Lesona 9

Faaaoga le Mana o le Tusi a Mamona

Tala’i Lau Talalelei, mataupu 5

“O le Tusi a Mamona, tuufaatasi ma le Agaga, o lau punaoa aupito sili lea ona mamana i le liuaina” (Tala’i La’u Talalelei: O Se Taiala i le Faasoaina Atu o le Talalelei a Iesu Keriso [2023],113). O loo molimau mai le Tusi a Mamona ia Iesu Keriso ma o le meafaigaluega lea ua saunia e le Atua e faapotopoto ai Isaraelu i aso e gata ai. A o tatou suesue mai le Tusi a Mamona ma faaaoga ona aoaoga, e mafai ona tatou latalata atili atu i le Atua.

Iloilo ma Toe Tulitatao

Taitai o talanoaga: Valaaulia tagata aoao e mafaufau i a latou taumafaiga i le taimi nei e faaaoga mea o loo latou aoaoina i le vasega lenei. E mafai ona e valaaulia i latou e fefaasoaai ma se paga pe faatasi foi o se vasega nisi o a latou taumafaiga.

Filifiliga o Gaoioiga e Aoao Ai

Taitai o talanoaga: Filifili ma le agaga tatalo ia vaega e aoao ai e sili ona aoga mo lau vasega. Ia mautinoa e tele se taimi e tuu e faataitai ai ma faatatau

Filifiliga A: Aisea ua avea ai le Tusi a Mamona o se meafaigaluega taua i le faasoaina atu o le talalelei?

Suesue

Taitai o talanoaga: Fai atu i tagata aoao e mafaufau i se meafaigaluega latou te faaaogaina soo. E mafai ona outou }talanoaina fesili e pei o nei:

E faapefea e lenei meafaigaluega ona faafaigofie ai lou olaga?
O a meafaigaluega ua tuuina mai e le Atua ia i tatou e fai ai Lana galuega?

Taitai o talanoaga: Valaaulia se tagata o le vasega e faitau leotele le palakalafa muamua i le mataupu e 5 o le Tala’i La’u Talalelei (itulau e 113). Fai atu i tagata aoao e mulimuli i le faitauga ma vaavaai mo se tasi o meafaigaluega e faaaoga e le Atua e fesoasoani ai i tagata ia o mai ia te Ia. E mafai foi ona e faaaogaina faamatalaga nei o se vaega o lenei talanoaga.

Sa aoao mai Elder David A. Bednar:

O le Tusi a Mamona o se tasi molimau ia Iesu Keriso ma o le meafaigaluega maoae o le liuaina i aso e gata ai. (“Faatasi ai ma le Mana o le Atua i le Mamalu Sili,” Liahona, Nov. 2021, 28–30)

Na molimau Elder Ulisses Soares:

O le Tusi a Mamona o le meafaigaluega lea a le Atua ua faataunuu ai le faapotopotoina o Isaraelu i o tatou aso ma ia fesoasoani ai i tagata ia iloa Lona Alo, o Iesu Keriso. (“O Le Oo Mai o le Tusi a Mamona,“ Liahona, Me 2020, 33)

Taitai o talanoaga: Mafaufau e tusi le fuaiupu lea e lei uma i luga o le laupapa: O le Tusi a Mamona o se tasi lea o meafaigaluega aupito sili ona taua mo le faasoaina atu o le talalelei a le Faaola aua …

Valaaulia tagata aoao e faauma le fuaiupu. Tusi a latou tali i luga o le laupapa. Ona faasoa atu lea o faatonuga nei:

Filifili se vaega mai le mataupu e 5 o le Tala’i La’u Talalelei (itulau 113–22) e suesue ai. A o e faitauina, vaavaai mo mafuaaga faaopoopo o le Tusi a Mamona o se meafaigaluega taua po o se meafaigaluega mo le faasoaina atu o le talalelei a le Faaola.

Taitai o talanoaga: A mae’a ona suesue tagata aoao, valaaulia i latou e faasoa mai ni auala faaopoopo e mafai ona latou faamae’aina ai le fuaiupu o loo i luga o le laupapa. E mafai foi e tagata aoao ona talanoaina se fesili se tasi po o fesili uma e lua o loo i lalo. Afai latou te ta’ua ni fuaiupu patino mai le Tusi a Mamona i a latou tali i soo se fesili, mafaufau e faitau faatasi nei fuaiupu o se vasega.

