Haʻu, ʻo Muimui ʻIate Au
Tokāteline mo e Ngaahi Fuakava 137–138; Ngaahi Tefito ʻo e Tuí
Ngaahi Koloa Mahuʻinga Fufuú
ʻOku fakahaaʻi mai ʻe he Tokāteline mo e Ngaahi Fuakavá ʻoku hokohoko atu ʻa e maʻu ʻo e fakahaá.
ʻOku Tau ʻIlo ʻa e Ngaahi Meʻa Naʻe ʻIkai ʻIlo Ki Ai ʻEtau Ngaahi Kuí—pea ʻOku ʻI Ai mo ha Ngaahi Meʻa Lahi Ange ʻe Hoko Mai
Tokāteline mo e Ngaahi Fuakava 137–138; Ngaahi Tefito ʻo e Tuí
ʻOku fakafiemālie ke ʻiloʻi ko kinautolu naʻe pekia teʻeki ke nau maʻu ʻa e ongoongoleleí naʻa nau mei tali ia kapau naʻa nau maʻu ʻa e faingamālié pea te nau hoko ko e kau ʻea-hoko ki he puleʻanga fakasilesitialé (vakai, Tokāteline mo e Ngaahi Fuakava 137:7).
Pea ko e fānau ʻoku pekia kimuʻa pea nau aʻu ki he taʻu valú ʻoku fakahaofi kinautolu ʻi he puleʻanga fakasilesitialé (vakai, Tokāteline mo e Ngaahi Fuakava 137:10).
Pea ʻoku malangaʻi ʻa e ongoongoleleí ki he ngaahi laumālie ʻo kinautolu kuo pekia teʻeki ke nau maʻu iá kae lava ke nau ului foki mo kinautolu (vakai, Tokāteline mo e Ngaahi Fuakava 138:29–32).
ʻOku tali ʻe ha kau mēmipa tokolahi ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e ngaahi tefitoʻi moʻoni ko ʻení. ʻOku tau ongoʻi fiemālie ai. ʻOku tau pehē ʻoku nau mahuʻinga.
Ka naʻa tau toki ʻiloʻi kinautolu kimuí ni mai!
Naʻe maʻu ʻe he Palōfita ko Siosefa Sāmitá ʻa e Tokāteline mo e Ngaahi Fuakava 137 ʻi he 1836. Naʻe maʻu ʻe hono ʻilamutu ko Siosefa F. Sāmitá (Palesiteni ʻo e Siasí mei he 1901 ki he 1918) ʻa e vahe 138 ʻi he 1918. Ko ha mei taʻu nai ia ʻe teau ʻi he kuohilí!
ʻOku kiʻi talanoa ʻa e Tohi Tapú mo e Tohi ʻa Molomoná ki ha niʻihi ʻo e ngaahi meʻá ni. Hangē ko ʻení, naʻe fakamatala nounou ʻa Pita ki he ʻaʻahi ʻa e Fakamoʻuí ki he maama tataliʻanga ʻo e ngaahi laumālié (vakai, 1 Pita 3:18–20; 4:6).
Ka naʻe ʻikai fakamatalaʻi fakaʻauliliki ʻa e ngaahi moʻoni fakafiemālie ko ʻení kae ʻoua kuo aʻu ki he kuongá ni.
Naʻe tohi ʻe he Palōfita ko Siosefa Sāmitá kimui ange ʻi he Ngaahi Tefito ʻo e Tuí ʻe “kei fakahā mai ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuá” (Ngaahi Tefito ʻo e Tuí 1:9). Naʻe hoko ʻa e fakahā ʻa hono ʻilamutú ʻi ha ngaahi taʻu lahi kimui angé ko ha fakamoʻoni ki ai.
Pea ʻoku kei lahi pē ʻa e meʻa ke hoko maí! Kuo akoʻi ʻe Palesiteni Lāsolo M. Nalesoni, “ʻi he ngaahi ʻaho ka hoko maí, te tau mamata ai ʻi he ngaahi fōtunga maʻongoʻonga taha ʻo e mālohi e Fakamoʻuí kuo faifai angé pea mātā ia ʻe māmani.”
Fakakaukau ki ai. ʻOku teʻeki ai ke kakato ʻa hono fakahā mai ʻe he Tamai Hēvaní ʻa e ngaahi meʻá! ʻOku kei ʻi ai pē ha ngaahi meʻa ke Ne fakahā mai—ʻo ʻikai ko ha fanga kiʻi fakaikiiki iiki, ka ko e “ngaahi meʻa lalahi mo mahuʻinga.”
ʻOku totonu ke tau houngaʻia ʻi he ngaahi meʻa ʻoku tau ʻiló ʻa ia naʻe ʻikai ʻilo ʻe heʻetau ngaahi kuí—pea mateuteu ke tali ʻa e ngaahi meʻa foʻou ʻoku ʻamanaki ke hoko maí.