Taiala mo le Aoao Atu o le Vasega o Sauniuniga a le Faifeautalai

O mea uma i lenei kosi ua faamoemoe e fesoasoani ai i tagata aoao e faamalosia lo latou liua ia Iesu Keriso ma Lana talalelei toefuataiina. O lea liua e aumaia ai se naunauta’iga faateleina e faasoa atu le talalelei a Iesu Keriso i isi. Ina ia fatuina ni tulaga e uunaia ai le liua, o le a valaaulia tagata o le vasega e:

• Ia faatofu i latou lava i le Tala’i La’u Talalelei ina ia mafai ona latou iloa le mana ma le taua o lenei tusi lesona. O le a faailoa atu foi i latou i le Fetuunai i le Olaga Faafaifeautalai (2013).

• Aoao le faamoemoega a faifeautalai (tagai i le Tala’i La’u Talalelei, 1) ma vaai pe faapefea ona taialaina ai i latou, i o latou olaga i aso nei ma i vaega uma o le galuega faafaifeautalai.

• Fai ni tautinoga o le a fesoasoani ia i latou e ola ai i le talalelei a Iesu Keriso, saunia mo le galuega faafaifeautalai, ma faasoa atu le talalelei a le Faaola i aiga ma uo.

• Aoao ma faataitai le aoaoina atu o upumoni o loo maua i lemataupu e 3 o le Tala’i La’u Talalelei.

• Faataitai tomai e mafai ona fesoasoani ia i latou e avea ai ma faiaoga sili atu o le talalelei ma sili atu ona maufetuunai faalelagona.

O lenei tusi lesona o loo aofia ai ituaiga aafiaga e lua e aoao ai: lesona autu ma faataitaiga o tomai.

O lenei kosi e aofia ai tomai e 10 i le faaiuga o le tusi lesona. O faataitaiga o tomai ua mamanuina e fesoasoani i tagata aoao e atiina ae tomai mo le aoao atu mataalia ma le maufetuunai faalelagona.

O se lisi lenei o tomai e faataitai:

• Tomai Faataitai 1: Faailoa atu le Tusi a Mamona i Tagata

• Tomai Faataitai 2: Faaaoga Tusitusiga Paia i Lau Aoaoga

• Tomai Faataitai 3: Aoao Tagata i le Auala e Tatalo Ai

• Tomai Faataitai 4: Fai Ni Fesili Musuia

• Tomai Faataitai 5: Tauivi e Tauloto Mau

• Tomai Faataitai 6: Talanoa i Tagata Uma

• Tomai Faataitai 7: Tali Atu i Lagona o le Le Atoatoa

• Tomai Faataitai 8: Manava Faamoemoeina

• Tomai Faataitai 9: Faaaoga ma le Amiotonu Tekinolosi

• Tomai Faataitai 10: Atiina Ae Mamanu o Mafaufauga Maloloina

E mafai ona aoaoina ia tomai faataitai i le taimi o le vasega e tasi e pei o se lesona autu. O nisi lesona autu ua tuuina mai ai fautuaga o tomai faataitai talafeagai.

O faataitaiga o tomai ua mamanuina e alu ai pe tusa ma le 15 i le 20 minute, ae e mafai ona e fetuunai ina ia umi pe puupuu atu. E te le tau aoaoina tomai faataitai uma, ma e mafai ona e aoaoina i soo se faasologa. E ui e taua le faataitaiga o tomai, ae o le tele o lou taimi aoao atu i le kosi atoa e tatau ona faaaluina i lesona autu.

E ui o le toatele o tagata aoao o e auai i lenei vasega o le a sauniuni mo se misiona aoao atu, ae o nisi atonu o loo sauniuni mo se misiona o auaunaga. Atonu o nisi e leai ni fuafuaga e auauna atu i se misiona faafaifeautalai, ae ua i ai ni manaoga e aoao pe faapefea ona faasoa atu ma le mataalia le talalelei ma fesoasoani e faapotopoto Isaraelu. Ia nofouta i manaoga o tagata auai uma, ae le na o i latou o loo sauniuni mo se misiona aoao atu. Vaavaai mo avanoa e fesoasoani ai i tagata aoao uma ia iloa faamanuiaga ma le aoga o lenei kosi. Mo se faataitaiga, e mafai ona e faaaluina sina taimi i le aluga o le kosi e iloilo ai avanoa ma faamanuiaga o se misiona o auaunaga (tagai ChurchofJesusChrist.org/service-missionary mo nisi faamatalaga).

