Ang Inyong Pagpangita sa Kamatuoran
Aron sa paggiya ug pagpanalangin kaninyo, ang Langitnong Amahan mahigugmaong nagpadayag sa mga kamatuoran bahin sa mga butang kon unsa sila karon, kaniadto, ug sa umaabot.
Daghang kahibalo ang anaa karon kaysa kaniadto. Kaniadto, kon gusto nimong mahibaloan ang usa ka butang, kinahanglan kang moadto sa librarya ug pangitaon kini. Karon, ang internet ug madaladala nga mga device naghatag og sayon nga paagi sa pag-angkon sa hapit walay kinutoban nga kasayoran nga inyong makaplagan hapit dihadiha dayon.
Malipay ang Ginoo kon mohimo kamo og maalamon nga paggamit niini nga mga kapanguhaan, apan sa inyong pagpangita sa kamatuoran hinumdomi ang pagtan-aw ngadto sa Diyos, nga nasayod sa tanang mga butang (tan-awa sa Doktrina ug mga Pakigsaad 88 41). Gikan Kaniya, makakaplag kamo og mahangtorong kamatuoran, nga mao ang kahibalo sa “mga butang kon unsa sila karon, ug unsa sila kaniadto, ug unsa sila sa umaabot;” (Doktrina ug mga Pakigsaad 93:24).
Sa mga kamatuoran nga gihatag sa Dios kaninyo, ang usa sa labing mahinungdanon mao nga Siya ang inyong Langitnong Amahan. Nakaila Siya ug nahigugma kaninyo sa hingpit. Ang pagsabot ug pagdawat niining mahangtoron nga kamatuoran naghatag kaninyo og direksiyon ug mga panalangin sa inyong kinabuhi sa wala pa dinhi sa yuta ug magpadayon sa pagbuhat niini karon ug hangtod sa kahangtoran.
Nagkauban Kamo sa Langitnong Amahan sa Sinugdanan
Ang kamatuoran sa mga butang “kon unsa sila kaniadto” (Doktrina ug mga Pakigsaad 93:24) nagsulti kanato nga gikauban kita sa atong Langitnong Amahan sa wala pa magsugod ang kalibotan (tan-awa sa Doktrina ug mga Pakigsaad 93:21, 23).
Sa wala pa ang atong kinabuhi sa yuta, gipresenta sa Langitnong Amahan ang Iyang plano sa kalipay. Si Propeta Joseph Smith mitudlo nga ang plano sa Dios mao ang pagtugyan kanato og “kahigayonan sa pag-uswag sama sa iyang kaugalingon [ug] … mahimo silang mahimaya uban sa iyang kaugalingon.” Ang Iyang buhat ug himaya mao “ang pagpahinabo sa pagka-imortal ug kinabuhi nga dayon sa tawo” (Moises 1:39).
Atong gigamit ang atong kabubut-on sa pagsunod sa plano sa Langitnong Amahan. Napanalanginan kita nga matawo niini nga kinabuhi diin makapadayon kita sa pag-angkon og kabubut-on ug makasinati og mortalidad, makakat-on, ug mouswag ngadto sa kinabuhing dayon.
Atol sa inyong mortal nga panaw, makasinati kamo og mga hagit ug mga kapakyasan. Apan dili kinahanglan nga magsagubang kamo sa mga kalisod sa kinabuhi nga mag-inusara. Ang inyong Langitnong Amahan mopanalangin kaninyo, mobayaw kaninyo, ug mohupay kaninyo. (tan-awa sa 2 Mga Taga-Corinto 1:3). Isip mahinungdanong kabahin sa Iyang plano, nag-andam ang Langitnong Amahan og paagi alang kaninyo aron makabalik ngadto Kaniya.
Napakita na Kaninyo ang Dalan ngadto sa Inyong Amahan
Ang kamatuoran sa “mga butang kon unsa gayod ang ilang tinuod nga kinaiyahan karon” klaro (Jacob 4:13): dili nato makab-ot ang atong hingpit nga potensiyal isip mga anak sa atong Langitnong Amahan nga mag-inusara. Tungod niini nga rason, ug tungod sa Iyang gugma alang kanato, gipadala sa Dios ang Iyang Bugtong nga Anak, si Jesukristo, aron motultol kanato sa agianan sa pagkaplag og kalipay, kahulogan, ug kamaya niini nga kinabuhi ug sa kahangtoran (tan-awa sa Juan 3:16; Doktrina ug mga Pakigsaad 93:11).
