Buhaton na lang ba nako unsay natural para nako? Mao ba kana ang gusto sa Dios nga akong buhaton?

Pipila ka nag-unang mga kamatuoran nga makatabang sa pagtubang niini nga pangutana.

Ang Dios mao ang Amahan sa inyong espiritu. Wala siya “magmuna” kaninyo gikan sa wala. Gipanganak kamo nga adunay balaanon nga kinaiya—ang potensiyal nga mahimong sama Kaniya. Kamo “usab diha na sa sinugdanan uban sa Dios. Ang kinaadman, o ang kahayag sa kamatuoran, wala malalang o mabuhat, ni dili gayod mahimo.” (Doktrina ug mga Pakigsaad 93:29). Sa wala pa kining kinabuhia, kamo usab adunay kabubut-on, ug mihimo kamo og mga pagpili.

Ang inyong pisikal nga lawas usa ka gasa gikan sa Dios ug gikinahanglan aron makasinati og mortal nga kinabuhi ug mas mahimong sama Kaninya. Tungod sa Pagkapukan, matag tawo makasinati og kahuyang, lakip sa ubang “kinaiyanhong” mga hilig nga supak sa mga sugo sa Dios (tan-awa sa Mosiah 3:19). Apan atong tinguhaon nga “makapugong sa tanan [natong] mainit nga mga pagbati,” (Alma 38:12), magpaubos sa atong kaugalingon, maningkamot sa pagsunod sa Dios, maghinulsol kon wala kita makasunod, ug magtinguha og kalig-on ug tabang pinaagi ni Jesukristo ug sa Iyang Pag-ula. Makasinati kita og kahuyang niining kinabuhia aron kita magmapainubsanon ug modangop sa Dios (tan-awa sa Ether 12:27).

Atol niining kinabuhia, ang inyong paggamit sa kabubut-on mahinungdanon. Pilia ang Dios ug ang Iyang mga paagi. Pilia ang paglambo. Pilia ang kamaya.