Tomai Faataitai 10

Atiina A’e Mamanu o Mafaufauga Maloloina

E mafai ona i ai se aafiaga malosi o o tatou mafaufauga ia i tatou, a lē mo le lelei po o le leaga. O le atiina ae o mamanu o mafaufauga lelei e mafai ona faaleleia ai a tatou vaaiga i le olaga ma lo tatou gafatia e faia le galuega a le Alii.

Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata aoao e faataitai ai.

Faamatalatala

Taitai o talanoaga: Faailoa atu le autu mo lenei tomai faataitai e ala i le faasoaina atu o mea nei. Atonu foi e te mafaufau e suesue faatasi le Mataupu Faavae ma Feagaiga 6:36 . Valaaulia tagata aoao e faasoa mai pe faapefea e le mulimuli i le fautuaga a le Alii i lenei fuaiupu ona aafia ai o latou olaga.

O o tatou mafaufauga e uunaia ai o tatou lagona ma amioga (tagai i le Faataoto 23:7). O mafaufauga le lelei e mafai ona taitai atu ai i le lotovaivai, masalosalo ia te oe lava, fefe, ita, ma lagona o le leai o se faamoemoe. O mafaufauga lelei e mafai ona taitai atu ai i le mautinoa, lototele, ma le faamoemoe.

O se tasi o auala e mafai ona tatou atiina ae ai ni mamanu o mafaufauga lelei o le faamaumauina lea o o tatou mafaufauga le lelei ma toe tusia ina ia:

E sili atu ona faamoemoe.
E sili atu ona faamaoni.
Faatino le faatuatua ia Iesu Keriso.

Taitai o talanoaga: Mafaufau e tusi nei taiala e tolu i luga o le laupapa.

Faapupula

Taitai o talanoaga: Faataitai lenei tomai e ala i le faaali atu ma talanoaina nisi o faataitaiga nei ua fetuunai mai le “Talanoa Atu i Mafaufauga Le Lelei” i le Fetuunai i le Olaga Faafaifeautalai ([2013], 21). E mafai ona e valaaulia tagata eseese o le vasega e faitau leotele faataitaiga taitasi i le vasega.

O o’u mafaufauga le lelei	O la’u toetusi e fausia ai ni mafaufauga lelei
Ou te le fiafia i le vave ala i luga.	E le moomia ona ou fiafia i ai. Ou te manatu e mafai ona ou faia le mea lea. O le taimi lava ou te tu ai i luga ma gaoioi, masalo o le a ou maua ai se lagona sili atu. E mafai ona ou tatalo mo le fesoasoani a le Atua.
E le mafai ona ou faamaeaina lenei aso.	Na mafai ona ou faamaeaina aso uma e oo mai i lenei taimi, ma o le a faapena foi i le asō. E na o le pau le mea e ao ona ou faia i le taimi nei o mea ia ua i ai i ou luma, e tasi le laa i le taimi. A o ou vaavaai atu i le Faaola, o le a Ia fesoasoani ia te a’u ia ou manumalo i lenei aso.
O lenei lesona sa faaletonu.	O nisi lesona e lelei atu i lo isi. E lelei o loo ou manao ia alualu i luma. Ou te iloa o le a talia e le Atua au taumafaiga sili. Atonu e mafai ona fesoasoani mai la’u soa ina ia ou faaleleia.

Taitai o talanoaga: Valaaulia tagata aoao e faasoa mai pe na faapefea ona latou vaaia taiala e tolu o loo faaalia i nei faataitaiga. E mafai foi ona talanoaina fesili e pei o nei:

O le a se mea sa tulagaese ia te oe mai nei faataitaiga?
E faapefea e lou mafaufau i lenei ala ona aafia ai lou olaga?

Faataitai

Taitai o talanoaga: Tuu atu i tagata aoao se avanoa e faataitai ai ma se paga lenei tomai. Mafaufau e faaali atu faatonuga nei:

Toe tusi manatu le lelei nei i ni faamatalaga e sili atu ona faamoemoe ma moni, ma e faaalia ai le faatuatua ia Iesu Keriso:

“E sili atu tagata uma i lenei mea nai lo a’u. E le o a’u o se tasi o i latou nei.”
“E le mafai ona ou talanoa i se tagata ese. Ua fai lava si taufaafefe tele!”
“O taimi uma lava ou te le faatulagaina faalelei.”

Taitai o talanoaga: Valaaulia ni nai tagata naunau o le vasega e faasoa mai pe na faapefea ona latou toe tusia se tasi o mafaufauga le lelei. Mo nisi faataitaiga, mafaufau e valaaulia tagata aoao e tusi i lalo ni nai mafaufauga le lelei sa latou maua muamua. Tuu atu ia i latou se taimi e faataitai ai le toe tusia o nei mafaufauga ina ia tumu i le faamoemoe, faamaoni, ma faatumulia i le faatuatua.

Faaaoga

Taitai o talanoaga: Faasoa atu mea nei e fesoasoani ai i tagata aoao e faaaoga lenei tomai:

Mo le isi fitu aso, faaalu se taimi e tusi ai nisi o ou mafaufauga le lelei o loo i ai. Ona toe tusi lea ina ia tumu i le faamoemoe ma faamaoni ma faaalia lou faatuatua ia Iesu Keriso. Ia gauai atu i le auala e aafia ai oe i lenei faiga.