Lesona 12
Fetuunai i le Olaga Faafaifeautalai
O sauniuniga mo faifeautalai e aofia ai le saunia mo manaoga faaletino, faaleagaga, faalelagona, ma faalemafaufau o le galuega faafaifeautalai. O leFetuunai i le Olaga Faafaifeautalai (2013) e mafai ona fesoasoani i faifeautalai ma i latou o loo sauniuni mo misiona e faafoefoe nei manaoga. O loo tuuina mai ai taiala e mafai ona fesoasoani ia i tatou e maua ai le malosi o le Alii ma maua ai le olioli i le galuega faafaifeautalai.
Iloilo ma Toe Tulitatao
Taitai o talanoaga: Valaaulia tagata aoao e mafaufau i a latou taumafaiga i le taimi nei e faaaoga mea o loo latou aoaoina i le vasega lenei. E mafai ona e valaaulia i latou e fefaasoaai ma se paga pe faatasi foi o se vasega nisi o a latou taumafaiga.
Filifiliga o Gaoioiga e Aoao Ai
Taitai o talanoaga: Filifili ma le agaga tatalo ia vaega e aoao ai e sili ona aoga mo lau vasega. Ia mautinoa e tele se taimi e tuu e faataitai ma faatatau ai.
Manatua: E tele tomai e fesootai ma autu o loo i lenei lesona. Mafaufau e faaaoga se tasi o mea nei i le piriota lava lea e tasi o le vasega e te aoao atu ai se gaoioiga e aoao ai mai lenei lesona: “Talanoa i Tagata Uma,” “Tali Atu i Lagona o le Le Agavaa,” “Manava Faamoemoeina,” ma le “Atiina A’e o Mamanu o Mafaufauga Maloloina.”
Filifiliga A: O le a se mea e mafai ona fesoasoani ia te a’u e fetuunai ai i le olaga faafaifeautalai?
Suesue
Taitai o talanoaga: Valaaulia tagata o le vasega e mafaufau i taimi na manaomia ai ona latou fetuunai i tulaga fou i o latou olaga. O faataitaiga e mafai ona aofia ai le siitia atu i se aiga fou, auai i le Ekalesia, suia o aoga, feiloai i se tagata fou, po o le amataina o se galuega fou. Fai atu ia i latou e faasoa mai pe na faapei lo latou aafiaga. O fesili e pei o fesili nei e ono fesoasoani i lenei talanoaga:
-
O le ā le mea na lē fiafia ai i le suiga?
-
O le ā le mea na fiafia ai?
-
O le ā se mea na fesoasoani iā te oe e fetuuna’i ai i lou tulaga fou?
Taitai o talanoaga: Faaali atu se ata se tasi pe sili atu o faifeautalai faamisiona, e pei o ata nei. Valaaulia tagata aoao e faasoa mai mea latou te lagona e fiafia i ai e uiga i le avea ma se faifeautalai faamisiona ma mea e ono faigata ai.
Taitai o talanoaga: Faamalamalama atu o lenei gaoioiga e aoao ai, o le a faamasani ai tagata o le vasega i se punaoa ua faaulutalaina Fetuunai i le Olaga Faafaifeautalai (2013). Fesoasoani ia i latou e sue le Fetuunai i le Olaga Faafaifeautalai i le Potutusi o le Talalelei (Potutusi > Tusitaulima ma Valaauga > Valaauga o le Misiona > Fetuunai i le Olaga Faafaifeautalai). Faailoa atu lenei punaoa e ala i le faasoaina atu o faatonuga nei:
Faitau le “O Le Atuatuvale o se Vaega Masani o le Olaga” i le vaega “Malamalama i le Atuatuvale” o le Fetuunai i le Olaga Faafaifeautalai (itulau 3). Vaavaai mo le faamoemoega o lenei tamaitusi.
-
E faapefea ona fesoasoani lenei punaoa ia te oe i le taimi nei ma le lumanai?
Faataitai
Taitai o talanoaga: O le gaoioiga lenei e mafai ona fesoasoani i tagata o le vasega ia maua se aafiaga patino e faamasani ai i le Fetuunai i le Olaga Faafaifeautalai. E mafai foi ona saunia ma musuia ai i latou e suesue atili mai lenei punaoa na o i latou lava.
Faaali atu nei faatonuga ma tuu atu i tagata aoao pe tusa ma le 10–15 minute e faamae’a ai le gaoioiga.
