Tomai Faataitai 6
Talanoa ma Tagata Uma
Pe a talanoa atu tagata talavou i tagata latou te le iloa, o se mea masani mo i latou le lagonaina o le le mautonu po o le popole. E mafai ona fesoasoani lenei gaoioiga i tagata o le vasega e faataitai ai le faia o talanoaga ma tagata faatoa latou feiloai i ai.
Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata aoao e faataitai ai.
Faamatalatala
Taitai o talanoaga: Faamalamalama atu o se vaega o le galuega faafaifeautalai e aofia ai le talanoa atu i tagata e te le iloa i aso uma.
-
O le a se aafiaga talu ai nei na e maua ina ua e talanoa i se tasi mo le uluai taimi? Na faapefea mai?
Taitai o talanoaga: A o lei faailoaina atu taiala patino o le a avea ma taulaiga o lenei faataitaiga o tomai, mafaufau e faitau faatasi le “Talanoa ma Tagata Uma” (Tala’i La’u Talalelei [2023], 166–67). E mafai ona e valaaulia tagata aoao e talanoaina fautuaga sa latou iloa e sili ona aoga.
Faamalamalama atu o lenei tomai faataitai o le a taulai atu i taiala e tolu o loo aoteleina mai le Tala’i La’u Talalelei (tagai i itulau 166–67) ma le Fetuunai i le Olaga Faafaifeautalai (tagai i itulau 35–36). Faaali atu nei taiala ma valaaulia ni nai tagata o le vasega e feauaua’i e faitau leotele
-
Saili se auala faigofie e amata ai se talanoaga. Ia i ai ni lagona mafanafana, faamaoni, ma faauō. Taumafai e faatalofa atu, tuuina atu se faamalo, ofo atu e fesoasoani i se mea, pe fai atu se fesili (tagai i le isi pulu mo ni faataitaiga).
-
Fai fesili. Mafaufau e fesili atu i tagata e uiga i mea e fiafia i ai pe tāua ia i latou. E mafai ona aofia ai a latou galuega, mea e masani ona fai, mea e fiafia i ai, aiga, po o nofoaga latou te auai ai i le lotu po o le aoga. Ia naunau foi e tali a latou fesili e uiga ia te oe.
-
Faalogo ma le faamaoni. Taulai atu i mea o loo fai mai ai le isi tagata nai lo le isi mea o le a e fai atu. Ia faatumauina le faafefasega’i lelei o fofoga i le taimi atoa o le talanoaga. Faaali atu e te fiafia i le tagata o loo e talanoa i ai ma mea o loo latou fai mai ai. E mafai ona e fai atu ia i latou ni fesili faaopoopo e a’oa’o atili ai.
Faapupula
Taitai o talanoaga: Faataitai nei tomai mo le vasega e ala i le valaauliaina o se tagata auai naunautai e sau i luma o le potu. Fai se talanoaga e ala i le mulimuli i taiala o loo lisiina i le vaega ua mavae. A mae’a, valaaulia le vasega e faasoa mai pe na faapefea ona latou matauina taiala na mulimulitaia.
O le isi auala e mafai ona e faaalia ai lenei tomai o le faaali atu lea o le vitio “Talking with Everyone” (ChurchofJesusChrist.org; matamata mai le taimi faailo 4:00 i le 6:08).
Faataitai
Taitai o talanoaga: Tofi ia tofu le tagata auai ma se paga. Ona faasoa atu lea o faatonuga nei. Afai e lava le taimi, tuu atu i tagata a’oa’o se avanoa e toe fai ai lenei faataitaiga faatasi ma nisi o le vasega.
Faatasi ai ma lau paga, ia feauaua’i i le amataina o se talanoaga e ala i le faaaogaina o taiala e tolu na tatou talanoaina:
-
Saili se auala faigofie e amata ai se talanoaga.
-
Fai fesili.
-
Faalogo ma le faamaoni.
Faaaoga
Taitai o talanoaga: Faasoa atu le valaaulia lenei. Atonu e te mafaufau e tulitatao lenei valaaulia i se vasega i le lumanai.
Saili ni avanoa i le vaiaso a sau e amata ai se talanoaga ma se tasi e te lei feiloai lava i ai pe le iloa lelei foi. Faataitai le faaaogaina o tomai ua e aoaoina i le asō i le taimi o lau talanoaga.