Kinsa ang Dili Dios
5 ka Kamatuoran mahitungod sa atong Langitnong Amahan
Kita makakat-on og daghan mahitungod kon kinsa ang Dios kon kita makasabot kinsa Siya dili mao.
Paghulagway pinaagi ni Camila Grey
Usa sa labing dako nga mga panalangin sa Pagpahiuli mao nga ang Dios napadayag na usab sa Iyang Kaugalingon ug sa Iyang kinaiya isip usa ka mahigugmaong Langitnong Amahan. Apan usahay may mga hunahuna kita o mga ideya mahitungod sa Dios nga dili lang gyod sakto. Kon mahitabo ni, makakat-on ta og daghan kon kinsa ang Dios pinaagi sa pagsabot kon kinsa ang dili Siya.
Ang Dios dili usa ka wala mailhi nga tawo nga naglingkod sa trono, nga layo kaayo.
Siya ang atong Amahan, mas dalaygon kay sa labing maayo nga yutan-ong amahan nga inyong mahunahuna. Bisan kon dili nato mahinumduman ang atong kinabuhi sa wala pa dinhi sa yuta, nakaila Siya sa matag usa kanato ug hingpit nga nakaila. Siya adunay hingpit nga lawas nga adunay unod ug mga bukog, ug sama kita sa Iyang panagway.
Kon naglisod ka sa paghulagway kon sama sa unsa ang Dios, adunay usa ka hingpit nga panig-ingnan: ang Iyang Anak, si Jesukristo. Miingon si Kristo, “Ako ang dalan, ang kamatuoran ug ang kinabuhi: walay makaadto sa Amahan, kon dili moagi kanako. Kon nakaila pa kamo kanako, makaila usab unta kamo sa akong Amahan” (Juan 14:6–7). Sa laing pagkasulti, kon gusto natong mahibaloan kon unsa ang Langitnong Amahan, makakat-on kita kon unsa si Jesukristo! Hingpit silang nagkahiusa sa katuyoan.
Ang Dios dili usa ka tawo nga walay panahon nimo tungod sa pagka-bisi.
Gani, ang pagtabang ninyo nga makabaton og kinabuhing dayon mao ang Iyang buhat ug ang Iyang himaya. Kamo ang Iyang #1 nga gitutokan! Wala Siya magaid sa oras sama kanato. Duol Kaniya pinaagi sa pag-ampo bisan kanus-a. Dayon paminaw sa daghang paagi nga Siya motubag.
Ang Dios dili usa ka tawo nga mopugos ninyo sa pagsunod Kaniya.
Si Elder Dale G. Renlund sa Korum sa Napulog Duha ka Apostoles sa usa ka higayon nagtudlo, “Ang tumong sa atong Langitnong Amahan sa pagkaginikanan dili ang pagpabuhat sa Iyang mga anak sa unsay matarong; kini ang pagpapili sa Iyang mga anak sa pagbuhat sa matarong ug sa kataposan mahimong sama Kaniya.” Siya modapit kaninyo, makigtambag kaninyo, ug motudlo kaninyo sa kamatuoran, apan dili Niya kuhaon ang inyong kabubut-on pinaagi sa pagpugos kaninyo sa pagsunod kaniya.
Ang Dios dili usa ka tawo nga nagtinguha nga makasakop ninyo nga nagbuhat og sayop aron Iya kamong silotan.
Hinuon, sama sa gisulti ni Elder Patrick Kearon sa Korum sa Napulog Duha ka Apostoles, “Ang Dios walay hunong sa pagtinguha kaninyo,” nagpasabot nga dili gayod Siya moundang sa pagpaningkamot sa pagtabang kaninyo nga makabalik ngadto Niya. Nahibalo Siya nga kitang tanan natural lang nga mag-atubang sa mga lisod nga mga butang kon makahimo kita og mga sayop. Mao nga naghatag Siya og usa ka paagi aron kita malimpyo gikan sa sala ug makakaplag og kusog pinaagi sa Pag-ula sa Iyang Anak.
Ang Dios dili usa ka tawo nga naghulat kaninyo nga mahimong “igo na” o “hingpit” sa dili pa Siya mohigugma kaninyo.
Ang Iyang gugma alang kanimo walay kinutuban. Siya nahigugma kaninyo karon mismo, bisan sa inyong pagkadili hingpit! Si Presidente Jeffrey R. Holland, Akting nga Presidente sa Korum sa Napulog Duha ka Apostoles, naghatag kanato og gamhanan nga katin-awan mahitungod niini nga kamatuoran: “‘Duol kon unsa kamo,’ nagsulti nato ang mahigugmaong Amahan sa matag usa kanato, apan midugang Siya, ‘Ayaw pagplano nga magpabilin nga mao ra gihapon kamo.’ Mopahiyom kita ug mohinumdom nga ang Dios determinado sa paghimo kanatong mas labaw pa kay sa atong mahunahuna.” Uban sa hingpit nga gugma ug pagdasig, ang Langitnong Amahan naningkamot sa pagtabang kaninyo nga mahimong sama Kaniya ug makadawat sa tanan nga anaa Kaniya, usa ka lakang sa matag higayon.
Kinsa ANG Dios
Ang labing maayong paagi nga makaila sa inyong Langitnong Amahan mao ang pagpadayon sa pagbaton og mga kasinatian uban Kaniya. Unsaon? Magkat-on mahitungod Kaniya ug sa Iyang Anak gikan sa mga kasulatan ug mga pulong sa buhing mga propeta. Mag-ampo ngadto Kaniya. Maghupot sa Iyang mga sugo. Maggahin og hilom, personal nga oras sa pagsimba Kaniya sa simbahan, sa templo, ug sa laing balaan nga mga dapit. Maghimo ug maghupot og mga pakigsaad uban Kaniya. Motabang Siya kaninyo aron makaila kon si kinsa Siya ug unsa ang Iyang gibati bahin kaninyo.