-
Faitau le “Faamaumauga o le Iloiloga Faaletagata Lava Ia” i le Fetuunai i le Olaga Faafaifeautalai (itulau 11).
-
Filifili se tasi o vaega mai le iloiloga faaletagata lava ia (Lautele, Faaletino, Faalelagona, Faaleagafesootai, Faaleatamai, Faaleagaga) e te fia aoao atili ai.
-
Saili le vaega o le Fetuunai i le Olaga Faafaifeautalai e fesootai ma le vaega na e filifilia. Suesue vaega o lena vaega e sili ona talafeagai ia te oe. Vaavaai mo ma mafaufau e faailoga aoaoga e mafai ona fesoasoani ia te oe i lou tulaga o i ai nei.
Taitai o talanoaga: A mae’a ona suesue tagata o le vasega, valaaulia i latou e faasoa mai mea na latou aoaoina i se paga po o se vaega toalaiti. E mafai ona e faaali atu fesili nei ma valaaulia paga po o tagata o le vaega e talanoaina faatasi:
-
O a nisi o fautuaga po o aoaoga na e iloa e sili ona aoga?
-
O le a se mea na e aoaoina e uiga i le auala e mafai ai e le Alii ona fesoasoani ia te oe e fetuunai i manaoga o le olaga i le taimi nei ma mulimuli ane o se faifeautalai?
Faatu se sini
Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:
Faatu se sini e faatatau i mea ua e suesueina. Faaaoga manatu e pei o nei, pe mafaufau foi i ou lava manatu.
-
Faaauau pea ona suesue le vaega o le Fetuunai i le Olaga Faafaifeautalai na amata ona e suesueina i lenei gaoioiga e aoao ai. Saili ni fautuaga e mafai ona e amata faaaogaina i lou olaga.
-
Fatu se fuafuaga mo le suesueina o isi vaega o le Fetuunai i le Olaga Faafaifeautalai.
O La’u sini
-
O le a ou … (faatinoga o le a e faia).
-
O le a ou ausia la’u sini e ala i le … (o se fuafuaga faigofie).
Taitai o talanoaga: Afai e i ai se vaega o tupulaga a tagata aoao e faasoa atu a latou sini i le vasega atoa, tuu atu ia i latou se taimi e faasoa mai ai pe faapefea ona latou lagolagoina pe faamanatu atu e le tasi i le isi a o le’i amataina le isi vasega.
Filifiliga E: E faapei le avea ma se faifeautalai faamisiona?
Suesue
Taitai o talanoaga: Mafaufau e tusi tali a tagata aoga i le fesili lenei i luga o le laupapa.
-
O a ni au fesili e uiga i le tulaga o le avea ma se faifeautalai faamisiona?
-
E faapefea ona manaomia e faifeautalai ona faatino le faatuatua ia Iesu Keriso?
-
O le a se mea e mafai ona e faia i le taimi nei e saunia ai mo le olaga o se faifeautalai?
Taitai o talanoaga: I le avea ai o se vaega o lau tou talanoaga, e mafai ona outou talanoaina lenei saunoaga a Elder David A. Bednar.
O le mea sili ona taua e tasi e mafai ona e faia ina ia saunia ai mo se valaauga e auauna atu, o leavealea ma se faifeautalai a o le’i taitai ona e alu i se misiona. (“Avea ma se Faifeautalai,” Liahona, Nov. 2005, 45)
-
O le a sou manatu i le uiga o le avea ma se faifeautalai ae e te le’i alu i se misiona?
Taitai o talanoaga: Faamalamalama atu o lenei gaoioiga e aoao ai o le a fesoasoani i tagata o le vasega e saili tali i nisi o a latou fesili. Faaaoga se manatu se tasi pe sili atu o manatu nei e fesoasoani ai ia i latou ia malamalama lelei pe faapei le auaunaga faafaifeautalai faamisiona.
-
Valaaulia ni nai faifeautalai faatoa foi mai e o mai i le vasega ma tali fesili a tagata auai (mafaufau e valaaulia uma faifeautalai tala’i ma auaunaga). E mafai foi ona latou faamatalaina se aso masani mo se faifeautalai. Uunaia faifeautalai ua toe foi mai e faamatala mai pe na faapefea ona latou lagonaina le fesoasoani a le Alii ma tuputupu a’e latalata atili atu ia te Ia i le taimi o la latou galuega faafaifeautalai.
