“OK Ra”

Paghulagway pinaagi ni Katelyn Budge

Usa ka Biyernes sa eskwelahan, ang akong suod nga higala nga si Dawson wala didto. Pipila ka bata ang miingon nga nakakita sila og mga ambulansya sa iyang balay, ug nagsugod ko og kabalaka. Wala madugay nianang adlawa, ang among prinsipal miingon nga si Dawson gidala sa ospital kay nagdugo ang sulod sa ulo.

Si Dawson ug ako nahimong managhigala sa dihang ang akong pamilya unang mibalhin gikan sa South Carolina, USA. Siya ang usa sa unang mga tawo nga miingon og hi kanako. Mangita siya og bisan hain nga bag-o nga bata ug ipabati kanila nga sila gihigugma.

Sa gabii human si Dawson gidala sa ospital, samtang ang among pamilya nag-ampo alang kaniya nga mamaayo, nakadungog ko og ligdong, hinagawhaw nga tingog nga misulti og duha ka pulong: “OK Ra.” Sa pagkadungog nako niana, nakahibalo ko nga OK ra si Dawson ug nga mabuhi siya.

Apan dayon nagsugod ko sa paghunahuna, “Unsa kaha kon ang buot ipasabot sa Dios nga OK ra kon si Dawson nia sa yuta o sa langit?”

Ang akong stake nagpahigayon og 24-oras nga pagpuasa alang ni Dawson ug sa iyang pamilya. Dayon nakadawat kami og balita nga namatay na si Dawson.

Wala pa gayod ako sukad adunay lisod nga kasinatian diin gibati nako nga kinahanglan kong mag-ampo. Apan sa dihang namatay si Dawson, ang pag-ampo mao lamang ang bugtong paagi nga mobati ko og kahupayan. Ang Dios mitabang nako nga mobati og kalinaw, ug gibati nako nga tingali Siya adunay ipabuhat ni Dawson.

Nakahibalo ko nga sa bisan unsang higayon nga ako makasinati og lisod nga butang, makaistorya ko sa Dios. Nakatabang nako nga makahibalo nga ang Dios anaa kanunay alang nako ug sa mga tawo sa akong palibot. Gimingaw ko ni Dawson matag adlaw, apan nakahibalo ko nga makita nako siya pag-usab tungod ni Jesukristo.