Ngaahi Meʻaʻofa ʻi he Ngaahi Toʻu Tangatá
ʻI hoʻo fehokotaki mo hoʻo hisitōlia fakafāmilí, ʻe tāpuekina lahi koe mo hoʻo ngaahi kuí fakatouʻosi.
Tā fakatātaaʻi ʻe Guev Design
Ko e faʻahitaʻu Kilisimasí ko ha taimi makehe ia ke feohi ai mo e fāmilí. Mahalo ʻokú ke hanganaki fiefia atu ki he ngaahi tukufakaholo fakafāmili ʻokú ke saiʻia taha aí pe ngaahi meʻaʻofa te ke foaki ki hoʻo mātuʻá pe ngaahi tokouá pe tuofāfiné.
Kae fēfē ʻa e kau mēmipa ho fāmilí ʻi he tafaʻaki ʻe taha ʻo e veilí?
Ko e ngāue hisitōlia fakafāmilí ko ha konga mahuʻinga ia ʻo hono tānaki fakataha ʻo ʻIsilelí, ʻa ia ko e “ngāue maʻongoʻonga taha ʻi he māmaní.” Pea naʻe malava hono huhuʻi ʻo e kau pekiá ʻi he Fakalelei ʻa e Fakamoʻuí, ʻa ia ʻoku tau fakamanatua hono ʻaloʻí ʻi he taimi ko ʻení. Koeʻuhí ko e taimi Kilisimasí ko ha faʻahitaʻu ia ʻo e foaki, ko e hā ha ngaahi meʻaʻofa te ke lava ʻo foaki—mo maʻu mai—ʻo fakafou ʻi he hisitōlia fakafāmilí?
Ko Ha Fehokotakiʻanga ʻi he Ngaahi Kuongá
ʻI heʻeku tupu haké, naʻá ku fakakaukau kuo ʻosi ʻeku ngāue hisitōlia fakafāmilí. ʻI he taimi naʻá ku lahi feʻunga ai ke ʻalu ki he temipalé, kuo kakato kotoa ʻa e ngaahi ouau ʻo ʻeku ngaahi kui kuo lekōtí. Naʻe hangē naʻe ʻikai ke ʻi ai ha toe meʻa te u lava ʻo fai.
Naʻá ku maʻu leva ʻa e ngaahi lekooti ki heʻeku kui fefine hono ua ko ʻEleva Pailá.
Naʻe fāʻeleʻi ʻa ʻEleva ʻi ʻIutā hili ʻa e hiki ki ai ʻene ongomātuʻá mo e kau paioniá. Naʻá ne fakahoko kotoa ʻene ngaahi fuakavá lolotonga ʻene kei moʻuí, ko ia naʻe ʻikai ke u fakakaukau ʻoku ʻi ai ha meʻa te u lava ʻo fai maʻana. Ka naʻe hoko hono ʻiloʻi ʻene ngaahi lekōtí ko ha tāpuaki lahi—kiate au!
Naʻe teʻeki ke u fetaulaki mo ʻEleva, ka ʻi he hili ʻeku sio ʻi heʻene ngaahi taá, ngaahi fakamatala ʻi he tohinoá, mo e ngaahi tohí, naʻá ku ongoʻi hangē naʻá ku ʻiloʻi moʻoni iá. Naʻá ne saiʻia ʻi he ngaahi tohí mo e māú, ʻo hangē pē ko aú! Naʻá ku tanganeʻia ʻi heʻene falala ki he ʻOtuá lolotonga hono ngaahi faingataʻaʻia fakatāutahá.
Kuo fakamālohia ʻeku tuí, koeʻuhí ko ʻene tuí. ʻOku ou ongoʻi ʻokú ne tokangaʻi mo ʻeku ngaahi kui kehé au.
Ko e Laumālie ʻo ʻIlaisiaá
ʻI he kuonga muʻá naʻe fekauʻi ai ʻa e palōfita ko ʻIlaisiaá “ke liliu ʻa e loto ʻo e ngaahi tamaí ki he fānaú, pea mo e fānaú ki he ngaahi tamaí” (Tokāteline mo e Ngaahi Fuakava 110:15). Naʻe hoko ʻeni ʻi heʻene foaki kia Siosefa Sāmita ʻa e ngaahi kī ʻo e mālohi faisilá. Ko e ʻuhinga ia ʻoku faʻa ui ai ʻa e ngaahi ongo fakalaumālie ʻokú ne tataki kitautolu ke tau fokotuʻu ha vā fetuʻutaki ʻi he vahaʻa ʻo e ngaahi toʻu tangatá ko e “laumālie ʻo ʻIlaisiaá.”
ʻOku ʻikai faingofua maʻu pē ʻa e ngāue hisitōlia fakafāmilí. Mahalo ʻoku hangē “kuo ʻosí” ʻa e ngāue fakatemipale ki ho fāmilí, ʻo hangē ko aú. Mahalo ʻoku siʻisiʻi hoʻo fuʻu ʻakau fakafāmilí koeʻuhí ʻoku ʻikai ke ke maʻu ʻa e ngaahi lekooti ke tānaki ki aí pe fakafehokotaki ha kakai tokolahi ange. Tatau ai pē pe ʻoku fōtunga fēfē hoʻo fuʻu ʻakau fakafāmilí, te ke lava ʻo aʻusia ʻa e laumālie ʻo ʻIlaisiaá ʻi he taimi ʻokú ke liliu ai ho lotó ki hoʻo ngaahi kuí. ʻI hoʻo fai iá, te ke maʻu ha mahino lelei ange ki ho tuʻunga ʻi he palani ʻo e fakamoʻuí.
Ko ha meʻa-foaki mālohi ia. Ko e hā ha ngaahi meʻaʻofa te ke foaki fakafoki ki hoʻo ngaahi kuí?