Kilisimasi ʻi he Malaʻe ʻo e Ngāue Fakafaifekaú

Kapau ʻokú ke fakakaukau ke ke ngāue fakafaifekau, ʻe lava ke hoko ʻa e mavahe mei ho fāmilí ʻi he Kilisimasí—ʻi he taimi ʻe niʻihi ʻi ha fonua kehe—ko ha fakakaukau fakalotosiʻi.

Kae fakatatau ki he kau ʻosi ngāue fakafaifekau ko ʻení, ʻoku ʻi ai ha ngaahi meʻa fakaʻofoʻofa ke mou hanganaki atu ki ai. Vakaiʻi ʻa e meʻa naʻa nau vahevahe fekauʻaki mo honau Kilisimasí ʻi he malaʻe ʻo e ngāue fakafaifekaú.

ʻŪ tā fakatātā ʻa Jarom Vogel

Ko e konga lelei taha ʻo e Kilisimasí ʻi hoʻo hoko ko e faifekaú ko hoʻo fakafofongaʻi ʻa Sīsū Kalaisi—ʻa e ʻuhinga ʻoku tau fakafiefiaʻi aí.

ʻOku mau fakamanatua ʻa e Kilisimasí ʻi he ʻOtu Filipainí mei Sepitema ki Fēpueli. ʻOku fiefia mo longomoʻui ʻa e tokotaha kotoa pē! Ka ʻi Hongo Kongo, ʻoku kehe ʻaupito ʻa e ʻātakaí. Naʻe faingataʻa ia kiate au, ka naʻá ne fakaʻaiʻai moʻoni au ke u ngāue mālohi. ʻOku ʻikai tokolahi ha kakai ʻi Hongo Kongo ʻoku nau tui kia Sīsū Kalaisi, pea naʻe fiemaʻu ke ma vahevahe ʻEne pōpoakí koeʻuhí ke lava ha kakai tokolahi ange ʻo ongoʻi ʻEne ʻofá ʻi he Kilisimasí pea maʻu ai pē.

Neongo ʻokú ke mamaʻo mei ʻapi, te ke aʻusia ha faʻahinga fiefia kehe, pea ʻe tokoni ia ke mahino kiate koe ʻa e ʻuhinga ʻoku tau fakamanatua ai ʻa e Kilisimasí. Kapau te ke tokanga taha ki he Fakamoʻuí, te ke lava ʻo ongoʻi ʻoku fakataha mo koe ʻa e Tamai Hēvaní mo Sīsū Kalaisi.

Charles S., mei Manila, ʻOtu Filipainí; naʻe ngāue ʻi he Misiona China Hong Kong

ʻOku ou haʻu mei ha fāmili tokolahi, ko ia naʻe fakataʻelata ke u nofo pē mo hoku hoá ʻi he Kilisimasí. Ka ʻoku hoko pē ʻo mole atu ʻa e ongoʻi taʻelatá. Naʻe fakaava ʻe ha kāingalotu tokolahi honau ngaahi matapaá ʻo “ohi” kimaua ko e ongo mēmipa ʻo e fāmilí ʻi he ʻaho ko iá, pea naʻe tokoni lahi ia.

Fiefia ʻi he Kilisimasi ʻi he misioná he ko ha taimi makehe ia ke fakamālohia ai hoʻo fakamoʻoni kia Sīsū Kalaisí. Lolotonga ʻeku ngāue fakafaifekaú, naʻá ku fakatokangaʻi ʻoku ʻikai fekauʻaki ʻa e Kilisimasí mo e ngaahi meʻaʻofá pe mālōlō mei he akó—ʻoku fekauʻaki ia mo e meʻaʻofa maʻongoʻonga tahá, ʻa Sīsū Kalaisi. ʻI he taimi ní, ko e fakaʻilonga ʻo e Kilisimasí kiate au ko ha ʻaiʻangakai ʻo e manú, kae ʻikai ko ha fuʻu ʻakau.

