Tomai Faataitai 1

Faailoa atu le Tusi a Mamona i Tagata

tamaitai faifeautalai o loo faitau tusitusiga paia

Ua tuuina mai ia i tatou e le Alii le Tusi a Mamona e fesoasoani i le liuaina. E mafai ona fesoasoani lenei gaoioiga i tagata a’oa’o e faataitai ai le faasoaina atu o se folasaga puupuu i le Tusi a Mamona i isi.

Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata a’oa’o e faataitai ai.

Faamatalatala

Taitai o talanoaga: Faailoa atu le autu mo lenei faataitaiga o tomai e ala i le faamatala atu o mea nei:

“O le Tusi a Mamona, a tuufaatasi ma le Agaga, o lau punaoa sili lea ona malosi i le liuaina mai” (Tala’i La’u Talalelei [2023], 113). I le avea ai ma se faifeautalai, o le a tele ni avanoa e te faailoa atu ai i tagata le Tusi a Mamona.

Vaai faalemafaufau e i ai sau uo o loo fesili atu ia te oe, “O le a le Tusi a Mamona?”

Afai e na o se minute pe lua e te tali atu ai, o a nisi o mea e sili ona taua mo i latou e malamalama i ai?

Taitai o talanoaga: Mafaufau e tusi tali a tagata a’oa’o i le fesili na tuuina atu muamua i luga o le laupapa. Faamalamalama atu e faapea pe a faailoa atu tagata i le Tusi a Mamona, e mafai ona fesoasoani le taulai atu i le mea e sili ona taua. O manatu faigofie e mafai ona tatou taulai atu i ai e mafai ona maua i lalo o le ulutala “Faailoaina Atu o le Tusi a Mamona i Tagata” i le “Lesona 1—O Le Savali o le Toefuataiga o le Talalelei a Iesu Keriso” (Tala’i La’u Talalelei, mataupu 3, 42). Valaaulia tagata o le vasega e sue le ulutala lenei. Ona faasoa atu lea o faatonuga nei:

Faitau le “Faailoaina Atu o le Tusi a Mamona i Tagata” i le pusa “Malamalamaaga e A’oa’o Atu Ai” (Tala’i La’u Talalelei, 42). Vaavaai mo ni itu aoga e taulai atu i ai pe a faailoa atu tagata i le Tusi a Mamona.

Taitai o talanoaga: Valaaulia tagata a’oa’o e faasoa mai ni mea sa latou mauaina. Afai e manaomia, e mafai ona e faafouina le lisi na e fatuina muamua i luga o le laupapa.

Faapupula

Taitai o talanoaga: Faataitai se faataitaiga o le auala e faailoa atu ai isi i le Tusi a Mamona. E mafai ona e faia lenei mea e ala i le faailoa atu o le Tusi a Mamona i le vasega, pe mafai foi ona e valaaulia se tagata o le vasega e sau i luma o le potu ina ia mafai ona e faatinoina le faailoaina atu o le tusi ia i latou.

O se isi filifiliga e mafai ona faaali atu a le o le “O le a le Tusi a Mamona? O Se Vaaiga Aoao e 60-sekone” (1:08) po o le “O le a le mea e faatatau i ai le Tusi a Mamona?” (1:53). O loo maua vitio uma e lua i luga o le ChurchofJesusChrist.org. E mafai e tagata o le vasega ona vaavaai mo ni manatu e mafai ona latou faaaogaina i a latou lava folasaga.

Faataitai

Taitai o talanoaga: Faasoa atu faatonuga nei. Tuu atu i tagata a’oa’o se taimi e saunia ai ma faataitai.

Sauni e faailoa atu le Tusi a Mamona i se tasi e ala i le faia o mea nei:

Tusi i lalo manatu autu e mafai ona e faasoa atu, e aofia ai le mea e faatatau i ai le Tusi a Mamona ma le auala na tosina ai oe lava ia.
Faatasi ai ma se paga, faaalu pe tusa ma le 1–2 minute a le tagata e feauaua’i ai e faailoa atu le Tusi a Mamona i le tasi ma le isi.

Taitai o talanoaga: A uma ona faataitai e tagata o le vasega, e mafai ona e valaaulia i latou e fuafua po o a ni fetuunaiga e mafai ona latou faia i le ala na latou faailoa mai ai le Tusi a Mamona. Ona mafai lea ona e tofia i latou e galulue faatasi ma se isi paga ma valaaulia i latou e toe faataitai.

Faaaoga

Taitai o talanoaga: Faasoa atu se valaaulia e pei o lenei e fesoasoani ai i tagata a’oa’o e faaaoga lenei tomai:

Vaavaai mo se avanoa e faailoa atu ai le Tusi a Mamona i se tasi i le aso e tasi pe lua e sosoo ai. Atonu o se tagata e le masani i le tusi i le taimi nei, pe mafai foi ona e faataitaia lau folasaga i se uo po o se tagata o le aiga.