Unsa Kaha Kon Ako Nakigbisog sa Garbo o Kasuko?

Dali ko nga masuko. Nakapaminaw ko og daghang mensahe sa komperensiya nga naghisgot mahitungod sa kasuko ug nakat-on nga kon kita masuko, kita kasagaran taas og garbo. Ug ang garbo makapahimulag nato gikan sa Dios. Mao nga ang kasuko usa ka hagit nga gipaningkamotan nakong mabuntog.

Usa ka magtutudlo sa seminary ang nagsulti nako nga aron mabuntog ang kasuko, mahimo kong mosulay sa pagpuli niini og Kristohanong kinaiya. Nakadesisyon ko nga maningkamot nga pulihan ang akong kasuko sa abilidad nga mopasaylo.

Atol sa akong klase sa seminary, usa sa akong mga klasmet milabay og pipila ka kasulatan sa akong tiil. Nasuko ko niana nga higayon, ug gisiyagitan nako siya. Apan dayon nahinumdom ko sa Kristohanong pagpasaylo. Sa dihang nahuman ang klase, miduol ko niya ug gisultihan siya nga nagbasol ko sa pagsiyagit niya. Gipasaylo nako siya, ug dayon nangayo usab siya og pasaylo nako.

Samtang ako nagbansay sa pagtan-aw ni Kristo pinaagi sa pagpasaylo, nakita nako ang akong kaugalingon nga nausab. Naningkamot ko nga tan-awon ang mga butang uban sa mahangtorong panglantaw imbes nga masuko. Kon ako motutok ni Kristo ug motambong sa seminary, kini nakapalig-on sa akong pagpamatuod Kaniya, ug ako makatabang sa uban nga mapalig-on usab ang ilang kaugalingong mga pagpamatuod.