Lesona 13

Agai i Luma i le Faatuatua

Ua faamoemoe lenei lesona e fesoasoani ai i tagata aoao e iloilo lo latou alualu i luma ma le tuputupu a’e o ni soo o Iesu Keriso i le taimi o lo latou auai i le vasega o Sauniuniga mo Faifeautalai.

Iloilo ma Toe Tulitatao

Taitai o talanoaga: Valaaulia tagata aoao e mafaufau i a latou taumafaiga i le taimi nei e faaaoga mea o loo latou aoaoina i le vasega lenei. E mafai ona e valaaulia i latou e fefaasoaai ma se paga pe faatasi o se vasega nisi o a latou taumafaiga.

Gaoioiga Fautuaina e Aoao Ai

Manatunatu i le tuputupu a’e faaleagaga

Taitai o talanoaga: E mafai ona e faaali atu ata o Iesu Keriso o loo tatalo ma Iosefa Samita o faitauina le Tusi Paia. Valaaulia tagata aoao e mafaufau loloto i ata a o latou faitauina le Mareko 1:35; Luka 6:12; ma le Iosefa Samita—Talafaasolopito 1:12–13. Fautuaina i latou e vaavaai mo se savali masani i nei fuaiupu.

iosefa samita o loo suesueina tusitusiga paia

O le a le mea o fai mai tusitusiga paia na faia e le Faaola ma Iosefa Samita ina ia tuputupu a’e ai faaleagaga?
Na faapefea ona suia le olaga o Iosefa Samita e ala i le toe mafaufau i mea sa ia faitauina i le Iakopo 1:5?

Taitai o talanoaga: Faamalamalama atu o le faaaluina o se taimi e mafaufau loloto ai ma le agaga tatalo i lo tatou alualu i luma faaleagaga e mafai ona fesoasoani ia i tatou e maua ai le taitaiga mai le Alii.

Ina ia fesoasoani i tagata o le vasega e faia lenei mea, e mafai ona e tusia ni ata faamata’osi se tolu i luga o le laupapa ma faaigoa i latou Amataga o le Vasega, Aso Nei, ma le Ono Masina mai le Taimi Nei. Ona faasoa atu lea o faatonuga o loo i lalo:

Manatunatu i lou tuputupu a’e faaleagaga talu ona e amataina lenei vasega. Ma le isi, mafaufau i le alualu i luma o loo e manao pea e fai. Tusi i lalo ou lagona ma uunaiga faaleagaga. O fesili faapenei e mafai ona fesoasoani:

Toe tepa i tua

Faatusatusa i lou saunia ae e te le’i auai i lenei vasega, o a nisi o auala ua e lagonaina nei ua sili atu ona e saunia ai e auauna atu i se misiona pe faasoa atu le talalelei i isi?
E faapefea ona e aafia i le suesueina o le Tala’i La’u Talalelei ?
Ua faapefea ona suia lau sootaga ma le Tama Faalelagi ma Iesu Keriso.
O a ni aafiaga i le taimi o le vasega po o fafo atu na faia ai se eseesega mo oe?

Agai i luma

O le a se mea o loo e manao pea e fai e faaauau ai ona sauniuni mo le galuega faafaifeautalai? O le a sou lagona i isi laasaga e tatau ona ausia ai nei sini?
O ai e te manao e fesoasoani i ai ia latalata atili i le Tama Faalelagi ma Iesu Keriso? O le a se mea o le a e faia e fesoasoani ai ia i latou?

Taitai o talanoaga: Valaaulia tagata aoao e talanoaina tali latou te lagona le fiafia e faasoa atu i se paga po o se vaega toalaiti. E mafai foi ona avea lenei mea ma se taimi lelei e valaaulia ai tagata naunautai o le vasega e faasoa atu a latou molimau ia Iesu Keriso ma Lana talalelei i le vasega.

Mafaufau e faaiu i le faasoa atu o le saunoaga lenei a Elder David A. Bednar:

E mafai ona faateleina lou naunau e auauna atu i le Atua, ma e mafai ona amata ona e mafaufau e pei ona mafaufau faifeautalai, faitau mea e faitauina e faifeautalai, tatalo e pei ona tatalo ia faifeautalai, ma lagona mea o loo lagonaina e faifeautalai. E mafai ona e aloese mai aafiaga faalelalolagi lea e mafua ai ona aluese le Agaga Paia, ma e mafai ona e tuputupu a’e i le mautinoa i le iloaina ma tali atu i uunaiga faaleagaga. O lea upu ma lea upu ma lea mataupu ma lea mataupu, sina mea itiiti ii ma sina mea itiiti i o, o le a iu ai ina avea oe ma faifeautalai lea e te faamoemoe e avea ai ma o loo faamoemoeina mai e le Faaola. (“Avea ma se Faifeautalai,” Liahona, Nov. 2005, 46)

Taitai o talanoaga: Faaali atu lou alofa mo tagata auai, lau molimau i le Faaola, ma ou lagona e uiga i le taua o le talaiina o Lana talalelei. Fautuaina tagata aoao e agai i luma i le faatuatua i a latou sauniuniga, ina ia mafai ona avea i latou ma faifeautalai ma soo e finagalo le Alii ia avea ai i latou.