Gabrielly R., mei Sēkaipe, Palāsila; naʻe ngāue ʻi he Misiona Brazil São Paulo North

Koeʻuhí ko ha ngaahi palopalema fakaemoʻui lelei fakaesino, ʻi he hili ha taʻu ʻe taha ʻo ʻeku ngāue fakafaifekaú, naʻe pau ke u foki ki ʻapi ʻi ha kiʻi taimi siʻi. Ka kimuʻa peá u mavahé, naʻe talamai ʻe ha taha ʻo e kau sisitaá, “Ke ke ʻi ʻapi ʻi he Kilisimasí. Ko ho ʻapí ʻeni.”

Naʻá ku fokotuʻu ia ko ha taumuʻa. Naʻá ku ʻiloʻi ko e malaʻe ʻo e ngāue fakafaifekaú ko e feituʻu ia naʻe finangalo ʻa e ʻOtuá ke u ʻi aí, pea naʻá ku fuʻu fiemaʻu moʻoni ke fai ʻa e meʻa naʻá Ne kole maí, ongoʻi ʻa e fiefia naʻá ku ongoʻi kimuʻá, pea fakaʻaongaʻi ʻeku Kilisimasí ke u aʻusia ha ngaahi mana ʻi heʻeku hoko ko ha faifekaú.

Naʻá ku foki ki heʻeku ʻuluaki ngāue naʻe vahe maí ʻi he ʻuluaki uike ʻo Tīsemá. Naʻe tokoniʻi au ʻe he ʻOtuá ke u toe foki ki he ngāué, pea naʻe hoko ia ko ha faʻahitaʻu Kilisimasi lelei. Naʻe fakatefito ʻi he ngāue tokoní mo fakatefito ʻia Kalaisi, ʻo tatau tofu pē mo e founga ʻoku totonu ke ʻi aí. Taimi ʻe niʻihi ʻoku tau tokanga ki he ngaahi tafaʻaki fakamatelie ʻo e Kilisimasí, ka ʻoku ʻikai ko hono ʻuhinga iá. Ko e meʻa mahuʻingá naʻe ʻaloʻi ʻa Sīsū Kalaisi maʻatautolu, naʻá Ne moʻui maʻatautolu, pea pekia maʻatautolu koeʻuhí ko ʻEne ʻofa ʻiate kitautolú.

Naʻá ku saiʻia ʻi Heʻene hoko ko e uho ʻo ʻeku moʻuí lolotonga ʻeku ngāue fakafaifekaú koeʻuhí he naʻe tokoni ia ke u ongoʻi ofi ange kiate Ia, pea naʻá ku vahevahe foki ʻa e meʻaʻofa ko iá mo e kakai kehé. Naʻá ma akoʻi ha fefine naʻá ne fiemaʻu moʻoni ke ʻaʻahi mai kiate ia hono fāmilí ʻi he Kilisimasí koeʻuhí he naʻe teʻeki ke ne sio kiate kinautolu ʻi ha taimi fuoloa. Naʻá ma fakamaʻa hono falé, fokotuʻu ʻene fuʻu ʻakau Kilisimasí, mo mamataʻi fakataha mo ia ʻa e vitiō ʻa e Siasí ko e “The Christ Child [Ko e Tamasiʻi ko Kalaisí].”

Naʻá ne talamai kimui ange, “Naʻá ku aʻusia ʻa e Kilisimasí koeʻuhí ko kimoua ongo faifekau. Naʻe ʻikai ke mei haʻu hoku fāmilí kapau naʻe ʻikai ke mo tokoni mai.” Naʻe ongo moʻoni ia ki hoku lotó. Naʻá ku houngaʻia moʻoni ʻi hono tuku mai ʻe he ʻOtuá ke u aʻusia iá.

ʻI he kahaʻú, ʻoku ou loto ke ngaohi ʻeku ngaahi Kilisimasí ke lahi ange ʻene fekauʻaki mo Kalaisí pea kau lahi ange ʻi he Fakamaama ʻa e Māmaní. Ko e founga ia te tau lava ai ʻo tatau ange mo Iá: ʻaki ʻetau tokoni lahi ange mo tokanga taha ki he niʻihi kehé.

Mary M., mei Kololato, USA; naʻe ngāue ʻi he Misiona Arizona Mesa