Kau Ninisā Sanitā Fakapulipuli

Tā fakatātā ʻa Katelyn Budge

Ki hoku fāmilí, ko e Kilisimasí ko ha ʻaho mālōlō fonu ʻi he fiefia. Talu pē mei fuoloa ʻeku manatuʻi hono fakahoko ʻe hoku fāmilí ha meʻa naʻa mau ui ko e Kau Ninisā Sanitā Fakapulipulí. Ko ha tukufakaholo faingofua kae fakafiefia ia. ʻUluakí, ʻoku mau teuteuʻi ha meʻaʻofa mo ha kaati maʻa ha taha ʻoku faingataʻaʻia. Pea mau tolotolo atu leva ki honau matapaá, ʻo tuku ai, lomi ʻa e fafangu ʻo e matapaá, pea hola ʻoku teʻeki ai ke nau hū maí. ʻOku hangē ia ko ha konga ʻo ha ngāue faka-Kilisimasi makehe!

ʻOku ongo fakalata moʻoni ke hoko ko ha Kau Ninisā Sanitā Fakapulipuli. ʻI he taimi kotoa pē, ʻoku ou maʻu ʻa e ongo māfana mo fiefia ko ʻení ʻi hoku lotó ʻa ia ʻokú ne ʻai ke u malimali, ʻo hangē ha kiʻi fiefia ʻi hoku lotó. Kuo liliu ʻe he tukufakaholo ko ʻení ʻa e anga ʻo ʻeku vakai ki he Kilisimasí.

ʻI heʻeku kei siʻí, naʻá ku pehē ko e Kilisimasí naʻe meimei fekauʻaki pē ia mo e ngaahi meʻaʻofá. Ka ʻi he taimi ní, ʻoku ou lau ia ko ha taimi ke tokoni ai ki he niʻihi kehé mo vahevahe ʻa e ʻofa ʻa Kalaisí. ʻOku mau ʻai ʻa e ngāue tokoní ko ha konga ʻo e Kilisimasi kotoa pē, ʻo feinga ke tokoni ki he tokolahi taha ʻe ala lavá. ʻOku ʻikai ke faingofua maʻu pē—ko e taimi ʻe niʻihi ʻoku ʻuhinga ia ke ʻā pongipongia ke tokoni ki he kaungāʻapí ʻi he halá pe tukuange ha hoʻatā Tokonaki ke fakamaʻa ʻa e falelotú. Ka ʻoku ʻaonga maʻu pē ia. Ko e palé ko e vakai ki he loto-houngaʻia ʻa e niʻihi kehé, maʻu ʻa e ngaahi tāpuakí ʻi heʻeku moʻuí, mo aʻusia ʻa e fiefia haohaoa ʻoku maʻu mei hono ʻiloʻi naʻá ku fai ha meʻa leleí.

ʻI heʻeku fakakaukau kia Sīsū Kalaisí, ʻoku ou fakakaukau ki Heʻene ʻofa lahi ʻiate kitautolú mo ʻEne fakahaaʻi ʻa e ʻofa ko iá ʻaki ʻEne tokoniʻi ʻa e niʻihi kehé. ʻOku ueʻi au ʻe heʻene moʻuí ke u ngāue tokoni foki, pea ʻoku ou ʻilo ko e taimi ʻoku ou tokoni ai ki he niʻihi kehé, ʻoku ou tauhi foki ai ki he ʻOtuá. ʻOku ʻikai ko e Kilisimasí ʻa hono foaki pē ʻo e ngaahi meʻaʻofá; ʻoku fekauʻaki ia mo hoʻo foaki ʻi he taʻesiokita ke tokoniʻi ʻa e niʻihi kehé. Ko e meʻa ia kuo akoʻi mai ʻe he Kau Ninisā Sanitā Fakapulipulí, pea ko e meʻa ia ʻoku ou fakaʻamu ke u moʻui ʻaki ʻi he ʻaho kotoa pē.