Ngaahi Talaʻofa ki he Taʻengatá
Kuo tāpuekina hoku fāmilí ʻo taʻengata ʻi heʻeku ako ko ia ʻe lava ke taʻengata ʻa e fāmilí. Te ne lava foki ʻo tāpuakiʻi ho fāmilí.
Ongomātuʻa ʻa ʻEletā Soālesí, ʻApalesito mo Mēseitisi Soālesi
ʻI heʻeku kei talavoú, naʻe ʻikai ke saiʻia ʻeku tamai ko ʻApalesitó ʻi he tui fakalotú. Ko ha kakai lelei ʻene ongomātuʻá ka naʻe ʻikai ke na tui fakalotu. Ka neongo ia, ʻi heʻene tupu ʻo fuʻu lahí, naʻá ne lau ʻa e Tohi Tapú, ʻalu ki he ngaahi kalasi Tohi Tapú, pea ako ʻa e moʻui ʻa Sīsū Kalaisí. Naʻe tupu heni ʻene tokanga lahi ki he ongoongolelei ʻa e Fakamoʻuí pea ʻi he fāmilí. Naʻá ne fie mali mo ha taha naʻe saiʻia ʻi he meʻa tatau.
Naʻe haʻu ʻeku faʻē ko Mēseitisí mei ha fāmili tui fakalotu moʻoni. Naʻa nau maʻulotu mo moʻui ʻaki ʻenau tui fakalotú. ʻI heʻene tupu hake ʻi he ʻātakai ko iá, naʻe ʻikai teitei liʻaki lotu ʻeku faʻeé.
Hili ʻa e mali ʻeku ongomātuʻá pea fāʻeleʻi au mo hoku ngaahi tokoua ʻe toko tolú, naʻá na fai hona lelei tahá ke ohi hake kimautolu ʻo makatuʻunga ʻi he ngaahi akonaki ʻa e Fakamoʻuí. ʻI ha ʻaho ʻe taha naʻe pehē ange ʻe he tokoua ʻo ʻeku faʻeé ki heʻeku tamaí, “Kapau ʻokú ke loto moʻoni ke ʻohake hoʻo fānau tangata ʻe toko faá ʻo fakatefito ʻia Kalaisi pea maʻu ʻa e ʻOtuá ʻi ho fāmilí, ʻoku fiemaʻu ke ke ako lahi ange fekauʻaki mo hoku siasí.”
Naʻá ne hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
ʻOku Tāpuekina Hoku Fāmilí ʻe he Ongoongoleleí
Naʻe ʻikai fuʻu fie ʻilo lahi ange ʻeku tamaí ki he siasi ʻo e tokoua ʻo ʻeku faʻeé, pea naʻe ʻikai ha meʻa ʻe hoko kae ʻoua kuo tukituki mai ʻa e ongo faifekaú ʻi homau matapaá. ʻI heʻena akoʻi kimautolú, ko e meʻa ʻe taha naʻe mahuʻingaʻia ai ʻeku ongomātuʻá ʻi he ongoongolelei ʻo Sīsū Kalaisi kuo fakafoki maí ko e mahuʻinga ʻo e fāmilí mo e founga ʻoku tāpuekina ai ʻe he ongoongoleleí ʻa e ngaahi fāmilí.
Naʻe maʻulotu ʻeku ongomātuʻá ʻi ha ngaahi māhina pea naʻá na feohi mo e kāingalotú, ka naʻe ʻikai ke na papitaiso ʻi he taimi pē ko iá. ʻI heʻenau fakataha mo e kau faifekaú mo hokohoko atu hono ako ʻo e ongoongoleleí, naʻa nau ako ai ʻa e mahuʻinga ʻo hono akoʻi ʻo e māmá mo e moʻoní ki heʻenau fānaú pea ʻe lava ke taʻengata ʻa e fāmilí. Naʻe ʻikai fuoloa kuo papitaiso kinaua.
Naʻe ongo moʻoni ki he loto ʻo ʻeku ongomātuʻá ʻa e fakakaukau ko ia ke ʻi ai ha fāmili taʻengatá pea hoko ia ko e konga mahuʻinga ʻo ʻena uluí. Naʻá na fakaafeʻi foki mo e kaungāʻapí ke nau faʻa fanongo ki he ngaahi lēsoni ʻa e kau faifekaú.
