“Uchaguzi wa Logan kuhusu Zaka,” Rafiki, Novemba 2025, 8–9.

Uchaguzi wa Logan kuhusu Zaka

Na Alissa Holyoak

“Je, uko tayari kutii amri ya kulipa zaka?” Mama aliuliza.

Hadithi ya kweli kutoka Marekani.

Mvulana akionekana kutokuwa na uhakika kwenye mkono akiwa ameshikilia noti za dola

Wakati Logan alipokuwa na miaka mitano, alifikiri zaka ilikuwa wazo la kutisha!

Wakati wa jioni ya nyumbani, Mama aliweka dola 10 mezani. “Acha tujifanye unalipwa dola 10.”

Logan alitabasamu. “SAWA!”

“Zaka ni asilimia 10. Kwa hivyo ungetoa dola moja kwa Kanisa la Bwana.” Mama aliiondoa dola moja mbali na rundo lile.

Logan akanuna. “Toa dola moja? Lakini nataka kuwa na pesa zangu zote!”

“Labda utahisi tofauti utakapokuwa mkubwa,” Mama alisema. “Baba wa Mbinguni ametubariki na kila kitu. Kulipa zaka ni njia mojawapo tunayomwonyesha Mungu kuwa tunampenda na tuna shukrani kwa ajili ya baraka Zake.”

Mvulana akiwa amevalia nguo za kanisani akitazama hekalu

Logan alipokuwa na miaka sita, walimu wake wa Msingi walimfundisha kwamba zaka hutumika kujenga mahekalu. Logan alipenda mahekalu. Kwa hiyo labda kulipa zaka ilikuwa wazo zuri kwa baadhi ya watu. Lakini siyo kwake yeye.

Logan alipokuwa na umri wa miaka saba, aligundua kwamba watu walitabasamu wakati walipokabidhi bahasha zao za zaka kwa askofu. Je, inawezekana, kutoa pesa zako kweli kunaweza kukufanya uwe na furaha?

Alipokuwa na umri wa miaka minane, Mama alimuuliza, “Logan, kwa nini ulichagua kubatizwa?”

Hilo lilikuwa swali rahisi! “Kushika amri na kumfuata Yesu Kristo,” Logan alisema.

“Kwa hiyo uko tayari kutii amri ya kulipa zaka?” Mama aliuliza. “Hiyo ni juu yako.”

Moyo wa Logan ulipoa. Hilo halikuwa swali rahisi. Bado hakutaka kutoa pesa zake. Lakini alitaka kushika amri. Logan alifikiria juu ya mahekalu na watu wenye kutabasamu waliolipa zaka. Kisha akavuta pumzi ndefu na kusema, “Ndiyo.”

“Hilo lingekuwa chaguo zuri!” Mama alisema.

Logan alihisi vizuri zaidi. “Ninajua kutii amri ni muhimu zaidi kuliko kutunza pesa zangu zote.”

Mvulana mwenye kutabasamu katika nguo za kanisani akiwa ameshikilia bahasha ya zaka

Siku ya Jumapili, alipokabidhi bahasha yake ya kwanza ya zaka kwa askofu, Logan aligundua alikuwa akitabasamu. Alihisi furaha! Bado hakuelewa kila kitu kuhusu zaka. Lakini alimpenda Mungu, na alijua Mungu angembariki kwa kutii amri.