-
Faaali atu se tasi o vitio nei o loo faaalia ai le tulaga o le i ai i le Nofoaga Autu mo le Aoaoina o Faifeautalai: “The England Missionary Training Centre” (3:06; ChurchofJesusChrist.org) po o le “Provo Missionary Training Center Tour” (8:42; YouTube). E mafai foi ona e faaali atu le “Faifeautalai Talavou o le Auaunaga a le Ekalesia: Auauna Atu i le Alii” (3:40; ChurchofJesusChrist.org) e fesoasoani ai i tagata o le vasega e aoao e uiga i avanoa faafaifeautalai mo auaunaga.
-
Valaaulia tagata auai e faitau le “Gaoioiga Masani i Aso Taitasi” (2.4.1) ma le “Faataitaiga o Taimi Faatulagaina o Aso Taitasi” (2.4.2) i le Tulaga Faatonuina Faafaifeautalai mo So’o o Iesu Keriso. E mafai ona latou maua lenei punaoa i le Potutusi o le Talalelei (Potutusi > Tusitaulima ma Valaauga > Valaauga o Misiona > Tulaga Faatonuina o Faifeautalai mo Soo o Iesu Keriso).
A uma ona latou faamae’aina le gaoioiga po o gaoioiga na e filifilia, tuu atu i tagata o le vasega se avanoa e talanoaina ai mea na latou aoaoina. E mafai ona e faia ni fesili e pei o nei:
-
E faapefea ona faamanuiaina oe e le Alii a o e taumafai e avea ma se faifeautalai?
Faataitai
Taitai o talanoaga: O se tasi o auala e mafai ona e fesoasoani ai i tagata aoao ia “avea ma se faifeautalai” ae latou te le’i auauna atu i se misiona o le tuuina atu lea ia i latou o avanoa e faataitai ai le aoao atu o isi. Mafaufau e fai atu i tagata o le vasega e sue le lesona 1, 2, po o le 3 i le mataupu e 3 o le Tala’i La’u Talalelei. Valaaulia i latou e suesue e uiga i ai ma saunia e aoao atu se tasi o autu mai le vaega o le “Faavae o Aoaoga Faavae” o le lesona. (Tagai i le lesona 6: “Faataitai le Aoao Atu” i anomea nei o le vasega mo ni manatu e uiga i le auala e mafai ona e faatulagaina ai lenei aafiaga.)
A uma ua lava se taimi e saunia ai tagata aoao, valaaulia i latou e faataitai le aoao atu o se isi tagata i le vasega.
Faatu se sini.
Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:
Faatu se sini e faatatau i mea ua e suesueina. Faaaoga manatu e pei o nei, pe mafaufau foi i ou lava manatu.
-
Tusi i lalo mea o le a e faia e “avea ai ma se faifeautalai” e sili atu le atoatoa ae e te le’i auauna atu i se misiona.
-
Vaai pe o i ai se avanoa mo oe e auai ai i se taimi faatulagaina o se lesona po o isi gaoioiga talai faatasi ma faifeautalai misiona i le lotoifale.
-
Talanoa i tagata e te iloa o e na auauna atu i se misiona. Fai atu ia i latou ni fesili e uiga i le galuega faafaifeautalai.
O La’u sini
-
O le a ou … (faatinoga o le a e faia).
-
O le a ou ausia la’u sini e ala i le … (o se fuafuaga faigofie).
Taitai o talanoaga: Afai e i ai se vaega o tupulaga a tagata aoao e faasoa atu a latou sini i le vasega atoa, tuu atu ia i latou se taimi e faasoa mai ai pe faapefea ona latou lagolagoina pe faamanatu atu e le tasi i le isi a o le’i amataina le isi vasega.
Filifiliga I: E mafai faapefea ona ou saunia faaleagaga a’u lava i le taimi nei mo le galuega faafaifeautalai?
Suesue
Taitai o talanoaga: Faitau ma talanoa i le saunoaga lenei mai ia Peresitene M. Russell Ballard: E mafai foi ona outou matamata i le vitio “Stay within the Lines” (5:10; ChurchofJesusChrist.org) o se vaega o lenei talanoaga.