Ko Hono Faʻu ha Ngaahi Fāmili Taʻengatá
Hili ʻa e papitaiso ʻeku ongomātuʻá, naʻá na fakahoko maʻu pē ʻa e efiafi fakafāmili ʻi ʻapí mo e ako folofolá, maʻulotu faivelenga, mo kamata ʻa e ngāue hisitōlia fakafāmilí. ʻI he ngaahi ngāue ko iá, naʻá na fakaʻamu ke faʻu ha fāmili ʻoku fakatefito ʻi he ongoongolelei ʻo Sīsū Kalaisí pea naʻá na fakaʻamu ke silaʻi kinautolu ko ha fāmili taʻengata.
Naʻe ʻikai ke ʻi ai ha temipale ʻi Palāsila ʻi he taʻu naʻe papitaiso ai ʻeku ongomātuʻá. Ko e temipale ofi taha ki he feituʻu naʻa mau nofo ai ʻi Sao Pauló ko e Temipale Mesa Arizona, ʻa ia naʻe meimei maile ʻe 6,000 (kilomita ʻe 9,650) hono mamaʻó! Naʻe fuʻu mamafa ʻa e folaú, ko ia naʻe tatali ʻeku ongomātuʻá ʻi ha ngaahi taʻu lahi ki hono fakatapui ʻo e Temipale São Paulo Brazil, ko e fuofua temipale ia naʻe langa mo fakatapui ʻi ʻAmelika Tongá kotoa, kimuʻa pea toki lava ke na maʻu hona ngaahi ouau fakatemipalé pea silaʻi ai. ʻI he taimi ko iá, naʻá ku ngāue fakafaifekau ʻi Lio ti Senelo.
ʻI ha māhina nai ʻe ua kimuʻa pea ʻosi ʻeku ngāue fakafaifekaú, naʻe fakangofua au mo hoku hoá ʻe heʻeku palesiteni fakamisioná ke ma fononga pō kakato mo e kāingalotu ʻo e siteikí mei Lio ti Senelo ki he Temipale São Paulo Brazil kae lava ke silaʻi au ki heʻeku ongomātuʻá mo maʻu hoku ngaahi ouau fakatemipalé. Naʻe ʻaonga lahi kiate au ʻa e meʻa naʻá ku aʻusia ʻi he temipalé ʻi he toenga ʻo ʻeku ngāue fakafaifekaú. Naʻá ku saiʻia ʻi he fakamoʻoni ki he temipalé mo e mahuʻinga ʻo e palani ʻa e ʻOtuá maʻá e ngaahi fāmilí. Naʻe liliu foki ʻe he temipalé ʻeku vīsone ki he kahaʻú.
Ko ʻEletā Soālesi ʻi heʻene hoko ko ha faifekau kei talavoú, mo hono tokouá mo e ongomātuʻá
ʻI heʻeku foki mei heʻeku ngāue fakafaifekaú, naʻá ku fiemaʻu ke maʻu ha hoa taʻengata pea sila ʻi he temipalé. Naʻá ku fuofua fetaulaki mo hoku uaifi ko Losaná, lolotonga ʻema ngāue fakafaifekau ʻi he misiona tatau pē. Hili ha ngaahi māhina mei heʻema ngāue fakafaifekaú, naʻá ma fetaulaki ai ʻi ha hulohula fakavahaʻa siteiki. Naʻe kamata ke ma teiti, pea hili ha taʻu ʻe ua mei ai, naʻá ma mali pea sila ʻi he temipalé mo e taumuʻa ke ohi hake homa fāmili taʻengatá.
Ko ʻEletā Soālesi mo hono uaifi ko Losaná
Naʻá ku ngāue fakataha mo Losana ke fokotuʻu ha fāmili naʻe nofotaha ʻi he Fakamoʻuí, ʻEne ngaahi akonakí, pea mo e ngaahi akonaki ʻa ʻEne kau palōfitá mo e kau ʻaposetoló. Naʻe aʻu ki ha taimi kuó u maʻu ʻa e tāpuaki ʻo hono silaʻi ʻeku fānau ʻe toko tolú ki honau ngaahi malí. Ko ha aʻusia fakangalongataʻa mo fakaʻofoʻofa ʻa ʻeku mamata ki heʻenau tūʻulutui ʻi he ʻōlita ʻi he temipalé. ʻI he ʻaho ní, ʻoku ohi hake ʻe heʻema fānaú ʻenau fānaú ʻi he ongoongoleleí—ʻo hangē pē ko ia naʻe fai ʻe heʻeku ongomātuʻá maʻaku mo hoku ngaahi tokouá pea mo ʻeku feinga mo Losana ke fakahoko maʻanautolú. ʻOku ou lava ʻo mamata ki he hokohoko atu ʻa e ngaahi tāpuaki ʻo e ongoongoleleí ʻo taʻengata maʻa homau fāmilí!
