Lesona 8

Saili ma Faalagolago i le Agaga

Tala’i La’u Talalelei, Mataupu e 4

“O le meaalofa o le Agaga Paia o se tasi lea o meaalofa silisili ua tuuina mai e le Atua i Ana fanau” (Talai La’u Talalelei: O Se Taiala i le Faasoaina Atu o le Talalelei a Iesu Keriso, [2023], 101). Ua molimau mai le Agaga ia Iesu Keriso ma le moni o le talalelei. E liua tagata ia Keriso e ala i le mana o le Agaga Paia. A o saili ma faalagolago faifeautalai i le Agaga Paia, e mafai ona latou fesoasoani e aumai Lana uunaiga i olaga o i latou latou te aoaoina.

Iloilo ma Toe Tulitatao

Taitai o talanoaga: Valaaulia tagata aoao e mafaufau i a latou taumafaiga i le taimi nei e faaaoga mea o loo latou aoaoina i le vasega lenei. E mafai ona e valaaulia i latou e fefaasoaai ma se paga pe faatasi foi o se vasega nisi o a latou taumafaiga.

Filifiliga o Gaoioiga e Aoao Ai

Taitai o talanoaga: Filifili ma le agaga tatalo ia vaega e aoao ai e sili ona aoga mo lau vasega. Ia mautinoa e tele se taimi e tuu e faataitai ai ma faatatau.

Filifiliga A: O le a le matafaioi e faia e le Agaga Paia i le galuega faafaifeautalai?

Suesue

Taitai o talanoaga: Mafaufau e amata lenei gaoioiga e aoao ai i le talanoaina o le saunoaga lenei a le Perofeta o Iosefa Samita.

E tatau i tagata uma ona talai atu le Talalelei, e ala i le mana ma le uunaiga a le Agaga Paia; ma e leai se tagata e mafai ona talai atu le Talalelei e aunoa ma le Agaga Paia. (Aoaoga a Peresitene o le Ekalesia: Iosefa Samita [2007], 332)

Aisea e te manatu ai o loo faia e le Agaga Paia se matafaioi taua tele i le talaiina atu o le talalelei a Iesu Keriso?

Taitai o talanoaga: Valaaulia tagata aoao e sue le mataupu e 4 o le Tala’i La’u Talalelei. Faamalamalama atu o loo faamatala mai i lenei mataupu auala e mafai ai e le Agaga Paia ona fesoasoani ia i tatou, i le galuega faafaifeautalai ma i o tatou olaga patino. Faasoa atu faatonuga nei e fesoasoani ai i tagata o le vasega e amata a latou suesuega o lenei mataupu.

Suesue parakalafa o loo i lalo o ulutala “Saili le Taitaiga a le Agaga Paia” ma le “O Le Mana o le Agaga i le Liuaina” (Tala’i La’u Talalelei, 101; 103–4).
Suesue ia le itiiti ifo ma le lua ni fuaitau o loo lisiina i le pusa “Suesueina o Tusitusiga Paia” i lalo o le ulutala “O Le Mana o le Agaga i le Liuaina” (Tala’i La’u Talalelei, 104).
E faavae i mea ua e aoaoina, ia saunia e faasoa atu au tali i fesili nei:
- E mafai faapefea ona fesoasoani le Agaga Paia ia te au e talai atu le talalelei a le Faaola?
- O le a le matafaioi e faia e le Agaga Paia e fesoasoani ai i tagata ia o mai ia Keriso?
- O le a se mea e mafai ona ou faia e valaaulia ai le Agaga a o ou faasoa atu le talalelei a Iesu Keriso?

Taitai o talanoaga: Afai e lava le taimi, e mafai foi ona e faaali atu le vitio “The Role of the Holy Ghost in Conversion” (ChurchofJesusChrist.org; matamata mai le taimi faailo 0:00 i le 4:05). E mafai e tagata o le vasega ona vaavaai mo ni tali faaopoopo i fesili e tolu.

