Lesona 6
Faataitai le Aoao Atu
Fesoasoani mo le Aoaoina Atu o Lesona mai le Mataupu 3 o le Tala’i La’u Talalelei
O le tuuina atu i tagata o le vasega o avanoa faifai pea e aoao atu ai e mafai ona faateleina ai lo latou lototele ma le tomai e faasoa atu ai le talalelei a Iesu Keriso. E mafai foi ona faamalosia ai la latou molimau i le Faaola ma Lana aoaoga faavae.
Faapefea ona faaaoga lenei lesona
Taitai o talanoaga: O lenei lesona ua tuuina mai ai ni manatu e fesoasoani ai i tagata aoao e suesue ma aoao atu upumoni mai le mataupu e 3 o le Tala’i La’u Talalelei. A o e fuafuaina pe faapefea ma po o afea e faaaoga ai manatu o loo i lenei lesona, mafaufau i mea nei:
-
Faifai pea: O le a manuia tagata o le vasega mai avanoa faifai pea e aoao atu ai i le kosi atoa.
-
Faataitaiga: A o lei valaauliaina tagata o le vasega e aoao atu, faaali atu ia i latou ni faataitaiga o mea ua talosagaina i latou e fai. Mo se faataitaiga, e mafai ona e (1) faataitai atu le auala e aoao atu ai se upumoni, pe (2) faaaoga lesona pupuu faataitai mai le “Aoao Atu Pe a E Maua” (Tala’i La’u Talalelei, 175–176).
-
Siosiomaga: Ia mautinoa e tofu tagata taitoatasi ma se tasi e aoao i ai. Ia mautinoa o loo latou faafesagai ma a latou paga po o vaega ma e mafai e tagata uma ona lagona e le tasi le isi. Uunaia tagata aoao ia faaaloalo i a latou uo o loo aoaoina i latou.
-
Toe fai: Taumafai e tuu atu i tagata aoao ni avanoa e aoao atu ai le upumoni lava lea e tasi i le tele o taimi i se vasega. O le a fesoasoani lenei mea ia i latou e fetuunai ma faaleleia atili ai. E mafai ona e tofia i latou e aoao tagata eseese i taimi taitasi.
-
Fetuunai: I le aluga o taimi, e mafai ona e fesoasoani i tagata aoao e taulai atu i tomai e sili atu ona faaleleia o le aoao atu, e pei o le aoao atu faatasi ma se soa, tuuina atu o valaaulia aoga, po o le faia o ni fesili lelei. Mo ni manatu o tomai faaopoopo e mafai ona e faaaogaina, tagai i tomai faataitai i le faaiuga o lenei tusi lesona.
Manatu e fesoasoani ai i tagata o le vasega e faataitai le aoao atu
Taitai o talanoaga: O taiala aoao atu nei ua mamanuina e fesoasoani i tagata aoao e faia laasaga amata ina ia avea ai ma faiaoga lelei.
Aotelega puupuu
Taitai o talanoaga: O le filifiliga sili lea ona vave ma faigofie. E mafai e tagata aoao ona saunia ma aoao atu se aotelega puupuu o se autu o le talalelei i ni nai minute. E mafai ona latou faia lenei mea i nisi taimi i le amataga o le vasega, ae e te lei amataina lau lesona ua faatulagaina.
Ina ia fesoasoani i tagata o le vasega e saunia se aotelega puupuu, faaali atu faatonuga nei:
-
Sue le vaega ua faaulutalaina “Faavae Faale-Aoaoga Faavae” i le lesona 1, 2, po o le 3 mai le mataupu e 3 o le Tala’i La’u Talalelei (itulau 33–44, 50–60, 64–74).
-
Filifili se tasi o autu i le vaega lenei e te manao e suesue i ai. Faaalu ni nai minute e suesue ai ma malamalama ai i lenei autu.
-
Faasoa atu se aotelega e tasi i le lua minute o lau autu i se paga po o se vaega toalaiti.
Faasologa faigofie o le lesona
Taitai o talanoaga: O lenei filifiliga e tuuina atu ai i tagata aoao se avanoa e faaopoopo ai ni vaega faaopoopo i a latou aoaoga. O nei vaega e aofia ai le faasoaina atu o se mau e faatatau i ai, tuuina atu o valaaulia, ma le faasoaina atu o a latou molimau.
-
Sue le vaega ua faaulutalaina “Faavae Faale-Aoaoga Faavae” i le lesona 1, 2, po o le 3 mai le mataupu e 3 o le Tala’i La’u Talalelei (itulau 33–44, 50–60, 64–74).
-
Filifili se tasi o autu i le vaega lenei e te manao e suesue i ai. Faateleina lou malamalama i lenei autu e ala i le (1) faitauina o le soavaega ma faailoga mea e te iloa e sili ona taua ma (2) suesue nisi o mau o loo i le pusa “Suesueina o Tusitusiga Paia”.
