“ʻOku ʻikai ke u ongoʻi ʻoku tali mai ʻe he folofolá ʻeku ngaahi lotú. Te u lava ʻo fakaʻaongaʻi fēfē kinautolu kiate au?”

“Lolotonga ʻa e laukongá, ʻoku totonu ke tau fehuʻi loto pē ʻo hangē ko ʻení: Ko e hā ʻoku nau lea ʻaki ai ʻení? Ko e fē ʻa e taimi mo e founga te u lava ai ʻo fai ai ʻení? ʻE founga fēfē haʻaku fakalakalaka ke u hangē ko ʻení?”

Ceci B., 19, Sao Paulo, Palāsila

“ʻE lava ke tokoniʻi koe ʻi hoʻo fakafekauʻaki ʻa e ngaahi palopalema ʻi he folofolá mo ia ʻoku tau foua ʻi he ngaahi ʻaho kimui ní ke ke fakaʻaongaʻi ʻa e folofolá ʻi hoʻo moʻuí. ʻI hono fakafehoanaki ʻa e ngaahi tūkunga naʻe foua ʻe he kau palōfitá ki hoʻo moʻuí, te ke fakatokangaʻi ʻoku kehekehe ʻa e ngaahi tūkungá ka ʻoku tatau pē ʻa e ngaahi lēsoní.”

Jack L., 18, Mīsuli, USA

“Fakafanongo ki he Laumālié, pea fakaava ho ʻatamaí mo e lotó ki he ngaahi ongó. Taimi ʻe niʻihi ko e meʻa ʻoku fiemaʻu ʻe he Laumālie Māʻoniʻoní ke ke akó he ʻikai ko e meʻa tofu pē ia ʻokú ke laú.”

Lincoln R., 17, Uāsingatoni, USA

“ʻOku ou fakahū hoku hingoá ʻi he potufolofola takitaha, ʻo hangē pē ʻoku folofola fakahangatonu mai ʻa e ʻEikí pe lea mai ʻa e kau palōfitá kiate aú. Peá u lotu fakamātoato leva. ʻOku ʻaonga ia!”

Dieuveille O., 15, Poiniti-Nuā, Lepapulika ʻo Kongokoú

“ʻOku ʻikai maʻá e kakai pē ʻo e kuonga ko iá ʻa e ngaahi pōpoaki ʻi he Tohi ʻa Molomoná—ka ʻoku toe mahuʻinga foki ia kiate kitautolu ʻi he ʻahó ni. Ko e taimi pē ʻoku ou fie fakaʻaongaʻi ai ha meʻa naʻá ku ako mei he folofolá, ʻoku ou lotua te u lava ʻo tokanga taha mo ngāueʻi ia ʻi he lolotonga ʻo e ʻahó.”

Ari I., 14, ʻIutā, USA

“Ko e taimi ʻe niʻihi ʻoku tau fiemaʻu ha fakakaukau foʻou ke maʻu ha ngaahi tali. Naʻe faingataʻa ke u vakai ki he folofolá ko ha tali ia ki heʻeku ngaahi lotú, ka ʻoku lahi ʻa e ngaahi tali ʻoku ou maʻú ʻi he ngaahi lea ʻo e konifelenisi lahí ʻoku lau maʻu pē mei he folofolá, pea ʻoku nau tokoni ke maʻu ai ha ngaahi tali lahi.”

Xaeli S., 16, Meilileni, USA