Tomai Faataitai 8
Manava ma le Loto i Ai
I le taimi o le galuega faafaifeautalai ma i o tatou olaga i aso uma, e masani lava ona tulai mai ni tulaga e atuatuvale ai. O le manava ma le loto i ai o se metotia e mafai ona tatou faaaogaina e faaitiitia ai le atuatuvale ma fatuina ai se lagona o le soifua manuia.
Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata a’oa’o e faataitai ai.
Faamatalatala
Taitai o talanoaga: Mafaufau e fai atu i tagata a’oa’o e talanoa e uiga i le auala e mafai ai e le atuatuvale ona aafia ai i tatou i auala lelei ma auala le lelei. Pe a manaomia, e mafai ona e faaali atu le faamatalaga lenei:
O le oo i le atuatuvale e mafai ona tatou maua ai avanoa e faalautele ai, tuputupu ae ai, ma faalagolago ai i le Atua mo le malosi. Peitai, o taimi malolosi o le atuatuvale po o le lagonaina pea o le atuatuvale mo se taimi umi e mafai ona taitai atu ai i luitau faaletino ma faalelagona.
Taitai o talanoaga: Faitau ma talanoaina faatasi le fautuaga a le Alii i le Mataupu Faavae ma Feagaiga 101:16. Fesili atu i tagata auai po o le a so latou lagona e faatatau i lenei fautuaga i tulaga faigata, e aofia ai tulaga e ono feagai ma i latou o ni faifeautalai. E mafai ona e faailoa atu le tomai o le manava ma le loto i ai e ala i le faaali atu o mea nei:
O se tasi o auala lelei e taulima ai ituaiga o popolega lē lelei, o le faia lea o ni faamalositino o le manava ma le loto i ai. O le manava ma le loto i ai e mafai ona fesoasoani ia i tatou e faatoafilemu ai o tatou mafaufau ma o tatou tino. E mafai ai foi ona tatou faaleleia atili lo tatou taulai atu, pulea o tatou lagona, faaleleia atili le manatuaina, ma ia sili atu ona taliaina uunaiga a le Agaga.
Faapupula
Taitai o talanoaga: O ituaiga nei e lua o faamalositino o le manava loloto e mafai ona e faata’ita’ia:
Filifiliga 1: Manava faatalaloa
Nofo i se nofoa ma ia toafimalie. Ia mautinoa o loo lagolagoina lou papatua ma ua tu lelei ou vae i luga o le fola. E mafai ona e pupula pe moeiini ou mata.
-
Laasaga 1: Manava i totonu i lou isu ma faitau lemu i le lima, ma faatumu ou māmā i le ’ea.
-
Laasaga 2: Taofi lau manava mo le lima sekone. Taumafai e aua le manava i fafo mo le lima sekone atoa.
-
Laasaga 3: Manava lemu i fafo i lou gutu mo le lima sekone.
-
Laasaga 4: Taofi mo le lima sekone.
-
Laasaga 5: Toe fai laasaga 1 e oo i le 4 seia oo ina e lagona le toamalie.
Taitai o talanoaga: E mafai ona e faaali atu le ata lenei e fesoasoani ai i tagata a’oa’o ia malamalama lelei i lenei gaoioiga manava:
Filifiliga 2: Faamalositino o le manava i le Fetuunai i le Olaga Faafaifeautalai
Taitai o talanoaga: Fesoasoani i tagata a’oa’o e su’e le Fetuunai i le Olaga Faafaifeautalai le Potutusi o le Talalelei (Potutusi > Tusitaulima ma Valaauga > Valaauga o Misiona > Fetuunai i le Olaga Faafaifeautalai).
Saili le gaoioiga “Faamalositino o le Manava” i le vaega “Mataupu Faavae Lautele mo le Puleaina o le Atuatuvale” o le Fetuunai i le Olaga Faafaifeautalai ([2013], 18). Mulimuli i laasaga e tolu o loo faamatalaina i le gaoioiga.
Faataitai
Taitai o talanoaga: A uma ona faatino se faamalositino se tasi po o gaoioiga uma e lua o le manava, tuu atu i tagata auai se taimi e faataitai ai. E mafai ona e valaaulia i latou e fuaina o latou lagona o le atuatuvale po o le popole i se fua mai le 1 i le 5 a o lei faia ma pe a uma le faamalositino o le manava e vaai pe latou te matauina se eseesega.
Faaaoga
Taitai o talanoaga: Faasoa atu se valaaulia e pei o lenei e fesoasoani ai i tagata auai e faaaoga le tomai lenei:
Faataitai le manava ma le loto i ai mo ni nai minute i aso taitasi faapea foi i soo se taimi e te maua ai i le atuatuvale. Ia nofouta i ou lagona a o e faata’ita’i. Tatalo mo le fesoasoani a le Tama Faalelagi i le taulimaina o tulaga atuatuvale i lou olaga.