Digital Lamang: Dali, Sunod Kanako
Kamo Naghimo og Kasaysayan—Ania kon Unsaon Kini sa Pagrekord!
Dili sigurado kon unsaon sa pagsunod sa sugo sa pagtipig og kasaysayan? Ania kon unsaon sa pagsugod.
Hunahunaa kon si Nephi wala pa mituman sa sugo sa pagtipig og usa ka rekord. Unsa kahay dagway sa Basahon ni Mormon nga wala ang 1 Nephi? Unsa kaha ka daghan ang bililhong mga kamatuoran ug makapadasig nga mga istorya nga mataligam-an?
Ang Langitnong Amahan nagsugo sa Iyang katawhan sa “pagsulat og kasaysayan” (Doktrina ug mga Pakigsaad 85:1) tungod kay Siya nasayod sa mga panalangin nga moabot gikan sa pagrekord sa atong mga istorya sa kinabuhi ug espirituhanong mga panabot. Si Elder Neil L. Anderson sa Korum sa Napulog Duha ka Apostoles mipasabot nga ang atong espirituhanong mga kasinatian sama sa “sanag nga mga bato” nga makagiya kanato balik ngadto sa dalan kon kita masaag sa atong dalan.
Sa laing pagkasulti, kon ang inyong pagpamatuod huyang, ang paghunahuna og balik sa inyong labing espirituhanong mga kasinatian makatabang kaninyo nga magpabilin nga lig-on. Apan kon kamo wala gayod magrekord niadto nga mga kasinatian, kuyaw nga inyong makalimtan kini—ug dili makabaton niadtong sanag nga mga bato kon kamo magkinahanglan niini.
Mao gihapon, ang pagsugod (o pagsugod og usab) usa ka batasan mahimong lisod. Ania ang upat ka sugyot sa pagtabang ninyo sa pagpalig-on og batasan sa pagtipig og journal.
1. Pangita og pamaagi nga magsilbe alang kaninyo.
Kon kamo dili gananhan sa pagsulat, ayaw kabalaka! Ang pagsulat og tag-as nga sulat dili lang ang paagi sa pagtipig og usa ka journal. Pag-eksperimento og lainlaing mga estilo aron makakaplag kon unsa ang labing maayo alang ninyo. Ania ang pipila ka ideya:
-
Pagdrowing og komiks sa paghulagway sa inyong adlaw.
-
Magrekord sa audio.
-
Maghimo og scrapbook sa pisikal nga mga handomanan, sama sa mga litrato o mga tiket.
-
I-type ang inyong mga igsusulat sa journal.
-
Paghimo og mga lista, sama sa inyong inadlaw-adlaw nga mga tumong o mga butang nga kamo mapasalamaton.
2. Pagsulat nga walay dalang paghukom.
Ang inyong journal una sa tanan alang kaninyo! Ayaw kaugtas bahin sa paghimo niini nga hingpit.
Kabahin sa walay dalang paghukom nga pag-journal mao ang pagsulat sa bisan unsa nga mosantop sa hunahuna. Kon bation ninyo nga magsulat og usa ka butang apan nabalaka nga laay o sagol-sagol ra kaayo kini, irekord lang kini! Wala kamo masayod kon unsa kaha ang bililhon diha nimo sa kadugayan. Sama sa gisulti ni Presidente Spencer W. Kimball (1895–1985) “Kamo talagsaon, ug adunay mga hitabo sa inyong kasinatian nga mas halangdon ug dalaygon sa ilang kaugalingong paagi kay sa niadtong na-rekord sa ubang kinabuhi.”
Ayaw paghukom sa inyong kaugalingon kon wala ka makasulat og usa ka adlaw—o mas daghan! Sugdi lang og usab kon diin na kamo karon ug isulat ang inyong nataligam-an kon makahimo kamo. OK ra ang magsulat mahitungod sa mga panghitabo nga dili mahan-ay.
3. Paggamit og mga prompt sa pag-journal.
Kon dili kamo sigurado unsa ang isulat, pagsugod sa usa ka pag-aghat. Si Presidente Henry B. Eyring sa Unang Kapangulohan migamit og usa ka prompt aron makatipig sa iyang journal kada adlaw:
“Sa dili pa ako mosulat, ako mamalandong sa pangutana: “Nakita ba nako ang kamot sa Dios nga nagkab-ot aron paghikap kanamo o sa among mga anak o sa among pamilya karon?’… Samtang naghanduraw ko sa nanghitabo sulod nianang adlawa, akong nakita ang timaan sa unsay gibuhat sa Dios alang sa usa kanamo. … Akong nasabtan nga ang pagsulay sa paghinumdom naghatag og higayon sa Dios sa pagpakita kanako unsay Iyang gibuhat.”
Ang pagsugod sa usa ka pangutana makatabang kanimo nga makatutok ug makahatag kanimo og usa ka bag-ong panglantaw, sama sa nahimo niini alang ni Presidente Eyring. Ania ang pipila ka mga jounal prompt nga masulayan:
-
Pagsulat kabahin sa usa ka kinutlo o kasulatan nga makapadasig kaninyo.
-
Pagsulat ngadto sa usa ka tawo sa imong kinabuhi (dili ninyo kinahanglan ipadala kini).
-
Motubag og mga pangutana sama sa “Kon makabiyahe ka sa bisan asang dapit sa kalibotan, asa man ka moadto?” o “Unsa man ang inyong gusto nga mahimo kon kamo modako na?”
-
Ihulagway ang usa ka espirituhanong kasinatian nga mipalig-on sa inyong pagpamatuod.
-
Magsulat kabahin sa butang nga naghatag kanimo og kalipay karon.
4. Maglantaw ngadto sa mga benepisyo.
Nakahibalo ka ba nga ang pag-journal makatabang ninyo sa pagpalambo sa imong panumdoman, makahupay sa kaugtas, ug makadumala sa imong mga emosyon? Kini ang dagkong mga rason aron magsugod og usa ka journal!
Apan ang mga benepisyo mas lawom pa. Ang pagtipig og usa ka journal nakatabang ni Presidente Thomas S Monson (1927-2018) nga mamalandong sa iyang kinabuhi sa lahi nga paagi. Miingon siya:
“Kon atong timbang-timbangon ug hunahunaon ang atong mga panalangin, bisan ang pinakagamay, usahay wala himatikding mga panalangin, anaa ang mas dakong kalipay. …
“… Dili maihap nakong kasinatian dili makonsiderar nga mga talagsaon. … Hinoon, kon pamalandongan, mipabuhong kini ug mipanalangin og mga kinabuhi—dili kay sa ako rang kaugalingon.”
Kon kamo magtipig og usa ka journal, kamo makaugmad og usa ka bag-o nga panglantaw sa inyong kinabuhi. Sa paghandom og balik nga may katuyoan sa pagtan-aw kon sa unsang paagi ang Ginoo naggiya kanimo makatugot nimo sa pag-ila sa mga panalangin ug gani sa mga milagro nga lagmit imong nataligam-an kaniadto. Kamo makabaton og mas maayong pag-akses ngadto sa gamhanang espirituhanon nga mga panumdoman nga makapalig-on kaninyo atol sa lisod nga mga panahon. Kana usa ka panalangin nga dili ninyo ganahan palabyon!