Lesona 2

Faatomuaga i le Tala’i La’u Talalelei

Faifeautalai o loo suesueina le Tala’i La’u Talalelei

“O leTala’i La’u Talalelei o se punaoa taua e le mo na o faifeautalai ae mo tagata uma o le Ekalesia” (Tala’i La’u Talalelei [2023], ix). O lenei punaoa musuia e mafai ona fesoasoani i faifeautalai e faataunuu ai lo latou faamoemoega o le valaauliaina o isi e o mai ia Keriso. E mafai foi ona fesoasoani ia i tatou e latalata atili atu ai i le Faaola ma malamalama atili ai i Lana aoaoga faavae.

Iloilo ma Toe Tulitatao

Taitai o talanoaga: Valaaulia tagata aoao e mafaufau i a latou taumafaiga i le taimi nei e faaaoga mea o loo latou aoaoina i le vasega lenei. E mafai ona e valaaulia i latou e fefaasoaai ma se paga pe faatasi o se vasega nisi o a latou taumafaiga.

Gaoioiga Faatino Fautuaina e Aoao Ai

E faapefea e le suesueina o le Tala’i La’u Talalelei ona faamanuiaiaina ai lo’u olaga?

Suesue

Taitai o talanoaga: Faaali atu se ata o le Tala’i La’u Talalelei, pe tuu i luga se kopi o le tusi mo le vasega e vaai i ai. Valaaulia ni nai tagata o le vasega e faasoa mai mea latou te iloa e uiga i ai po o a foi aafiaga na latou maua i le suesueina.

Taitai o talanoaga: Faamalamalama atu faapea i lenei lesona, o le a aoao atili ai tagata o le vasega e uiga i le Tala’i La’u Talalelei. Faasoa atu faatonuga nei.

Nai lo le faaaogaina o le saunoaga mai ia Peresitene Nelson, e mafai ona e faaali atu le vitio “Ua Faailoa Mai e Peresitene Russell M. Nelson le Tala’i La’u Talalelei, Lomiga Lua” (2:58).

Suesue le “Savali a le Au Peresitene Sili” (Tala’i La’u Talalelei, v) ma le saunoaga lenei mai ia Peresitene Russell M. Nelson. Ia gauai atu i le auala e mafai ai e le suesueina o le Tala’i La’u Talalelei ona faamanuiaina ai oe.

O loo i ai i leTala’i La’u Talalelei nisi o faatonuga sili ua ou vaai i ai e fesoasoani ai i tagata e talia le valaaulia a le Alii e o mai ia te Ia.

Ou te valaaulia outou ia olioli i le faatamaoaigaina o la outou lava molimau lea e mafai ona maua mai i le tusi lesona ua faafouina o le Tala’i La’u Talalelei . O le a e lagonaina le avanoa e fesoasoani ai i lo tatou Tama oi le Lagi i Lana galuega paia. A o e suesue ma faaaoga aoaoga mai le lomiga lona lua o le Tala’i La’u Talalelei mai tusitusiga paia, ma mai perofeta soifua, o le a faamanuiaina oe. O le a faatamaoaigaina lau lava molimau. O le a faateleina lou gafatia e faasoa atu ai le talalelei a le Faaolaa.” (I le D. Todd Christofferson, Faaaoga le Mana o le Tusi a Mamona.[savali na tuuina atu i le semina mo taitai fou o misiona, 23 Iuni, 2023], Potutusi o le Talalelei)

O a ni faamanuiaga folafolaina sa tulaga ese ia te oe? Aisea?

Faataitai

O Le a le Mea o i Totonu o le Tala’i La’u Talalelei?

Vaai faalemafaufau i taitai o lau uarota ua mananao e fesoasoani i le autalavou e amata ona suesue mai le Tala’i La’u Talalelei. Sa latou faalogo sa e i ai i se vasega sauniuni mo faifeautalai, ma ua latou valaaulia oe e saunia se vaaiga aoao e tolu minute e faasoa i le autalavou.

Saunia le vaaiga aoao lenei e ala i le faamaumauina o au tali i fesili nei ma faamae’a le gaoioiga lenei. Faailoga faamatalaga mai le Tala’i La’u Talalelei e fesoasoani e tali ai nei fesili.

O le a le Tala’i La’u Talalelei? (tagai i le “Savali a le Au Peresitene Sili” [Tala’i La’u Talalelei, v]; “Folasaga i le Tala’i La’u Talalelei” [Tala’i La’u Talalelei, vii–ix]).
E mafai faapefea e le suesueina o le Tala’i La’u Talalelei ona fesoasoani ia te oe ma isi ia latalata atili atu ai i le Tama Faalelagi ma Iesu Keriso? (tagai i le “Faaaogaina o le Tala’i La’u Talalelei e Tagata o le Ekalesia” Tala’i La’u Talalelei, ix).

Fai se malaga taamilo i le Tala’i La’u Talalelei e ala i le faia o mea nei:

Saili le “Folasaga i le Tala’i La’u Talalelei,” ma vaai i vaega togia o loo faamatala ai le auala e faatulaga ai le Tala’i La’u Talalelei (tagai itulau vii).
Suesue i le mataupu e 3 e iloa ai mea o loo aoao atu e faifeautalai. Faitau parakalafa muamua e lima (i le itulau e 25), ona vave lea ona vaai i lesona e fa o loo i le vaega o totoe o le mataupu.
Filifili se tasi o mataupu nei e suesue i ai: 1, 2, 4, 5, po o le 6. Faitau ulutala o le mataupu ua faamatamatateteleina.
E faavae i mea na e maua i le Tala’i La’u Talalelei, o le a se mea e te lagona e sili ona aoga e faasoa atu i lau vaaiga aoao?

Taitai o talanoaga: A uma le taimi mo sauniuniga, valaaulia tagata o le vasega e faasoa atu a latou vaaiga aoao i se paga. A uma ona latou faasoa atu a latou vaaiga aoao, e mafai ona e fai atu se fesili faapenei:

E mafai faapefea e le suesueina ma le filigā o le Tala’i La’u Talalelei faatasi ai ma tusitusiga paia ona fesoasoani ia te oe e te latalata atili atu ai i le Tama Faalelagi ma Iesu Keriso?

Faatu se sini

Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatutu ni sini. E mafai foi ona e faaali atu faatonuga nei e fesoasoani ai ia i latou.

Faatu se sini e fesootai i mea ua e suesueina. Faaaoga nisi o manatu nei, pe mafaufau i ni a oe lava manatu.

Fuafua pe faapefea ona e faaaogaina le Tala’i La’u Talalelei o se vaega o lau suesuega o le talalelei.
Suesue se lesona se tasi pe sili atu o lesona o loo aoao atu e faifeautalai i le mataupu e 3 o le Tala’i La’u Talalelei.

O La’u sini

O le a ou… (faatinoga o le a e faia).
O le a ou ausia la’u sini e ala i le … (o se fuafuaga faigofie).

Taitai o talanoaga: Afai e i ai se vaega a tagata aoao e faasoa atu iai a latou sini, tuu atu ia i latou se taimi e faasoa atu ai pe faapefea ona latou lagolagoina pe faamanatu atu e le tasi i le isi a o lei amataina le isi vasega.

Le isi taimi

Taitai o talanoaga: Afai ua e saunia e aoao atu le lesona 3 i le isi taimi, mafaufau e valaaulia tagata o le vasega e suesue le mataupu 1 o le Tala’i La’u Talalelei e sauniuni ai. Atonu foi e te manao e auina atu ia i latou se faamanatu.

O Le A Se Mea o i Totonu o le Tala’i La’u Talalelei?