ពិភពលោកដ៏ស្រស់ស្អាតរបស់យើង

ដោយប៊ីស្សព ជែរលដ៍ ឃូសេ

ប៊ីស្សពជាអធិបតី

បានដកស្រង់ពី « ការកាន់កាប់ត្រួតត្រានៅលើផែនដីរបស់យើង » លីអាហូណា ខែវិច្ឆិកា ឆ្នាំ២០២២ ទំព័រ៥៧–៥៩ ។

រូបភាពធ្វើឡើងពីចម្រៀកក្រដាសរហែកនៃសួនច្បារដែលមានស្ពាន និងស្រះទឹក

ភរិយារបស់ខ្ញុំ និងខ្ញុំបានយកចៅៗរបស់យើងពីរបីនាក់ទៅលេងសួនច្បារដ៏អស្ចារ្យមួយនៅប្រទេសបារាំង ។ យើងកោតសរសើរដល់រោងផ្កាដ៏ស្រស់ស្អាត ផ្កាព្រលិត និងស្រះទឹក ។

សួនច្បារនេះធ្លាប់ជាកម្មសិទ្ធិរបស់បុរសម្នាក់ឈ្មោះ ក្លូត ម៉ូណេ ។ គាត់ជាវិចិត្រករដ៏អស្ចារ្យម្នាក់ ។ គាត់បានថែសួនច្បាររបស់គាត់យ៉ាងប្រុងប្រយ័ត្នអស់រយៈពេល ៤០ ឆ្នាំ ។ គាត់បានគូរគំនូររាប់រយសន្លឹកដែលត្រូវបានបំផុសគំនិតដោយសួនច្បាររបស់គាត់ ។

ភាពស្រស់ស្អាតនៃធម្មជាតិអាចជួយយើងឲ្យមានការដឹងគុណចំពោះព្រះវរបិតាសួគ៌របស់យើង និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ។ ពួកទ្រង់បានបង្កើតផែនដីដ៏ស្រស់ស្អាតនេះមកជាមួយនឹងភ្នំ ទឹកអូរ រុក្ខជាតិ និងសត្វពាហនៈជាច្រើន ។

ការបង្កបង្កើតដ៏អស្ចារ្យទាំងនេះបង្ហាញថា ព្រះស្រឡាញ់យើងខ្លាំងប៉ុនណា ។ ទោះជាយ៉ាងណា ទ្រង់ក៏ភ្ជាប់មកជាមួយនូវកាតព្វកិច្ច និងការទទួលខុសត្រូវផងដែរ ។ ការណ៍នេះត្រូវបានគេហៅថា ការកាន់កាប់ត្រួតត្រា ។ យើងត្រូវថែរក្សាអ្វីៗគ្រប់យ៉ាងដែលព្រះបានបង្កបង្កើតសម្រាប់យើង ។

ព្រះវរបិតាសួគ៌របស់យើងក៏អញ្ជើញយើងឲ្យចូលរួមក្នុងការងារច្នៃប្រតិដ្ឋរបស់ទ្រង់ផងដែរ ។ យើងអាចបង្កើតជាសិល្បៈ តន្ត្រី និងអ្វីៗជាច្រើនផ្សេងទៀតដើម្បីបំភ្លឺជីវិតរបស់យើង និងផ្ដល់ពរជ័យដល់អ្នកដទៃ ។

ព្រះសន្យាថានឹងប្រទានពរជ័យដ៏អស្ចារ្យ នៅពេលដែលយើងស្រឡាញ់ និងថែទាំដល់ផែនដីនេះ និងថែរក្សាគ្នាទៅវិញទៅមក ។ នៅពេលប្អូនធ្វើដូច្នោះ នោះប្អូននឹងមានអារម្មណ៍នៃសេចក្តីស្រឡាញ់របស់ទ្រង់កាន់តែខ្លាំងឡើងនៅក្នុងជីវិតរបស់ប្អូន ។

សិល្បៈធ្វើពីក្រដាសរហែក

ប៊ីស្សព ឃូសេ បានបង្រៀនថា យើងអាចក្លាយជាអ្នកបង្កបង្កើតផងដែរ ! នេះគឺជាហត្ថកម្មដែលប្អូនអាចធ្វើបានដើម្បីរំឭកប្អូនអំពីការបង្កបង្កើតដ៏ស្រស់ស្អាតរបស់ព្រះវរបិតាសួគ៌ ។

សូមស្វែងរករូបភាពនៃអ្វីមួយនៅក្នុងធម្មជាតិដែលបំផុសគំនិតដល់ប្អូន ។
នៅលើក្រដាសមួយសន្លឹក សូមប្រើខ្មៅដៃដើម្បីគូរផ្នែកផ្សេងៗនៃរូបភាពនេះ ។
សូមហែកក្រដាសពណ៌ ដើម្បីប្រើនៅលើរូបភាពរបស់ប្អូន ។
សូមបិតបំណែកក្រដាសពណ៌នៅខាងក្នុងគ្រោងគំនូររបស់ប្អូន ។