Faataitai

Taitai o talanoaga: Tuu atu i tagata auai se taimi e aoao atu ai se paga po o se vaega toalaiti e uiga i mea sa latou aoaoina mai le gaoioiga suesue na muamua atu. Mafaufau e faaali atu faatonuga nei e taiala ai i latou i a latou faasoa atu:

Faasoa atu au tali i fesili e tolu mai le gaoioiga suesue na muamua atu:
1. E mafai faapefea ona fesoasoani le Agaga Paia ia te au e talai atu le talalelei a le Faaola?
2. O le a le matafaioi e faia e le Agaga Paia e fesoasoani ai i tagata ia o mai ia Keriso?
3. O le a se mea e mafai ona ou faia e valaaulia ai le Agaga a o ou faasoa atu le talalelei a Iesu Keriso?
Faasoa atu se mau na e maua. Faamatala pe faapefea ona fesootai lena mau i se tasi o fesili e tolu na talanoaina muamua.
Faasoa atu se aafiaga patino po o lau molimau e uiga i le auala e mafai ai e le Agaga Paia ona fesoasoani ia i tatou.

Faatu se sini

Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:

Faatu se sini e faatatau i mea ua e suesueina. Faaaoga manatu e pei o nei, pe mafaufau foi i ou lava manatu.

I le faaaogaina o meafaigaluega suesue e pei o le Taiala i Tusitusiga Paia po o le Taiala o Autu, suesue atili e uiga i matafaioi eseese a le Agaga Paia. Mafaufau pe faapefea ona fesoasoani le Agaga Paia ia te oe i le taimi nei ma o se faifeautalai.
Fuafua po o a ni fetuunaiga e mafai ona e faia o le a valaaulia ai le Agaga Paia i lou olaga e le aunoa.

O La’u sini

O le a ou … (faatinoga o le a e faia).
O le a ou ausia la’u sini e ala i le … (o se fuafuaga faigofie).

Taitai o talanoaga: Afai e i ai se vaega o tupulaga a tagata aoao e faasoa atu a latou sini i le vasega atoa, tuu atu ia i latou se taimi e faasoa mai ai pe faapefea ona latou lagolagoina pe faamanatu atu e le tasi i le isi a o le’i amataina le isi vasega.

Filifiliga E: E mafai faapefea ona ou iloaina musumusuga a le Agaga?

Suesue

Taitai o talanoaga: Valaaulia tagata auai e talanoaina ma se paga le vaaiga faataitai lenei.

Vaai faalemafaufau faapea na fesili atu se tasi ia te oe pe faapefea ona iloa le eseesega i le va o uunaiga mai le Agaga Paia ma ou lava mafaufauga ma lagona.

E faapefea ona e tali atu i ai?

Taitai o talanoaga: Faamalamalama atu o se mea masani mo tagata le i ai o ni fesili pe o le a se faalogona o e i ai o le Agaga Paia. E mafai ona e valaaulia tagata aoao e mafaufau i nisi o a latou lava fesili. Fautuaina i latou a o latou suesue e vaavaai mo upumoni e mafai ona fesoasoani ia i latou e iloa ai auala e mafai ai e le Agaga Paia ona fesootai ma i latou.

Faaali atu faatonuga nei e fesoasoani e taiala ai tagata aoga i a latou suesuega. E mafai ona e tofia le afa o le vasega e suesue i le filifiliga 1, ae o le isi afa e suesue i le filifiliga 2.

Filifili se tasi o filifiliga suesue nei mai le mataupu e 4 o le Tala’i La’u Talalelei e faaloloto ai lou malamalama e uiga i le iloaina o le Agaga Paia:

Suesue le “Aoao ia Iloa Uunaiga a le Agaga” (Tala’i La’u Talalelei, 106--7).
Faitau faamatalaga e uiga i le Agaga Paia i le pusa “Suesuega Faaletagata Lava Ia” (Tala’i La’u Talalelei, 107–8). Suesue nisi o mau o loo lisiina e foliga mai e sili ona manaia ia te oe.

