Ang Inyong Galamiton sa Emosyonal nga Kinaadman
Kini nga mga kahanas ug mga sugyot sa pagpakig-inter-aksiyon sa uban makatabang ninyo sa pag-eskwela, sa misyon, trabaho, ug sa kinabuhi sa kinatibuk-an!
Mga paghulagway pinaagi Sebastian Iwohn
Ang emosyonal nga kinaadman mao ang abilidad sa pagsabot sa mga emosyon sa uban samtang magdumala usab sa inyong kaugalingong emosyon. Kon mas maayo kita niini, mas maayo ang atong pagserbisyo sa Ginoo ug sa uban. Alang sa mga sugyot kon unsaon sa pagpalambo sa inyong emosyonal nga mga kahanas (oo, kinahanglanon gayod kini), padayon sa pagbasa!
Empatiya
Ang empatiya mao ang pagsabot sa mga pagbati sa laing tawo, bisan kon ikaw nakasinati og susamang mga butang nga ilang nasinati. Ang Langitnong Amahan nagsugo kanato sa “paghigugmaay” (Juan 15:12), ug makahimo kita niana pinaagi sa pagpaningkamot sa pagbutang sa atong kaugalingon sa sitwasyon sa laing tawo.
Buhata Kini:
-
Kon dunay tawo nga makig-istorya ninyo, paminawa ilabi na ang pagbati sa tawo. Bisan tuod og dili kamo makasabot sa ilang sitwasyon, posible nga makasabot kamo sa ilang mga pagbati sa kapakyasan, kaguol, o bisan unsa nga ilang gibati.
-
Pangutana sa tawo aron mas makasabot sa ilang sitwasyon. Pugngi ang pagtanyag og mga solusyon.
Linihokan
Ang atong linihokan ug mga ekspresyon sa nawong makasulti sama sa mga pulong! Kon makig-istorya og tawo, importante ang pagpakita nga naminaw ta ug mabination sa unsay ilang gisulti.
Sa mga panahon sa biblia, ang nga sanglahon wala tugoti nga hikapon kay giisip sila nga hugaw. Apan sa dihang giayo ni Jesus ang usa ka sanglahon, mihikap Siya kaniya ug dayon miayo kaniya. Samtang ang pagkaayo usa ka kahibulongan nga milagro, tingali ang sanglahon mibati og mas dako nga gugma kay nasayod nga si Jesus wala mahadlok nga mohikap kaniya (tan-awa sa Marcos 1:40–42).
Buhata Kini:
-
Kon adunay tawo nga naningkamot sa pagpakig-istorya ninyo, ihipos ang bisan unsa nga makabalda sama sa inyong phone, homework, o pangdula nga device.
-
Atubanga ang tawo kon makig-istorya nila, ug tan-aw sa ilang mata.
Adunay Kalisod sa Pagsultihanay
Ang panagbingkil dili kalikayan, apan giklaro sa Manluluwas nga angay natong likayan ang panagbingkil (tan-awa sa 3 Nephi 11:29–30). Malisod ang magpabiling mapailobon atol sa malisod nga panagsultihanay, ilabi na kon ang tawo nga imong kaistorya magsugod sa pagbinata o masuko.
Buhata Kini:
-
Pagmatinahuron. Ang pagpasulabi sa pagpakita nga ikaw ang eksato dili maoy pamaagi sa Manluluwas. Bisan kon imong gibarogan ang kamatuoran, mahimo nimong “[gamiton] ang kaisog, apan dili ang pagpalabi-labi” (Alma 38:12).
-
Undangi kon ang panagsultihanay nanobra sa kainit. Usahay nagkinahanglan lamang kita og gamayng panahon nga mag-inusara aron magpabugnaw ug maghunahuna nga kita lang. Wala kana magpasabot nga “mohunong ka”—imo lang gigahin ang panagsultihanay sa laing panahon, kon kalmado na ang tanan.
Pagpaminaw
Ang pagpaminaw usa ka importante nga baroganan sa ebanghelyo. Maningkamot kita sa pagpaminaw sa Manluluwas, sa Espiritu, sa mga propeta ug apostoles.
Ang pagpaminaw importante usab sa atong inadlaw-adlaw nga mga buluhaton! Si Elder Jeffrey R. Holland nagtudlo: “Mas importante kaysa pagsulti mao ang pagpaminaw. … Kon maminaw kita uban sa gugma, dili na kita kinahanglang maghunahuna kon unsay isulti. Ihatag ra kini kanato—pinaagi sa Espiritu ug pinaagi sa atong mga higala” (Apr. 2001 general conference [Ensign, May 2001, 15]).
Buhata Kini:
-
Likayi ang pagsapaw sa laing tawo samtang nagsulti sila.
-
Samtang nag-istorya ang laing tawo, ayaw pagplano kon unsay sunod ninyo nga isulti (tan-awa sa Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 192).
-
Pangutan-a ang tawo kon gusto lang ba sila nga paminawon o kon ganahan ba sila og tambag.