ʻi he lotu ʻo lau fekauʻaki mo Sīsū Kalaisi ʻi he folofolá. Naʻe kamata ke u sio ki ha tokotaha faifaleʻi, pea maʻu hoku tāpuaki fakapēteliaké.

Neongo naʻe faingataʻa ʻa e ngaahi māhina ko iá kiate au, ka naʻá ku ako ha meʻa lahi. Kapau te u lava ʻo foki ʻo liliu ha faʻahinga meʻa pē ke faingofua ange, he ʻikai ke u fai ia.

Naʻá ku toki ʻilo kimuí ni te u toe hiki, pea naʻá ku fakatokangaʻi naʻe teuteuʻi au ʻe he Tamai Hēvaní ki he faingataʻa ʻoku hanganaki maí.

ʻI he tupulaki hoku vā fetuʻutaki mo e ʻOtuá, kuó u maʻu ha loto-falala lahi ange ke fehangahangai mo hoku ngaahi faingataʻaʻia fakaʻatamaí. ʻOku ou sio maʻu pē ʻi he taimí ni ki hoku Fakamoʻuí. Ko Ia hoku fakafiemālié mo hoku fai-fakahinohino ʻi he māmani faingataʻa ko ʻení, pea pehē foki kiate koe.

Ko Ia ʻa e maama ʻo e māmaní. Te Ne toʻo atu hoʻo ngaahi kavengá mo fakamaʻamaʻa hoʻo ngaahi mamahí ʻi hoʻo feinga ke hangē ko Iá.