Amani katika Sala

“Juu zaidi, Baba!” Mary alisema kwa sauti kali.

Baba alicheka na aliipa bembea ile msukumo mwingine mkubwa. Bembea ilifungwa kwenye mti mkubwa ambao uliegemea juu ya Mto Mississippi. Mary alipenda upepo usoni mwake na msisimko tumboni mwake alipokuwa akibembea juu ya maji na kurudi.

“Mimi ninafuata!” Elizabeth alisema.

Mary aliruka kutoka kwenye bembea ili kumruhusu dada yake apate zamu.

Familia ya Mary iliishi katika Nauvoo. Wazazi wake walikuwa wamejiunga na Kanisa miaka michache iliyopita, na waliuza vyote walivyopaswa ili kuhamia huko ili kujiunga na Watakatifu wengine.

Nauvoo ilikuwa mahali pa shughuli nyingi sana. Watu wapya waliwasili kila siku. Kujenga mji mpya kulihitaji kazi kwa bidii, na hata watoto walisaidia. Kusaidia kulimfanya Mary ajisikia kuwa amekua na muhimu. Wakati mwingine alisaidia kwa kumletea Baba chakula chake cha mchana alipokuwa akifanya kazi kwenye hekalu jipya.

Siku ya Jumapili, Mary alivaa vazi lake bora zaidi na kuwasaidia kaka zake na dada zake kuwa tayari kwa ajili ya kanisa. Kila mtu alikusanyika chini ya miti kumsikiliza Nabii Joseph Smith akifundisha kuhusu Yesu Kristo. Mary alipenda kujifunza kuhusu jinsi ambavyo wangeweza kuishi na Baba wa Mbinguni tena siku moja. Nabii alikuwa ameona na kusikia mambo mengi sana ya kupendeza.

Ingawa, watu wengine hawakumpenda Nabii, hata hivyo. Mary alikuwa amesikia hadithi kuhusu watu ambao walitaka kumuumiza nabii.

Usiku mmoja wa majira ya kiangazi, Mary alikuwa akimsaidia Mama kusafisha nyumba baada ya chakula cha jioni. Kisha Baba akarudi nyumbani. Alikuwa na machozi machoni mwake.

“Nini kimetokea?” Mama aliuliza.

“Nabii Joseph ameuawa,” Baba alisema.

Mama alianza kulia pia. “Ni kwa jinsi gani Kanisa linaweza kuendelea bila yeye?” aliuliza.

Mary aliona huzuni sana na hofu. Alijua Nabii alikuwa mtumishi wa Mungu aliyechaguliwa. Ni kwa jinsi gani Baba wa Mbinguni aliruhusu hili litokee?

Alianza kulia na kukimbia nje ya nyumba hadi kwenye bustani. Baada ya kuanguka kwenye magoti karibu na vichaka, Mary alianza kusali. “Ee, Baba wa Mbinguni, tutafanya nini? Nabii wetu ameuawa.” Machozi yalitiririka usoni mwake.

Kisha sauti ya upole ikaja akilini mwa Mary. Nitamwinua nabii mwingine kuongoza watu wangu.

Hisia za amani, furaha ziliujaza moyo wake. Alipangusa macho yake na kukimbia kurudi nyumbani haraka kadiri alivyoweza.

“Mama! Baba!” Mary alisema. “Nimesali, na Baba wa Mbinguni akanijibu.” Aliwaambia kuhusu sauti na hisia za amani alizohisi.

Wakati Mama na Baba walipomkumbatia, Mary alijua mambo yangekuwa sawa. Bado alikuwa na huzuni, na alijua kungekuwa na nyakati ngumu mbele yao. Lakini Baba wa Mbinguni angeendelea kuwaongoza na kuwasaidia.

Vielelezo na Kristin Sorra