Taitai o talanoaga: A uma ona maua se taimi e suesue ai tagata o le vasega, valaaulia i latou e talanoaina fesili nei ma se paga. (Afai na tofia tagata aoao e suesue se filifiliga, ia mautinoa ua latou faipaaga ma se tasi na suesueina le isi filifiliga.)

O a ni malamalamaaga na e maua e uiga i le auala e fesootai mai ai le Atua ia i tatou e ala i le Agaga Paia?
O a ni faataitaiga ua e lagona e faamatala ai ou aafiaga patino ma le Agaga Paia?

Taitai o talanoaga: Afai e lava le taimi, e mafai foi ona e faaali atu le vitio “Elder and Sister Bednar—Recognizing the Spirit” (ChurchofJesusChrist.org; matamata mai le taimi faailo 0:38 i le 3:11). Valaaulia tagata auai e talanoaina ni malamalamaaga faaopoopo na latou mauaina.

Faataitai

Taitai o talanoaga: Faamalamalama atu e i ai nisi mea e tatau ona faaeteete i ai pe a aoao pe faapefea ona taialaina e le Agaga Paia. Valaaulia tagata aoao e sue le vaega “O Nisi o Upu o le Lapataiga” (Tala’i La’u Talalelei, 109–10).

Faaali atu vaaiga faataitai nei pe lolomi mo tagata o le vasega. Mo vaaiga faataitai taitasi, valaaulia tagata aoao e faasoa mai lapataiga mai le Tala’i La’u Talalelei latou te lagona e aoga e mafaufau i ai. E mafai ona faia lenei gaoioiga o se vasega pe i ni vaega toalaiti.

O loo sailia e se tagata le taitaiga ma le faatonuga mo se mea e taua ia i latou. Latou te tatalo ma ole atu i le Tama Faalelagi e tuuina mai se tali i le faaiuga o le vaiaso.
Ua e matauina pe a latou lagonaina le Agaga, o le a sili atu ona ootia faalelagona isi nai lo oe. E te mafaufau pe i ai se mea o faaletonu ia te oe.
E lagona e se tagata e pei ua latou mauaina le taitaiga mai le Agaga e faia ai se mea e feteenai ma aoaoga a perofeta ma aposetolo.
Sa matuai tafafao faamasani lava se alii talavou ma se tamaitai talavou. I se tasi aso sa ia fai atu ai ia te ia, “Ua ou maua musumusuga e tatau ona e faaipoipo mai ia te au.”
Ua taliaina se tagata i ni iunivesite eseese se lua. E ui lava i le anapogi ma le tatalo, latou te le o lagonaina e pei o loo ta’u atu e le Alii ia i latou po o le fea aoga e auai.

Faatu se sini

Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:

Faatu se sini e faatatau i mea ua e suesueina. Faaaoga manatu e pei o nei, pe mafaufau foi i ou lava manatu.

Mo nai aso o sosoo ai, ia gauai lelei atu i auala eseese e te lagonaina ai le Agaga Paia o taialaina oe po o le auala e te oo ai i fua o le Agaga (tagai Kalatia 5:22–23). Tusifaamaumau ou aafiaga.
Suesue mau taitasi o loo lisiina i le pusa “Suesuega Faaletagata Lava Ia” i le itulau e 107 o le Tala’i La’u Talalelei. Faamaumau ni malamalamaaga e te maua e uiga i le auala e lagona ai ma iloa ai le Agaga.

O La’u sini

O le a ou … (faatinoga o le a e faia).
O le a ou ausia la’u sini e ala i le … (o se fuafuaga faigofie).

Filifiliga I: E mafai faapefea ona ou faalagolago atili i le Agaga?

Suesue

Taitai o talanoaga: Talanoaina le saunoaga lenei a Peresitene Russell M. Nelson ma le fesili o loo i ai faatasi.