-
Fai se otootoga faigofie e aofia ai:
-
Se aotelega puupuu o mea na e aoaoina.
-
Se mau e fesootai i ai e faasoa atu.
-
O se valaaulia e mafai ona e tuuina atu.
-
Lau Molimau.
-
Faaaoga lau otootoga e aoao ai se paga e uiga i le autu sa e suesueina.
-
Aoao atu ni upumoni se lua pe sili atu
Taitai o talanoaga: O lenei filifiliga e mafai ai e tagata aoao ona aoao atu ni upumoni se lua pe sili atu i se lesona puupuu. Ina ia fesoasoani ia i latou e faamaea lenei filifiliga, tufatufa atu le pepa e tufa atu ua faaulutalaina “Taiala mo le Sauniaina ma le Aoaoina Atu o se Lesona Puupuu.”
Taiala mo le Sauniaina ma le Aoaoina Atu o se Lesona Puupuu
O fea o lesona nei mai le mataupu e 3 o le Tala’i La’u Talalelei o le a e aoao atu ai? (Filifili le tasi.)
-
____ Lesona 1: O Le Savali o le Toefuataiga o le Talalelei a Iesu Keriso
-
____ Lesona 2: O Le Ata o le Faaolataga a le Tama Faalelagi
-
____ Lesona 3: O Le Talalelei a Iesu Keriso
Alu i le vaega o le “Faavae Faale-Aoaoga Faavae” o le lesona na e filifilia. Tagai i ulutala ua faamataolaola. Filifili ia le itiiti ifo ma le lua o nei autu e te manao e faataitai ai le aoao atu. O a ulutala na e filifilia?
Ina ia fesoasoani ia te oe e saunia, mafaufau i se tasi e te iloa e ono faamanuiaina i upumoni e te manao e aoao atu. Tusi i lalo se fesili, popolega, po o se manaoga o loo i ai i lenei tagata e mafai ona talanoaina e lau lesona.
Faatulaga ma aotele mea o le a e aoao atu. Saunia se lesona e mafai ona e aoao atu i le lima i le fitu minute. Mafaufau e fai mea nei: (1) Faailoa mai ia le itiiti ifo ma le tasi se mau o le a e faasoa atu. (2) Faamaumau ia le itiiti ifo ma le tasi se fesili o le a e fesiligia. (3) Mafaufau i se aafiaga po o se faataitaiga e mafai ona e faasoa atu. (4) Mafaufau pe o le a le taimi e ono tuuina atu ai lau molimau. (5) Faamaumau se valaaulia e mafai ona e tuuina atu.
Saunia lau faasologa e faaaoga ai le avanoa o loo i lalo ma le pito i tua o lenei itulau. A e aoao atu, aua le popole i le ta’ua o mea uma. Aoao atu mai lou loto, e faaaoga ai au lava upu.
Toe manatunatu
Taitai o talanoaga: A uma ona faataitai e tagata o le vasega le aoao atu, mafaufau e talanoaina o latou aafiaga. E mafai ona e fai atu fesili faapenei:
-
O a mea na e aoaoina mai le faagasologa o le sauniaina ma le aoaoina atu?
-
O le a se mea na e suesue ma aoao atu na sili atu ona taua ia te oe? Aisea?
-
E faapefea ona e manao e faaleleia atili o se faiaoga?
Faatu se sini
Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina i le aso ma faatu ni sini. E mafai foi ona e faaali atu mea nei e fesoasoani ai ia i latou:
Faatu se sini e faatatau i mea ua e suesueina. Faaaoga manatu faapenei, pe mafaufau foi i ou lava manatu.
-
Aoao atu upumoni na e saunia ma aoaoina i lenei aso i se tasi e i fafo atu o le vasega.
-
Filifili se lesona se tasi pe sili atu i le mataupu e 3 o le Tala’i La’u Talalelei e suesue atili ai.
O La’u sini
-
O le a ou … (faatinoga o le a e faia).
-
O le a ou ausia la’u sini e ala i le … (o se fuafuaga faigofie).
Taitai o talanoaga: Afai e i ai se vaega a tagata aoao e faasoa atu iai a latou sini, tuu atu ia i latou se taimi e faasoa atu ai pe faapefea ona latou lagolagoina pe faamanatu atu e le tasi i le isi a o lei amataina le isi vasega.
Le isi taimi
Taitai o talanoaga: Afai ua e saunia e suesue le lesona 7 i le isi taimi, mafaufau e valaaulia tagata aoao e suesue le “O Le Valaaulia ina ia Papatisoina ma Faamauina” mai le mataupu e 3 o le Tala’i La’u Talalelei (itulau 28–29) e sauniuni ai. Atonu foi e te manao e auina atu ia i latou se faamanatu.