O a ni aafiaga na e maua i le faasoaina atu o upumoni mai le Tusi a Mamona i isi?
Na faapefea ona e vaaia upumoni o le Tusi a Mamona o fesoasoani ia te oe po o isi ia latalata atili atu ia Iesu Keriso?

Taitai o talanoaga: Mafaufau e faasoa atu au lava tali i fesili ua mavae. E mafai foi ona e faaali atu le vitio “Shaquille’s Story about the Book of Mormon” (1:28, ChurchofJesusChrist.org). Talanoaina pe na faapefea ona fesoasoani le Tusi a Mamona i ana fesili ma le liua ia Iesu Keriso.

Faataitai

Taitai o talanoaga: Faamalamalama atu o se tasi o mafuaaga ua avea ai le Tusi a Mamona ma punaoa taua mo le faasoaina atu o le talalelei, ona o loo i ai tali i fesili taua e faavavau. O le gaoioiga lenei e mafai ona fesoasoani i tagata aoao e faataitai ai le faaaogaina o le Tusi a Mamona e saili ai ma faasoa atu tali i nei fesili. Faaali atu faatonuga nei:

Sue le vaega ua faaulutalaina “O Le Tusi a Mamona o loo Talanoaina ai Fesili o le Agaga” i le mataupu e 5 o le Tala’i La’u Talalelei (itulau e 117–18).
Filifili se fesili mai lena vaega e te manao e taulai atu i ai.
Faitau mau e fesootai ai ma mafaufau pe faapefea ona fesoasoani na mau i le fesili na e filifilia.
Sauni e faasoa atu se tasi o fuaiupu na e suesueina ma faamatala pe faapefea ona taliina le fesili.

Taitai o talanoaga: Vaevae le vasega ini paga. Valaaulia tagata taitoatasi o le vasega e faasoa mai mea na latou saunia mo le laasaga 4 i a latou paga. A mae’a ona aoao e paga le tasi ma le isi, e mafai ona e mafaufau e tofia i laua i ni paaga eseese, ina ia mafai ona la faataitai le aoao atu i se isi taimi.

Mo nisi faataitaiga, e mafai ona e faaaogaina le Tomai Faataitai 1: “Faailoa atu le Tusi a Mamona i Tagata.”

Faatu se sini

Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatu se sini. O se tasi o auala e mafai ona e faia ai lenei mea o le faasoa atu lea o le saunoaga lenei a Elder Ronald A. Rasband ma le valaaulia o loo i lalo:

Ou te valaaulia outou i le asō, e tuu atu se Tusi a Mamona i au uo ma aiga, o au uo mamae i le galuega, o lou faiaoga soka, po o le tamaloa o faatau fua o faatoaga i le tou maketi. Latou te manaomia afioga a le Alii o loo maua i lenei tusi. Latou te manaomia tali i fesili o le olaga i aso faisoo ma le ola e faavavau a sau. Latou te manaomia ona iloa le ala o feagaiga ua faataatia i o latou luma ma le alofa tumau o le Alii mo i latou. O loo i ai uma iinei i le Tusi a Mamona.

Pe a e tuu atu ia i latou se Tusi a Mamona, ua e tatalaina o latou mafaufau ma loto i le afioga a le Atua. E le tau manaomia ona e feaveaʼia ni kopi lolomi o le tusi. E faigofie lava lou faasoa atu mai lau telefoni feaveaʼi mai le vaega o tusitusiga paia i le polokalama o le Potutusi o le Talalelei. (“O Le Aso Nei,” Liahona, Nov. 2022, 27)

Mafaufau }ma le agaga tatalo i se tasi e mafai ona e faasoa atu i ai le Tusi a Mamona. Fuafua po o le a se mea e mafai ona e aoao atu ia i latou e uiga i le Tusi a Mamona ma po o le a se isi mea e te ono fai atu ai. Tusifaamaumau lau fuafuaga.

O La’u sini

O le a ou… (faatinoga o le a e faia).
O le a ou ausia la’u sini e ala i le … (o se fuafuaga faigofie).

Taitai o talanoaga: Afai e i ai se vaega o tupulaga a tagata aoao e faasoa atu a latou sini i le vasega atoa, tuu atu ia i latou se taimi e faasoa mai ai pe faapefea ona latou lagolagoina pe faamanatu atu e le tasi i le isi a o lei amataina le isi vasega.