“Sa unsang paagi akong matagamtam ang mga benepisyo sa teknolohiya samtang maglikay sa negatibo nga mga aspeto?”

“Buhata ang gagmayng mga butang nga makapaduol nato sa Dios, sama sa pagbasa sa mga kasulatan, paglitok og personal nga mga pag-ampo, o pag-ambit sa sakramento. Dapita ang Espiritu nga mouban kaninyo.”

Ella C., 16, Alabama, USA

“Paggahin og panahon sa pagkat-on kon unsaon paggamit sa inyong mga device ug unsa ang epekto niini sa inyong espirituhanong kinabuhi. Pagbantay sa oras sa inyong paggamit sa inyong mga device ug ang mga app nga inyong gigamit. Pagtakda og klaro nga mga utlanan kon unsaon ninyo paggamit ang teknolohiya.”

Martin K., 25, Kananga, Democratic Republic of the Congo

“Ang yawe mao ang pagsunod sa Espiritu. Adunay dili maayo nga mga paagi sa paggamit sa teknolohiya, apan aduna usab maayong mga paagi sa paggamit niini. Usa sa mga paagi nga akong gigamit ang teknolohiya sa maayo kay diha sa akong calling isip presidente sa korum sa mga deacon. Mokonektar ko sa ubang mga deacon pinaagi sa text o pagtawag sa telepono.”

Hyrum M., 13, Georgia, USA

“Kinahanglan atong pahimuslan ang teknolohiya sa pagpakigbahin sa kahayag sa Manluluwas ngadto sa tanan. Ang pagkahimong disipulo ni Jesukristo nagpasabot nga mahimong sama Kaniya, mao nga kinahanglan aduna kitay pagtuo ug mosubay sa dalan sa kahayag.”

Julia B., Pernambuco, Brazil

“Nagtakda ko og tukma nga tumong ug mag-ampo sa dili pa mogamit og teknolohiya aron dili ko mabalda. Makahuman ko og importanteng mga butang samtang naggamit sa teknolohiya, lakip na ang pagpakigbahin sa ebanghelyo, nga dili mawagtang ang akong tumong.”

Elijah U., 20, Lagos, Nigeria