Ang Gugma Mahimong Madawat ug Mahatag
Ang Dios nahigugma ni Shinnah, ug si Shinnah nahigugma sa Dios.
Si Shinnah B. nga taga-Nairobi, Kenya, nasayod nga gihigugma siya sa Langitnong Amahan. Apan wala gayod siya mahibalo niini hangtod sa milabay nga pipila ka tuig, dihang sa unang higayon nadungog niya ang mahitungod sa Ang Simbahan ni Jesukristo sa mga Santos sa Ulahing mga Adlaw gikan sa iyang iyaan.
“Gitudloan ko sa mga misyonaryo sa mga butang nga wala nako mahibaloi. Gitudloan ko nila ang gihigugma ko sa Langitnong Amahan, ug kon unsaon sa pag-ampo,” miingon si Shinnah. Human sa iyang pagbunyag, pipila ka kasinatian ang nakatabang niya nga mas makasabot sa gugma sa Dios alang kaniya. Karon nagtinguha siya sa pagpakita sa iyang gugma alang sa Langitnong Amahan ug ni Jesukristo.
Mga Paghulagway pinaagi sa Book of Lai
Ang gugma sa Dios alang ni Shinnah
Tabang sa Pag-eskuwela
Nagkalisod si Shinnah sa eskuwelahan. Usa ka adlaw nakig-istorya siya sa iyang presidente sa Young Women mahitungod niini. “Misulti siya nako nga kinahanglan kong modangop sa Langitnong Amahan, tungod kay motabang Siya nako,” miingon si Shinnah. Ug mitabang Siya niya! Human mi-ampo si Shinnah, gibati niya ang mga pag-aghat gikan sa Espiritu mahitungod sa mga butang nga mahimo niyang usbon. “Human niadto, misugod ko sa pagkakita nga miuswag ang akong paningkamot.”
Nahibalo sa Iyang Balaanong Pagkatawo
Ganahan kaayo si Shinnah unang linya sa tema sa Young Women: “Ako usa ka hinigugmang anak nga babaye sa langitnong mga ginikanan, nga adunay diosnong kinaiya ug mahangtorong padulngan.” Miingon siya, “Dili ka kinahanglang mobati nga nag-inusara, kay anaa sa imong tapad ang Langitnong Amahan.”
Kalig-on diha Iyang Balaan nga Tawag
“Sa dihang mipasakop ko sa Simbahan, wala koy kaisog sa pagpakigsulti sa mga tawo,” miingon si Shinnah. “Sa dihang nakadawat ko og calling nga moserbisyo isip presidente sa klase sa Young Women, nasurprisa kaayo ko. Wala pa gayod ko sukad nahimong lider. Kinahanglan kong magpraktis kon unsaon sa pagsulti sa atubangan sa ubang tawo ug unsaon sa pagpakigbahin sa akong pagpamatuod. Dayon usa ka adlaw gitawag ko sa akong bishop ngadto sa iyang opisina. Gisultihan ko niya nga gihigugma kaayo ko ug nga ang Langitnong Amahan molig-on nako sa tanan nga akong buhaton.”
Gugma ni Shinnah alang sa Dios
Pag-adto sa Simbahan
Si Shinnah ug ang iyang manghod nga lalaki, si Acram, mosakay sa bus ug dayon molakaw padulong sa simbahan nga sila ra matag semana. Usahay lisod ang pagbangon og sayo, apan nasayod sila nga mao kadto ang gusto sa Langitnong Amahan nga buhaton nila. “Dihang gibunyagan ko, mihimo ko og desisyon sa pagbalaan sa adlawng Igpapahulay,” miingon si Shinnah.
Pagpili sa Husto
Si Shinnah naningkamot sa pagsunod sa Manluluwas. “Sa wala pa ko mopasakop sa Simbahan, wala ko mahibalo kon si kinsa ko,” miingon siya. “Gidapit ko sa mga higala sa pag-adto sa mga party, ug dili kadto maayong mga sitwasyon nga apilan. Apan karon gipili nako nga dili moadto.”
Pagserbisyo sa Uban
“Ganahan kong motabang sa mga tawo nga nagkinahanglan sa akong tabang,” miingon si Shinnah. “Makatabang ko nila kon mobati sila nga nag-inusara o nagsinati og malisod nga mga panahon. Ang pagkadisipulo ni Jesukristo nagpasabot nga angay kong magsunod sa Iyang mga sugo, mosunod sa Iyang ehemplo, ug mahimong ehemplo ngadto sa uban.”
Ang Panalangin sa Ebanghelyo
Si Shinnah nagkinabuhi sa pamaagi nga iya karong gipuy-an tungod sa iyang gugma sa Langitnong Amahan. “Gusto sa Dios nga maingon ako niana,” miingon siya. “Nahibalon nako kon si kinsa ko. Nalipay ko nga usa ka adlaw niana makabalik ko sa presensiya sa Langitnong Amahan. Ang pagpasakop sa Simbahan nakapausab gayod sa akong kinabuhi.”