Ko Ha Vakai Foʻou ki he Talanoa ʻo e Kilisimasí
ʻOku ʻikai ngata pē ʻi heʻetau fakamanatua ʻa e ʻaloʻi ʻo Sīsū Kalaisí—ka ʻoku tau fakamanatua ʻa e Kalaisi kuo toetuʻu mo moʻuí.
ʻOku tau fanongo mo vahevahe ʻi he Kilisimasi kotoa pē ʻa e talanoa ʻo hono ʻaloʻi ʻo Sīsū Kalaisí. Ko ha meʻa maʻongoʻonga ʻeni ke fai! Ka ʻoku taʻefakangatangata hono mahuʻinga ʻo e ʻaloʻi ʻo Sīsū Kalaisí koeʻuhí ko e meʻa naʻe ʻaloʻi Ia ke Ne faí.
Naʻe akoʻi ʻe Palesiteni Kōtoni B. Hingikelī (1910–2008), “He ʻikai ke ʻi ai ha Kilisimasi kapau naʻe ʻikai ha Toetuʻu. Naʻe mei hoko pē ʻa e pēpē ko Sīsū ʻo Pētelihemá ko ha toe pēpē angamaheni pē ka naʻe taʻeʻoua ʻa e Kalaisi huhuʻi ʻo Ketisemani mo Kālevalé, pea mo e moʻoni fakaʻeiʻeiki ʻo e Toetuʻú.”
ʻI he fakakaukau ko iá, ko ha kiʻi ʻekitivitī faingofua ʻeni te ke lava ʻo fai mo ho fāmilí, ngaahi kaungāmeʻá, kōlomú, pe kalasí ʻi he faʻahitaʻu Kilisimasi ko ʻení.
Founga Hono Fakahoko Iá
ʻE taufetongi ha ongo laukonga ʻi hono lau ʻo e ngaahi potufolofola ko ʻení. ʻOku lau ʻe ha taha ʻa e ngaahi potufolofola fekauʻaki mo e ʻaloʻi ʻo e Fakamoʻuí ʻi he kōlomu toʻohemá, pea lau ʻe he tokotaha ʻe tahá ʻa e ngaahi potufolofola fekauʻaki mo ʻEne Fakaleleí mo e Toetuʻú ʻi he toʻomataʻú. Fetongitongi kae ʻoua kuó ke aʻu ki he ngataʻangá.
|
Ko hono ʻAloʻi ʻo e Fakamoʻuí |
Ko e Fakalelei mo e Toetuʻu ʻa e Fakamoʻuí |
|---|---|
Ngaahi Meʻa ke Fakakaukau Ki Ai
ʻI hoʻo lau fekauʻaki mo e ʻaloʻi, Fakalelei, mo e Toetuʻu ʻa Sīsū Kalaisí, naʻe ʻi ai nai mo ha ngaahi folofola kehe naʻá ke fakakaukau ki ai? Te ke lava nai ʻo fakakaukau ki ha ngaahi folofola mei he Tohi ʻa Molomoná pe Tokāteline mo e Ngaahi Fuakavá? Fakakaukau ke tānaki kinautolu ki he lisi ko ʻení pea vahevahe kinautolu.
Tuku ha taimi ke fakalaulauloto ai ki he ʻuhinga kiate koe ʻo e ʻaloʻi, moʻui, ngaahi akonaki, mo e Fakalelei ʻa Sīsū Kalaisí. ʻI hoʻo fai iá, ʻe lava ke fakamoʻoniʻi ʻe he Laumālie Māʻoniʻoní naʻe ʻaloʻi ʻa Sīsū Kalaisi maʻau pea naʻá Ne moʻui, “[Naʻá Ne mamahi, naʻe tautaʻa pea pekia]” maʻau koeʻuhí he naʻe fekauʻi mai Ia ʻe he Tamai Hēvaní. ʻOkú Na ʻofeina koe. Pea ʻokú Ne moʻui ʻi he ʻahó ni ke ʻomi ʻa e melinó, ʻamanaki leleí, mo e fiefiá kiate koe.