O le mea ua matou manaomia nei o le tupulaga aupito sili o talavou matutua i le talafaasolopito o le Ekalesia. Ua tatou manaomia faifeautalai agavaa, atamamai, ma malolosi faaleagaga. … Matou te le manaomia outou e faatumu se tofiga; matou te manaomia lou loto ma lou agaga atoa. Matou te manaomia ni faifeautalai malolosi, mafaufau lelei, ma naunautai o i latou e iloa ona faalogo ma usitai i musumusuga a le Agaga Paia. … I le avea ai o a’u ma se Aposetolo a le Alii o Iesu Keriso, ou te valaau atu ia te outou ina ia amata i le taimi nei lava … ina ia matuai agavaa atoatoa. (“O Le Tupulaga Aupito Sili o Faifeautalai,” Ensign, Nov. 2002, 47)
-
O le a se mea na tumatila ia te oe mai lenei faamatalaga?
-
Aisea e te manatu ai e taua sauniuniga faaleagaga ma le agavaa i le galuega faafaifeautalai?
Taitai o talanoaga: I le avea ai o se vaega o la outou talanoaga, e mafai ona outou suesue faatasi le Mataupu Faavae ma Feagaiga 11:21 ma le Alema 17:2–3. E mafai foi e tagata auai ona saili mo ni faataitaiga o le auala na saunia ai e le Faaola o Ia lava faaleagaga mo Lana galuega (tagai, mo se faataitaiga, Mataio 4:2; Mareko 1:35; ma le Ioane 8:28).
-
O a nisi o auala patino e mafai ona e saunia ai faaleagaga i le taimi nei mo le galuega faafaifeautalai?
Taitai o talanoaga: Valaaulia tagata aoao e fai se lisi taitoatasi o tali i le fesili na muamua atu. E mafai ona latou faasoa atu se aitema se tasi pe lua i la latou lisi i se paga. Faamalamalama i tamaiti aoga e le tatau ona latou faasoa mai ni aafiaga e patino tele.
Faataitai
Taitai o talanoaga: Faamalamalama atu a o le’i faia la latou galuega faafaifeautalai, e faatalanoaina faifeautalai faaolioli e lo latou epikopo ma le peresitene o le siteki e iloa ai lo latou agavaa ma le saunia e auauna atu.
Valaaulia tagata o le vasega e sue fesili o le faatalanoaga mo le galuega faafaifeautalai i le tusiga “Fesili mo Faatalanoaga” (Liahona, Aok. 2018, 53–54). E mafai foi ona e saunia nei fesili e fai ma pepa e tufa atu. Mafaufau e faaali atu faatonuga nei:
Faaalu se taimi e faitau filemu ai fesili [taitasi] o faatalanoaga mo le galuega faafaifeautalai. A uma ona e faitauina fesili, fuafua po o le a sou lagona o loo lelei lau mea o fai, faatasi ai ma mea e te manao e faaleleia.
Taitai o talanoaga: A uma ona maua se taimi e faitau ai e tagata aoao fesili o le faatalanoaga, mafaufau e talanoaina fesili nei:
-
E mafai faapefea e le toe iloiloina ma le toe mafaufau i nei fesili o le faatalanoaga ona fesoasoani e saunia ai oe mo le galuega faafaifeautalai?
-
Aisea e taua ai le faamaoni atoatoa ia te oe lava ma ou taitai perisitua pe a taliina nei fesili?
Faatu se sini
Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:
Faatu se sini e faatatau i mea ua e suesueina. Faaaoga manatu e pei o nei, pe mafaufau foi i ou lava manatu.
-
Fuafua po o le a se mea o le a e faia ina ia saunia atili ai faaleagaga e auauna atu i se misiona.
-
Afai e te le’i mauaina lou faamanuiaga faapeteriaka, mafaufau ma le agaga tatalo po o afea e tatau ai ona e mauaina.
-
Auai soo i galuega o le malumalu ma talafaasolopito o aiga
O La’u sini
-
O le a ou … (faatinoga o le a e faia).
-
O le a ou ausia la’u sini e ala i le … (o se fuafuaga faigofie).
Taitai o talanoaga: Afai e i ai se vaega o tupulaga a tagata aoao e faasoa atu a latou sini i le vasega atoa, tuu atu ia i latou se taimi e faasoa mai ai pe faapefea ona latou lagolagoina pe faamanatu atu e le tasi i le isi a o le’i amataina le isi vasega.
Le isi taimi
Taitai o talanoaga: Afai ua e saunia e aoao atu le lesona 13 i le isi taimi, mafaufau e valaaulia tagata o le vasega e mafaufau i le alualu i luma ua latou faia talu mai le amataga o le vasega i a latou sauniuniga e auauna atu i se misiona. Atonu e te manao e auina atu ia i latou se faamanatu.