Tomai Faataitai 7

Tali Atu i Lagona o le Lē Atoatoa

E mafai ona avea ma se mea masani le lagonaina o le lē atoatoa pe a tatou oo i ni tulaga fou pe luitauina. O le taulai atu i mea e mafai ona tatou pulea o se auala e fesoasoani ia i tatou e faatoilalo ai lagona o le lē atoatoa.

Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata aoao e faataitai ai.

Faamatalatala

Taitai o talanoaga: Faamalamalama atu pe a faia ni mea fou, o se mea masani le lagonaina o le lē atoatoa. E mafai ona e tuuina atu se faataitaiga mai lou lava olaga pe a e lagonaina le lē atoatoa.

O le a se tulaga talu ai nei na taitai atu ai oe e lagona le lē atoatoa?
O a ni mea na e faia na fesoasoani pe le’i fesoasoani foi?
Aisea e taua ai le faalagolago i le Alii pe a tatou lagona le lē atoatoa? (tagai i le Filipi 4:13; Alema 26:12)

Taitai o talanoaga: Faitau faatasi le parakalafa lenei. (E mafai foi ona e valaaulia tagata a’oa’o e sue ma faailoga le parakalafa lenei o loo i le itulau e 32 o le Fetuunai i le Olaga Faafaifeautalai.)

Aua e te taumafai e pulea mea e lē mafai ona e faia. O le taumafai e pulea mea e te lē mafaia o le a na ona e lagona atili ai lava o le le puleaina, ma faateleina ai lou popole. Taulai lou malosi i mea e mafai ona e faia i ai se mea. (Fetuunai i le Olaga Faafaifeautalai [2013], 32)

E faapefea i lou manatu ona fesoasoani le taulai atu i mea e mafai ona tatou pulea e faatoilalo ai lagona o le lē atoatoa?

Faapupula

Taitai o talanoaga: Ina ia fesoasoani i tagata o le vasega e a’oa’o pe faapefea ona taulai atu i mea e mafai ona latou pulea, ia iloilo faatasi ia faataitaiga nei.

E mafai ona e talanoaina pe aisea o le a le mafai ai e se tagata ona pulea faataitaiga o loo i le koluma agavale. A o lei faasoaina atu tali i le koluma taumatau, valaaulia tagata a’oa’o e vaai pe mafai ona latou mafaufau na o i latou i tali.

E le mafai ona pulea	E Mafai Ona Pulea
“Ou te manao ia avea ma se tagata lelei, ae e masani ona ou lagona le le fiafia ona o a’u mea sese.”	“E mafai ona ou faia le mea sili ou te mafaia ma iloa ai o nisi taimi ou te lē atoatoa ai. E ala i le salamo i aso taitasi ma le fesoasoani a le Faaola, e mafai ai ona faasolosolo malie ona avea a’u e faapei o Keriso.”
“Ou te le iloa pe o le a mafai ona ou tautala i le gagana faapea foi ma la’u soa.”	“E mafai ona ou suesue ma le filiga i le gagana i aso uma ma saili ma le agaga tatalo le fesoasoani a le Atua.”

Faataitai

Taitai o talanoaga: Faaali atu faataitaiga faaopoopo nei ma tuu atu i tagata o le vasega se taimi e faataitai ai ma paga. E mafai foi e tagata a’oa’o ona mafaufau i ni faataitaiga eseese nai lo faataitaiga na tuuina mai.

E le mafai ona pulea	E mafai ona pulea
“E le tele ni a’u uo e pei o isi tagata.”
“O le mafaufau e uiga i le auauna atu i se misiona e lagona le lofituina ia te a’u. E foliga mai o se galuega faigata, o le a ou misia lo’u aiga ma uo, ma e tele naua mea e le mailoa.”
“Ua fesoasoani isi faifeautalai i le toatele o tagata ia papatisoina nai lo a’u. Ou te le iloa pe na le manuia la’u misiona.”

Faaaoga

Taitai o talanoaga: Fesoasoani i tagata a’oa’o e mafaufau pe faapefea ona latou faaaogaina lenei tomai i o latou olaga e ala i le faasoaina atu o le valaaulia lenei:

I le vaiaso a sau, faaalu se taimi e matau ai pe a e lagonaina le lē atoatoa. Ona ole atu lea i le Tama Faalelagi e fesoasoani ia te oe e taulai atu i mea e mafai ona e pulea.