Mahadlok Ko sa mga Batang Babaye Kaniadto

Pila ka tuig ang milabay, dili ko makig-istorya ni bisan kinsa gawas sa akong pamilya, sa akong lima o unom ka suod nga mga higala, ug tingali sa pipila ka mga kaila. Walay usa sa akong mga higala mga babaye, ug ang akong mga higala parehas kaayo nako. Dili ko makig-istorya sa mga babaye tungod kay mahadlok ko nila. Dili ko gustong makig-istorya ni bisan kinsa nga lahi nako. Dili ko kamao mopadayon sa usa ka panag-istorya kon dili parehas ang among mga interes.

Nianang ting-init, miadto ko sa akong unang komperensiya sa FSY. Naningkamot ko nga dili makig-istorya sa mga babaye sa akong pundok sulod sa unang duha ka adlaw tungod kay dili ko makamao kon unsaon. Apan sa kataposan sila misugod sa pakig-istorya nako ug makighigala nako, ug nakaamgo ko nga buotan sila.

Sa sinugdanan sa sunod nakong tuig tingklase, ako “napugos-sa kaedad” ngadto sa pagsayaw sa akong unang sayaw sa eskwelahan. Gihangyo nako ang usa ka batang babaye nga murag akong gikaistorya sa wala pa ang klase. Tingali wala pa kaayo siya makaila nako, apan miingon siya nga mouban siya nako. Kini nakapugos nako sa pagpakig-istorya kaniya. Sa pagkatinuod nalingaw ko sa grupo nga panag-date ug nahimong maayo nga higala sa babaye nga akong gikauban.

Human niana, nakaamgo ko nga ang mga batang babaye mga normal lang usab nga mga tawo. Ang tanan nga lahi kanako laing tawo lang, parehas nako. Kitang tanan mga anak sa Dios, busa nganong akong likayan ang usa ka tawo tungod sa ilang lahi nga mga panagway, o mga personalidad, o interes?

Karon, ang pipila sa akong suod nga mga higala mga babaye, ug daghan sa akong mga lalaki nga higala lahi kaayo gikan ni bisan kinsa nga nagtuo ko nga akong ikauban sa duha ka tuig.

Hinumdomi, ang tanan lahi gikan nimo, ug kana usa ka maayo nga butang. Ayaw lang og tutoki kadtong mga kalahian, apan sulayi nga makighigala sa ubang mga tawo nga naglibot kanimo.