Ko ʻEletā Soālesi mo hono uaifí, fānaú, mo honau ngaahi malí
ʻOku Malava Ia ʻi he Tokoni ʻa e Fakamoʻuí
Ko e feituʻu kotoa pē ʻoku ou ʻalu ai ki ha fatongia faka-Siasi, ʻoku ou feinga ke kumi ha kiʻi Fakatātā ʻo e ʻAloʻí ke fakatau mai mo foki mo ia ki ʻapi. ʻOku ou ongoʻi mo Losana ʻoku tokoni ʻa e ngaahi Fakatātā ʻo e ʻAloʻi ko ʻení ke fakafehokotaki kimaua ki he Fakamoʻuí. ʻOku lahi fau ʻa e ngaahi meʻa kuó ma tānakí ʻi he ʻahó ni! ʻI ha taʻu ʻe taha kimuʻa ʻi he Kilisimasí, naʻa mau tuku kotoa ʻemau ngaahi Fakatātā ʻo e ʻAloʻí ʻi ha ongo funga laupapa lalahi ʻi homau ʻapí. Hili ʻa e Kilisimasí, naʻá ma fakakaukau ke tuku pē kinautolu ai. ʻOku fakamanatu mai ʻe he ngaahi Fakatātā ʻo e ʻAloʻi ko iá ʻi he ʻaho kotoa pē ʻa e meʻa ʻoku mahuʻinga taha kiate kimauá—ʻa e Fakamoʻuí, ʻEne ongoongoleleí, mo homa fāmilí.
ʻOku tuku ʻe ʻEletā Soālesi ke fakamanatu kiate ia ʻe heʻene ngaahi Fakatātā ʻo e ʻAloʻí ʻa e Fakamoʻuí ʻi he taʻú kakato.
Kiate kimaua, ko e fāmilí ʻa e meʻa kotoa koeʻuhí “ko e fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú.” Ka ʻoku ʻikai lava ʻa e palani ko iá taʻe-kau ai ʻa Sīsū Kalaisi. ʻOku malava ʻe Heʻene Fakaleleí mo ʻEne ongoongoleleí ʻo fakahoko ʻa e talaʻofa ʻo e fāmili taʻengatá.
Kuo akoʻi ʻe Palesiteni Lāsolo M. Nalesoni, “ʻoku toki makatuʻunga pē ʻi he ngaahi ouau fakamoʻui ʻo e ongoongolelei ʻo Sīsū Kalaisí ʻa e lava ke hakeakiʻi ʻa e fāmilí. Ko e ikuʻanga māʻolunga taha ʻoku tau feinga ki aí ke tau hoko ko ha fāmili fiefia—ʻosi maʻu ʻenitaumeni, silaʻi, mo mateuteu ki he moʻui taʻengata ʻi he ʻao ʻo e ʻOtuá.”
ʻI hotau kuongá, kuo akoʻi ʻe he kau pālofitá mo e kau ʻaposetoló, “ko e fiefia ko ia ʻi he moʻui fakafāmilí, ʻoku meimei ke toki aʻusia pē ia ʻi he taimi kuo langa ai ʻa e fāmilí ʻi he ngaahi akonaki ʻa e ʻEiki ko Sīsū Kalaisí.” Tatau ai pē pe ko e hā ho tūkunga fakafāmilí, ʻi hoʻo fai ho lelei tahá ke muimui ki he ʻEikí, te Ne tāpuakiʻi koe ʻaki ha mālohi ke kumi ha ngaahi founga ke hiki hake ai ʻa e fāmili ʻokú ke maʻu ʻi he taimi ní pea mo e fāmili te ke maʻu ʻi ha ʻahó. Te Ne tokoniʻi koe ke ke fakalakalaka ki ha tuʻunga nāunauʻia ʻo ha ʻaho ʻo moʻui fiefia mo ho ngaahi ʻofaʻangá pea mo Ia mo ʻetau Tamai Hēvaní ʻo taʻengata.