Tomai Faataitai 4

Fai Fesili Musuia

alii faifeautala’i o loo a’oa’o atu i le auala

E masani ona fai atu e faifeautalai ni fesili ia i latou o loo faiaoga ai. O le faia o fesili lelei e mafai ona fesoasoani i faifeautalai e “malamalama ai i mea e fiafia i ai tagata, popolega, ma fesili. O fesili lelei e mafai ona valaaulia ai le Agaga ma fesoasoani ai i tagata e a’oa’o” (Tala’i La’u Talalelei [2023], 190).

Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata a’oa’o e faataitai ai.

Faamatalatala

Taitai o talanoaga: Faasoa atu faatonuga nei e faailoa atu ai le autu o le faia o fesili:

Faitau parakalafa ma le lisi o i lalo o le ulutala “Fai ni Fesili” i le mataupu e 10 o le Tala’i La’u Talalelei (itulau e 190–91). Vaavaai mo le matafaioi o fesili lelei e faia i le faasoaina atu o le talalelei.

Aisea e taua ai mo faifeautalai ona fai atu ni fesili aoga i a latou aoaoga?

Taitai o talanoaga: Faamalamalama atu o nisi ituaiga o fesili e sili atu ona aoga nai lo isi. Faasoa atu faatonuga nei e fesoasoani ai i tagata o le vasega e a’oa’o taiala mo le faia o fesili aoga:

Faitau ia vaega muamua e fitu o pulu o i lalo o le “Aloese mai Fesili e Le Aoga pe ua Soona Fai” (Tala’i La’u Talalelei, 191). Vaavaai mo taiala e mafai ona fesoasoani ia te oe e a’oa’o ai e fai atu ni fesili aoga.

Faapupula

Taitai o talanoaga: Faaali atu i tagata a’oa’o ni nai faataitaiga o le auala e suia ai fesili e tau le aoga ina ia sili atu ona aoga. Mafaufau e faaaoga faataitaiga o loo i le siata lenei. Mo nisi faataitaiga, tagai i le lisi o fesili e le aoga i itulau e 192–93 o le Tala’i La’u Talalelei.

Fesili e le aoga	Fesili e sili atu ona aoga
O ai le uluai perofeta? (Atonu e le iloa e le tagata le tali	O le a faapefea ona aafia ai lou olaga pe afai e te iloa ua valaauina e le Atua perofeta i aso nei? (Fesili atu mo mafaufauga ma lagona o le tagata lava ia.)
E faapefea ona fesoasoani le tausia o o tatou tino ia mama, ina ia tatou maua ai le Agaga ma faaalia ai o loo tatou naunau e mulimuli i le perofeta a le Atua? (E sili atu ma le tasi se manatu.)	E faapefea i lou manatu ona aafia la tatou sootaga ma le Atua i le tausia o o tatou tino ia mama? (Taulai atu i se manatu se tasi.)

Faataitai

Taitai o talanoaga: E mafai e tagata a’oa’o ona galulue faatasi ma paga e faamaea le gaoioiga lenei.

Faitau isi faataitaiga mai le lisi o fesili e le aoga i le mataupu e 10 o le Tala’i La’u Talalelei (itulau e 192–93). Filifili ni se lua pe tolu o nei fesili ma galulue faatasi e fatu ni fesili e sili atu ona aoga.

Taitai o talanoaga: A maea ona faia e tagata o le vasega, valaaulia ni nai tagata e faasoa mai ni faataitaiga o fesili e sili atu ona aoga na latou fatuina.

Afai e lava le taimi, e mafai ona e valaaulia tagata aoao e toe fai lenei gaoioiga faataitai faatasi ai ma isi fesili mai le lisi o fesili e le aoga i le Tala’i La’u Talalelei.

Faaaoga

Taitai o talanoaga: Mafaufau e faaali atu mea nei e fesoasoani ai i tagata a’oa’o e mafaufau pe faapefea ona latou faaaogaina lenei tomai:

Mafaufau pe faapefea ona e faaaogaina mea ua e aoaoina e uiga i le faia o fesili aoga i le vaiaso pe lua o le a sosoo ai. Mo se faataitaiga, e mafai ona e:

Saili mo ni fesili aoga i ni nai lesona mai le Sau, Mulimuli Mai ia te Au.
Afai o le a vave se taimi e te aoao atu ai se lesona, saunia ni fesili aoga e mafai ona e fai atua a o e a’oa’o atu.