ʻŪ laʻitā ʻa Ashlee Larsen

ʻOku faingataʻa ke hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi Noaue koeʻuhí ko e fuʻu tokosiʻi ʻa e kāingalotú. ʻOku tokolahi ha kakai ʻoku ʻikai ke nau teitei tui fakalotu. ʻOku fakakaukau ha niʻihi kapau ʻoku ʻi ai haʻo paʻanga, ʻoku ʻikai ke ke fiemaʻu ʻa e tuí. ʻOku tokolahi haʻaku ngaahi kaungāmeʻa naʻe kamata ke nau inu kava mālohi pe fakaʻaongaʻi ʻa e faitoʻo konatapú kei taʻu siʻi. Ko hono moʻoní, ʻokú ne ʻai kei u ongoʻi kehe mei he niʻihi kehé. Ka naʻe hāʻele mai ʻa e ʻAlo ʻo e ʻOtuá ke tokoniʻi kitautolu mo fakahā mai kiate kitautolu ʻa e hala ke tau muimui aí.

Ko Sīsū Kalaisí ko ha sīpinga ia maʻatautolu, pea ʻoku totonu ke tau muimui kiate Ia, ʻo fakahoko e ʻū meʻa naʻá Ne mei faí. ʻOku ou feinga ke tokoniʻi e kakaí ʻi he lahi taha te u lavá. ʻOku ou feinga maʻu pē ke ongoʻi ʻe he kakaí ʻoku talitali lelei kinautolu, tautautefito ʻi he Siasí. ʻOku ou feinga ke fakakau ʻa e tokotaha kotoa pē. Pea ʻoku ou vakai kuo tāpuekina maʻu pē au ʻe he Tamai Hēvaní mo Sīsū Kalaisi.

ʻOku ou ngāue ʻi ha faama. ʻOku ou kosi e musié, tokoni he fanga pulú, faʻu e ʻū ʻā, fakaʻuli palau, taʻataʻaki vao, mo tokoni ʻi he ututaʻú. ʻI he faʻahitaʻu failaú, ʻoku mau ʻauhani ai e ʻuluʻakaú mo tō ha ngaahi tengaʻi ʻakau. ʻI he faʻahitaʻu momokó, ʻoku mau tuʻutuʻu e fefié ki he tafu afí.

ʻI he taimi ʻoku ou fai ai ha meʻa foʻou, ʻoku ʻikai ke u loto ke maumauʻi ia. Ko e fuofua taimi naʻá ku heka ai ʻi ha palaú, naʻá ku manavasiʻi ke fakaʻuli koeʻuhí ʻe lahi ha ngaahi meʻa ʻe fehalaaki. Naʻá ku fakaʻuli atu ʻi he patetá, ʻo ʻai ʻa e kelekelé ki he fuʻu patetá ke ʻoua naʻa lanu mata pea mahakiʻia e patetá. Ka ko e fakaʻuli ʻi he funga patetá ko ha toe founga faingofua ia ke tamateʻi ai kinautolu—hangē kapau ʻokú ke fakaʻuli he funga patetá pe palau kinautolu. Kimuʻa peá u kamatá, naʻá ku fai ha lotu fakalongolongo, pea naʻe lelei ʻaupito.

ʻI he ʻuluaki taʻu naʻá ku ngāue ai ʻi he fāmá, naʻá ku kei feinga pē ke maheni mo e tokotaha kotoa pē. ʻOku mau maʻu meʻatokoni hoʻatā maʻu pē mo e faʻē mo e tamai ʻa ʻeku pule ngāué. ʻOkú ne ngaohi ʻa e meʻakai kotoa pē pea ʻoku haʻu ʻa e tokotaha kotoa pe ʻo kai, pea ʻoku nau ʻoatu foki ʻa e kofí. Naʻa nau ʻeke mai kiate au, “ʻOkú ke fie maʻu kofi?” Naʻá ku talaange, “ʻIkai,” pea naʻa nau ʻeke mai, “Ko e hā hono ʻuhingá?” Naʻá ku talaange, “Sai, koeʻuhí he ʻoku ʻikai ke mau inu kofi ʻi hoku Siasí.” Pea naʻe kamata leva ke nau fieʻilo lahi ange mo ʻeke mai fekauʻaki mo ia. Naʻe teʻeki ai ke nau fanongo fekauʻaki mo e Siasí. Ko ia naʻá ku maʻu ai ʻa e faingamālie ke talanoa kiate kinautolu fekauʻaki mo e meʻa ʻoku ou tui ki aí. Ko ha momeniti fakailifia moʻoni ia! Ka ʻoku ou tui naʻa nau fakaʻapaʻapaʻi lahi ange au.