សកម្មភាព ចូរមកតាមខ្ញុំ
ថ្ងៃទី៣០ ខែមិថុនា–ថ្ងៃទី៦ ខែកក្កដា ៖ គោលលទ្ធិ និងសេចក្ដីសញ្ញា ៧១–៧៥
បេះដូងនៃការបម្រើ
ព្រះហៅប៊ីស្សព និងប្រធានសាខាឲ្យជួយបម្រើមនុស្សនៅក្នុងវួដ ឬសាខារបស់ពួកគាត់ ( សូមមើល គោលលទ្ធិ និងសេចក្ដីសញ្ញា ៧២:២ ) ។ សូមកាត់រូបបេះដូងក្រដាស ហើយសរសេរអ្វីដែលប្អូនចូលចិត្តអំពីប៊ីស្សព ឬប្រធានសាខារបស់ប្អូននៅលើក្រដាសនីមួយៗ ។ សូមបិតរូបបេះដូងទាំងនេះលើទ្វារការិយាល័យ ឬទ្វារផ្ទះរបស់ពួកគាត់ ។
ថ្ងៃទី៧–១៣ ខែកក្កដា ៖ គោលលទ្ធិ និងសេចក្ដីសញ្ញា ៧៦
ព្រះអាទិត្យសេឡេស្ទាល
នៅថ្ងៃណាមួយ យើងអាចរស់នៅក្នុងនគរសេឡេស្ទាលជាមួយព្រះវរបិតាសួគ៌ ព្រះយេស៊ូវគ្រីស្ទ និងក្រុមគ្រួសាររបស់យើង ( សូមមើល គោលលទ្ធិ និងសេចក្ដីសញ្ញា ៧៦:៦២, ៧០, ៩២ ) ។ ព្រះគម្ពីរប្រៀបធៀបនគរសេឡេស្ទាល ទៅនឹងព្រះអាទិត្យ ។ សូមប្រើចានក្រដាស ឬក្រដាសមួយសន្លឹកដើម្បីធ្វើរូបព្រះអាទិត្យ ។ សូមកាត់ក្រដាសជារាងត្រីកោណសម្រាប់ធ្វើជាកាំរស្មីព្រះអាទិត្យ ហើយបិតកាវជុំវិញរង្វង់ ។ សូមនិយាយអំពីអ្វីដែលប្អូនអាចធ្វើបាននៅពេលឥឡូវនេះ ដើម្បីរៀបចំខ្លួនទៅរស់នៅជាមួយព្រះវរបិតាសួគ៌ និងព្រះយេស៊ូវគ្រីស្ទនៅថ្ងៃណាមួយ ។
ថ្ងៃទី១៤–២០ ខែកក្កដា ៖ គោលលទ្ធិ និងសេចក្ដីសញ្ញា ៧៧–៨០
ធ្វើកាយវិការត្រាប់តាមសត្វ
នៅក្រោមការដឹកនាំរបស់ព្រះ ព្រះយេស៊ូវគ្រីស្ទបានបង្កើតសត្វសព្វសារពើនៅលើផែនដី ( សូមមើល គោលលទ្ធិ និងសេចក្ដីសញ្ញា ៧៧:២ ) ។ សូមលេងល្បែងទាយឈ្មោះសត្វ ! មនុស្សម្នាក់ធ្វើត្រាប់តាមសត្វជាក់លាក់មួយ ។ អ្នកគ្រប់គ្នាផ្សេងទៀតព្យាយាមទាយថាតើជាសត្វអ្វី ។ នៅពេលដែលប្អូនទាយត្រូវ សូមនិយាយអ្វីមួយដែលប្អូនចូលចិត្តអំពីសត្វនោះ ។
ថ្ងៃទី២១–២៧ ខែកក្កដា ៖ គោលលទ្ធិ និងសេចក្ដីសញ្ញា ៨១–៨៣
ច្រៀង និងអធិស្ឋាន
ព្រះវរបិតាសួគ៌តែងតែស្តាប់ការអធិស្ឋានរបស់យើងជានិច្ច ( សូមមើល គោលលទ្ធិ និងសេចក្ដីសញ្ញា ៨១:៣ ) ។ សូមច្រៀងបទ « ការអធិស្ឋានរបស់កុមារ » ( សៀវភៅចម្រៀងកុមារ ទំព័រ ៦ ) ជាមួយគ្រួសាររបស់អ្នក ។ សូមចាប់ផ្តើមច្រៀងដោយមនុស្សតែម្នាក់ប៉ុណ្ណោះ ។ បន្ទាប់មក មនុស្សគ្រប់គ្នាចូលច្រៀងរួមគ្នាម្ដងមួយៗ ។ បន្ទាប់ពីប្អូនច្រៀងហើយ សូមនិយាយអំពីអ្វីដែលប្អូនអាចអធិស្ឋានជាគ្រួសារបាន ។
រូបថតដោយ គ្រីស្ទីណា ស្ម៊ីធ