Digital Lamang: Mga tubag gikan sa usa ka Apostol
Unsay Ipasabot sa Pagtudlo Pinaagi sa Espiritu?
Kita makatudlo aron ang mga tawo gustong mobuhat og mga butang nga motugot kanila nga masinati ang Espiritu Santo sa tibuok kinabuhi.
Gikuha gikan sa usa ka pakigpulong nga gihatag sa usa ka seminar alang sa bag-ong mga presidente sa misyon niadtong Hunyo 20, 1996
Mga tuig ang milabay ang akong minahal, si Kathleen, ug ako napanalanginan nga anaa diha sa usa ka miting diin ang duha ka batan-ong mga misyonaryo nagtudlo sa usa ka lalaki diha sa balay sa iyang silingan. Nangutana sila kon unsa ang gibati sa lalaki sa dihang nagtudlo sila kaniya. Hapit dili sila makapangutana tungod kay nasayod sila nga ang tanan diha sa kwarto nakabati sa gahom sa Espiritu Santo.
Ang ward misyon lider mihangyo sa lalaki sa pagtakda og adlaw sa bunyag. Ang lalaki misupak og diyutay, ug busa ang pipila namo misulay sa pagtabang. Naghisgot kami mahitungod sa unsay gipasabot nga makaangkon sa pakig-uban sa Espiritu Santo. Nangutana siya kon unsa kadto, ug kami miingon nga aron Siya mahimo nga imong kanunay nga kauban.
Tingali tungod kay siya usa man ka enhinyero, gusto niyang mahibaloan kon unsa ang gipasabot sa “kanunay”. Miingon siya, “Nan, mabati ba nimo kini sama niini sa tanang higayon?” Ug bulahan ang kasingkasing sa akong asawa, tungod kay siya miingon nga, “Dili. Mao gyod na ang kinabuhi, adunay mga panahon nga mobati ka niining paagiha, apan dili sa kanunay.” Ganahan siya niana tungod kay siya nasayod nga matinuoron kadto.
Naklaro na nga ang rason sa iyang pagsupak sa pagtakda sa petsa sa pagpabunyag mao nga ang Espiritu Santo misulti kaniya kon unsa gayod ang gipasabot niana, ug siya dili sigurado nga makahimo siya niana kadak-a nga pasalig. Kami miagni kaniya sa pagpakita sa Ginoo nga siya adunay hugot nga pagtuo.
Ang iyang silingan mibunyag kaniya ug ako mitugyan sa gasa sa Espiritu Santo.
Akong Tumong sa Pagtudlo pinaagi sa Espiritu
Kon ako magtudlo, dili ko maghunahuna kon unsa ang akong buhaton aron mabati ang Espiritu, dili gani kon unsa ang mabuhat sa uban aron mobati sa Espiritu. Ang akong tumong mao ang alang sa mga tawo nga mobati niini ug aron gusto kaayong angkonon kini nga sila magbalik-balik ug tudloan pinaagi sa Espiritu sa tibuok nilang kinabuhi.
Dili lang ako nga nagtudlo kanimo o gani naghatag lang nimo og usa ka pagbati nga unta imong maangkon ang Balaang Espiritu niining taknaa, dili usab kini usa lang ka emosyon. Kini usa ka kasinatian uban sa Espiritu Santo. Dayon gusto ko nga inyong buhaton ang mga butang nga motugot ninyo nga makabaton niana nga kasinatian sa tibuok kinabuhi.
Nasayod ko nga kon ang akong higala nga enhinyero mopadayon sa pagbuhat sa unsay iyang gibuhat, maangkon niya ang kahayag ngadto sa laing kahayag nga idugang ngadto kaniya. Dili kadto takna, nga basta lang mahitabo kaniya sa daklit nga mopalig-on kaniya sa Simbahan; kini hangtod sa kahangtoran.
Usa ka Proseso, Dili usa ka Hitabo
Kini usa ka proseso, dili usa ka hitabo, dili usa ka kalit nga pagbati. Kon ang Espiritu Santo mopamatuod ngadto sa usa ka tawo bahin sa kamatuoran sa ebanghelyo, kana mosangpot ngadto sa pagkamasulundon. Ug ang pagkamasulundon mosangpot ngadto sa pagkakabig, ang dako nga kausaban—ang tanan sa maong butang mao ang mga lihok sa Espiritu Santo.