Ang yutan-ong kasinatian sa Manluluwas mahinungdanon. Nagtubo Siya hangtod nga Siya “nakadawat sa usa ka kahingpitan sa himaya sa Amahan” ug “tanang gahom, sa langit ug sa yuta” (tan-awa sa Doktrina ug mga Pakigsaad 93:16–17). Nagtudlo ang Manluluwas nga kita “makaadto [kamo] sa Amahan pinaagi sa akong ngalan, ug sa tukmang panahon makadawat sa iyang kahingpitan.”
Miingon Siya: “Kay kon inyong tumanon ang akong mga sugo makadawat kamo sa iyang kahingpitan, ug mahimaya ngari kanako sama nga anaa ako sa Amahan; busa, sultihan ko kamo, makadawat kamo og grasya alang sa grasya.” (Doktrina ug mga Pakigsaad 93:19–20).
Didto sa Tanaman sa Getsemani ug didto sa krus, gipas-an ni Jesukristo mismo sa Iyang Kaugalingon ang mga sala sa kalibotan ug giantos ang tanang kagul-anan ug “mga sakit ug mga kasakit, ug mga pagtintal sa matag matang” (Alma 7:11). Kini “mihimo [Kaniya], … ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit” (Doktrina ug mga Pakigsaad 19:18). Pinaagi lamang ni Jesukristo ug sa Iyang Pag-ula ug Pagkabanhaw ang kaluwasan ug kahimayaan mahimong posible.
Pinaagi sa grasya ug sa maulaong sakripisyo sa Manluluwas, mahimo kamong molambo hangtod nga kamo usa ka adlaw niana makadawat og kahingpitan ug mahimong hingpit. Samtang mosunod kamo sa panig-ingnan sa Manluluwas ug mosunod sa Iyang mga sugo, modala Siya ug mogiya kaninyo ngadto sa mahimayaon nga presensiya sa atong Amahan sa Langit.
Dawaton ba Ninyo ang Iyang Gasa?
Taliwala sa mga kamatuoran sa “mga butang kon unsa gayod ang ilang tinuod nga kinaiyahan sa umaabot” (Jacob 4:13), mahibaloan nato nga ang atong kasinatian sa kahangtoran mag-agad sa atong pagpili nga mosunod ni Jesukristo ug modawat sa mga gasa nga Iyang gitanyag.
Ang mga kasulatan nagtudlo nga kita “makatagamtam nianang [kita] andam nga modawat” (Doktrina ug mga Pakigsaad 88:32). Ang akong presidente sa misyon, si Elder Marion D. Hanks (1921-2011), nagtudlo sa iyang mga misyonaryo nga ang pagpangayo sa unsay andam natong dawaton ug tagamtamon maoy usa ka paagi sa paghukom kon asa na kita sa atong espirituwal nga panaw. “Kay unsay kaayohan nga makuha sa usa ka tawo kon ihatag ang gasa kaniya, ug dili siya modawat sa gasa?” (Doktrina ug mga Pakigsaad 88:33).
Samtang atong dawaton ang mga gasa sa Manluluwas pinaagi sa matinud-anong pagtinghua ug pagsunod Kaniya, maglipay kita diha sa paglaom sa kinabuhing dayon ug “diha kaniya nga mao ang tighatag [niana] nga gasa” (Doktrina ug mga Pakigsaad 88:33). Kining gasa nga gihatag sa mahigugmaon kaayo nga paagi mao ang “labing mahinungdanon sa tanang gasa sa Dios” (Doktrina ug mga Pakigsaad 14:7).
Ang Dios mao ang inyong Langitnong Amahan. Nakaila Siya ug nahigugma kaninyo. Samtang modangop kamo Kaninya sa inyong pagpangita sa kamatuoran, makadawat kamo og kinaadman, kaalam, kamatuoran, hiyas, ug kahayag (tan-awa sa Doktrina ug mga Pakigsaad 88:40) hangtod “ang adlaw moabot nga kamo makasabot gani sa Dios, kay gibuhi diha kaniya ug pinaagi kaniya.” (Doktrina ug mga Pakigsaad 88:49).
Mahimo kining labing mahimayaon ug malipayon nga adlaw.