O’u uso e ma tuafafine pele, ou te aioi atu ia te outou ia faateleina lo outou gafatia faaleagaga e maua ai faaaliga. … Filifili e fai le galuega faaleagaga o loo manaomia ona faia ina ia olioli ai i le meaalofa o le Agaga Paia ma faalogo atu ai pea ma le manino atili i le siufofoga o le Agaga. (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96)

Aisea e te manatu ai e taua le maua soo o le taitaiga ma faaaliga mai le Agaga Paia?

Taitai o talanoaga: Valaaulia tagata o le vasega e mafaufau pe faafia ona latou lagonaina le taialaina e le Agaga Paia. Fautuaina i latou a o latou suesue e vaavaai mo aoaoga e mafai ona fesoasoani ia i latou e maua soo ai le taitaiga a le Alii e ala i le Agaga.

Valaaulia tagata aoao e sue le mataupu e 4 o le Tala’i La’u Talalelei. Ona faaali atu lea o faatonuga nei:

Faitau le vaega ua faaulutalaina “Faalagolago i le Agaga” i le Tala’i La’u Talalelei (itulau e 108). Vaavaai mo mafuaaga e taua ai le mauaina o le mafutaga a le Agaga a o e faia le galuega a le Alii.

O le a se mea na e aoaoina e uiga i le mafuaaga e taua ai le faalagolago i le Agaga Paia?
O le a se mea e mafai ona faalavelave i le faalagolago atoatoa i le Agaga?
O le a se mea na fesoasoani ia te oe e lagona ai le tosinaga sili atu a le Agaga i lou olaga?

Faataitai

Taitai o talanoaga: Ina ia fesoasoani i tagata aoao ia iloa faataitaiga o auala e mafai ai e le Alii ona taialaina i latou e ala i le Agaga a o latou faasoa atu Lana talalelei, valaaulia i latou e sue le pusa “Suesuega o Tusitusiga Paia” i le faaiuga o le vaega “Faalagolago i le Agaga” (Tala’i La’u Talalelei, 108). Talanoaina faapuupuu le taua o fesili e fa o loo i le pusa. Ona vaalaaulia lea o tagata aoao e fai mea nei:

Vaai faalemafaufau o oe o se faifeautalai fou ma ua talosagaina e tuuina atu se lauga i le isi au fonotaga a le itu e sosoo ai e uiga i le autu “E Mafai Faapefea Ona Tatou Faalagolago Atili i le Agaga Paia?” I le faaaogaina o le pusa “Suesuega o Tusitusiga Paia” i le faaiuga o le vaega “Faalagolago i le Agaga” (Tala’i La’u Talalelei, 108), saunia se lauga e lua i le tolu minute e talanoaina ai lenei fesili. Faamaumau mataupu faavae ma malamalamaaga e te manao e faasoa atu i lau lauga.

Taitai o talanoaga: A mae’a ona suesue tagata aoao, tuu atu ia i latou se taimi e faasoa atu ai a latou lauga i se paga.

Faatu se sini

Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:

Faatu se sini e faatatau i mea ua e suesueina. Faaaoga manatu e pei o nei, pe mafaufau foi i ou lava manatu.

Tauloto se mau e uiga i le Agaga Paia, e pei o se tasi o nei mau: 1 Nifae 4:6; 2 Nifae 32:5; Moronae 10:5; po o le Mataupu Faavae ma Feagaiga 8:2.
Faailoa mai mea e mafai ona e amata faia ma mea e mafai ona e taofia e fesoasoani ai ia te oe ia mafuta soo ma le Agaga Paia.

O La’u sini

O le a ou … (faatinoga o le a e faia).
O le a ou ausia la’u sini e ala i le … (o se fuafuaga faigofie).

Le isi taimi

Taitai o talanoaga: Afai e te fuafua e aoao atu le lesona 9 i le vasega e sosoo ai, mafaufau e valaaulia tagata o le vasega e suesue le mataupu e 5 o le Tala’i La’u Talalelei e sauniuni ai. Atonu e te manao e auina atu ia i latou se faamanatu.