Ang Espiritu Santo partikular nga magpamatuod sa Amahan ug sa Anak, si Jesukristo, ug sa plano nga Sila anaa alang kanato. Kon kana nga pagpamatuod moabot, kini mosangpot ngadto sa usa ka tinguha nga mauyon ngadto sa Ilang kabubut-on. Ug kon ang usa ka tawo mahiuyon ug magmasulundon, nan tungod sa gahom sa Pag-ula ni Jesukristo, ang Espiritu Santo mohimo og laing buhat: kini mao ang tiglimpyo ug tigbalaan.
Ang akong tumong mao nga kamo maaghat aron ganahan nga mobuhat og butang nga magmasulundon, tungod kay ako nakahibalo nga kon kamo mobuhat, ang Pag-ula ni Jesukristo mogana diha sa inyong kinabuhi ug kamo makakaplag og dako nga kausaban nga mahitabo ug kamo mahimong tawo nga kamo gusto.
Himoa Kini nga Yano
Samtang kamo magtudlo ug mopamatuod, himoa kining yano. Ang Espiritu Santo wala nagkinahanglan og dakong tabang—madayan-dayanon nga pinulongan ug gani makapatandog nga mga istorya. Akong gituyo nga wala gihisgotan ang uban sa labing talandogon nga mga bahin sa akong misyonaryo nga kasinatian tungod kay dili ko ganahan nga masobrahan sa pagpanindot. Dili ko gusto nga mahimong emosyonal ang inyong pagbati. Ganahan lang ko nga mosulti ninyo sa kamatuoran sa labing maayo nga akong mahimo. Mao kana ang akong pasabot sa himoa kini nga yano.
Ang Espiritu Santo usa ka tigpamatuod sa kamatuoran. Busa kon ikaw mosulti sa kamatuoran nga klaro ug yano, nan lagmit kaayo nga ang Espiritu Santo makapamatuod ngadto sa kasingkasing sa tawo nga imong gikaistorya. Karon, adunay piho nga mga butang nga makapahimo niini nga mas lagmit nga Siya mopamatuod. Mao nga akong taposon sa ingon niana.
Ang Akong Pagpamatuod
Ako nakasayod sa Dios nga Amahan. Sukad pa sa bata pa ko, ako nakaila Kaniya ug nahigugma Kaniya, ug ako nasayod nga Siya nahigugma kanako, ug Siya nahigugma kaninyo.
Ako nasayod nga si Jesus mao ang Kristo tungod kay akong nabati ang gahom sa Pag-ula nga naglimpyo sa akong kinabuhi.
Ako nasayod nga ang Espiritu Santo mahimong usa ka kompnayon tungod kay Siya nahimo nakong kompanyon. Ako nakahibalo nga usahay kamo makabati og kainit sa inyong dughan nga ingon ka tinuod sama sa bisan unsang pisikal nga pagbati nga maangkon gayod ninyo. Sa laing mga higayon, ako nakahibalo nga miabot kanako ang mga ideya, mga pagbati, mga pagdasig, mga pasidaan. Ako nasayod nga ang Espiritu Santo tinuod ug namulong kanako ug mosulay sa pagpakigsulti kaninyo.
Ako nasayod nga kon kita motuman niadto nga mga pag-aghat, usa ka dako nga kausaban ang posible alang kaninyo ug kanako, alang sa matag tawo, tungod kay si Jesus, ang Kristo, mibayad alang sa mga sala sa matag tawo nga inyong ikahinagbo ug mohigugma kanila ug nag-andam sa dalan. Kon sila makahibalo lang sa kamatuoran ug motuman, sila mahimong makabaton og “kalinaw niining [kinabuhia] ug kinabuhi nga dayon diha sa kalibotan nga umaabot” (Doktrina ug mga Pakigsaad 59:23). Itanyag kana ngadto sa mga anak sa atong Langitnong Amahan.