Nasobrahan sa Bidyo nga Dula

Usa ka adlaw atol sa klase, may klasmeyt ko nga nanawag. Nakabantay mi nga nadula na namo ang akong 100 ka dula, ug ganahan mi og laing bag-o. Apan limitado ang memory sa kompyuter sa trabaho sa akong papa. Dihang gisulayan namo sa pag-install og bag-ong dula, nadaot ang kompyuter.

Nalisang ko. Nahadlok ko nga mahibaloan sa akong mga ginikanan. Akong gitagsa-tagsa pagtangtang ang mga piyesa sa kompyuter apan walay nakitang problema, mao nga akong gibalik og taod ang tanan ug gisulayan kini sa pagpaandar. Nahibalo ko nga kinahanglan nakong limpyohan ang kompyuter, mao nga migahin ko og daghang oras sa pagtagsa-tagsa og tangtang sa mga dula—apan walay nausab.

Sa kadugayan nianang adlawa, ang akong papa nagkinahanglan nga magtrabaho gamit ang iyang kompyuter. Nakulbaan gyod ko. Pagkataud-taod, gitawag ko niya. Didto ang kompyuter sa iyang atubangan. Naguba.

Wala na ko makapamakak sa akong papa. Mitug-an ko sa akong gibuhat.

Pagkasunod adlaw, miadto ang akong papa sa trabaho dala ang guba nga kompyuter. Imbis nga basolon ko niya, siya ang nanubag sa akong binuhatan. Wala siyay sala niadtong butanga, apan gipili niya nga mawad-an sa pagsalig sa iyang amo ug miangkon sa tanang pagbasol bisan wala ko mohangyo niya nga buhaton kadto. Ug nakapasakit kadto sa akong kasingkasing.

Naulaw kaayo ko sa akong nabuhat nga nagsugod ko sa mental nga pagpanlimbasog. Dili ko gusto nga momata. Wala koy kaisog nga makig-istorya sa akong mga ginikanan.

Apan nianang Sabado, gipukaw ko sa akong amahan mga 4:30 sa buntag, nagdapit nako nga modagan mi. Samtang nagdagan, miingon siya nga gihangyo ko niya nga mokuyog niya aron makakat-on ko og usa ka butang nga dili gyod niya gusto nga akong makalimtan: kalig-on. Misulti siya nako nga ang kalig-on mao ang kapasidad nga makaagwanta o makabawi dayon gikan sa mga kalisod, sa pagsulbad sa problema, ug human sa pagsulbad niini, mobarog ug mopadayon sa unahan.

Tungod sa ehemplo sa akong papa sa trabaho ug sa unsay iyang gitudlo nako mahitungod sa kalig-on, nakabaton ko og gamayng panabot kon kinsa si Jesukristo ug unsay Iyang gihimo para nako. Gihatagan ko ni Kristo og kahigayonan nga mapasaylo sa akong mga sala. Nakat-onan nako nga ang kapasayloan usa ka gasa ug ang gilaoman sa Manluluwas nako mao ang pagkahimong lig-on diha sa dalan sa pagkamatarong.

Human niadto nga pagdagan, naghinayhinay ko sa pag-usab sa akong pangisip ug mga kinaiya. Nakaamgo ko nga adunay mas labaw pa nga katuyoan sa kinabuhi kaysa magdula lang sa tibuok adlaw.

Ang misunod nga tulo ka tuig mahagiton samtang nagpalambo ko sa akong bag-ong mga kinaiya, apan pinaagi sa tabang sa akong mga ginikanan, hinayhinay nakong natutukan ang akong kaugmaon. Nadiskobrehan usab nako nga duna koy talento sa komunikasyon ug malingaw sa pagtabang sa uban.

Imbis nga akong gamiton ang tanan nakong panahon sa mga dula sa bidyo, nagsugod ko sa pagkat-on mahitungod sa pagkahimong negosyante. Nagsugod ko og Instagram nga channel ug YouTube page, ug karon nagtudlo ko sa mga tawo kon unsay akong nakat-onan mahitungod sa pagkahimong malamposon sa panalapi ug pagbutang og puhonan sa atong labing maayo nga pamuhonan—ang atong kaugalingon.

Pinaagi niining tanan nga mga kasinatian, nakita nako ang kamot sa Ginoo sa daghan higayon, ilabi na sa pagkaplag og kapasayloan pinaagi sa sakripisyo sa akong Manluluwas. Adunay mga panahon nga mapakyas ko, apan uban sa kalig-on ug sa Pag-ula ni Jesukristo, mas mahimo ko nga sama Niya.