Mo faamatalaga e uiga i le auala e maua ai togi mo le faauuga o le inisitituti po o togi e mafai ona siitia atu i aoga a le Ekalesia, tagai i le InstituteCredit.ChurchofJesusChrist.org.

E mauafetuunai lenei kosi. E mafai ona faaaoga e paranesi, uarota, siteki, ma inisitituti. E mafai ona faaaoga e se vasega e na o ni nai vaiaso le umi po o se vasega e faia mo ni nai masina. E mafai foi ona fetuunai mo le faaaogaina i le aiga.

O loo faaalia i le siata lenei le auala e mafai ona faatulaga ai se piriota o se vasega e 50 minute:

O vasega e feiloai mo ni nai masina e mafai ona faaaluina le silia ma le tasi le vasega i se lesona patino.

O faataitaiga nei o loo faaalia ai auala eseese e aoao atu ai le anotusi i lenei kosi.

Faataitaiga 1: Vasega a le Siteki (20 vasega; 60 minute i le vasega)

O loo sauniuni Uso Lawal e aoao atu se kosi sauniuni faafaifeautalai mo lana siteki i Accra, Ghana. O le a feiloai lana vasega i vaiaso taitasi. Ua faia e Uso Lawal le fuafuaga lenei:

• Aoao se lesona autu i le Aso Sa muamua ma lona tolu o le masina.

• Talu ai e toatele tagata fou o le Ekalesia ma nisi e le o ni tagata o le Ekalesia i le vasega, ua filifili ai Uso Lawal e tuu se faamamafa faaopoopo i le lesona autu 6. Na te filifili e fai se gaoioiga e aoao ai mai le lesona autu 6 i le Aso Sa lona lua ma le fa o masina taitasi. O le a maua ai e lana vasega le tele o avanoa e suesue ai ma aoao atu ai le aoaoga faavae taua mai le mataupu e 3 o le Tala’i La’u Talalelei.

• Ua ia faailoa mai foi ni tomai e faataitai se fa e manao e faaaoga i lana vasega. Ua ia filifili o le a ta’i lua vaiaso ma ia faia se tomai faataitai. E tasi le tomai e taua tele mo lana vasega, o lea na ia filifili ai o le a ia faaaogaina i ni vasega eseese se lua.

Faataitaiga 2: Vasega a le Siteki (7 vasega; 60 minute i le vasega)

O loo sauniuni Uso ma Sister Green e aoao atu sauniuniga faafaifeautalai mo le la siteki i Provo, Iuta. O le a ta’i lua vaiaso ma feiloai le latou vasega.

• Ina ua uma ona fefautuaai ma lo latou peresitene o le siteki, ua latou filifili e aoao atu lesona autu 1, 3, 6, 9, ma le 12. O le a latou faaaogaina ni vasega se tolu e taulai atu ai i le lesona autu 6. O le faia o lena mea o le a maua ai e le vasega le tele o avanoa e aoao ai, malamalama, ma faataitai ai le aoaoina atu o upumoni taua mai le mataupu e 3 o le Tala’i La’u Talalelei.

• E faavae i fautuaga mai lo laua peresitene o le siteki, o le a maua ai foi e le au Green se taimi i le aluga o le kosi mo faataitaiga o tomai “Atiina Ae Mamanu o Mafaufauga Maloloina” ma le “Talanoa i Tagata Uma.”

Faataitaiga 3: Vasega o le Inisitituti (14 vasega; 90 minute i le vasega)

O loo sauniuni Sister Silva e faiaoga i se vasega sauniuni mo faifeautalai mo lana inisitituti i Manaus, Pasila. O le a feiloai lana vasega i vaiaso taitasi mo le 90 minute. Ua filifili Sister Silva e fai mea nei:

• O le a ia faaaluina le 50 minute i vaiaso muamua e 11 i lesona autu eseese. I le iloaina o nisi o tagata o lana vasega e i ai ni fesili e uiga i le Agaga Paia, sa ia filifili ai e faaalu ia le itiiti ifo ma le lua ni vasega i le lesona autu 8: “Saili ma Faalagolago i le Agaga.”

• E manao Sister Silva e fesoasoani i tagata o lana vasega e faateleina lo latou lototele e faasoa atu le talalelei i isi. Ua ia fuafua o vaiaso muamua e 11, o vasega e 6 o le a aofia ai le 30 minute e faaaoga ai le lesona autu 6 e fesoasoani ai i tagata o le vasega e aoaoina ma aoao atu le aoaoga faavae o loo i le mataupu e 3 o le Tala’i La’u Talalelei. Ua ia filifili foi e faapea, i vaiaso 12 ma le 13, o le a latou tuuto atu ai le vasega atoa i le sauniaina ma le aoaoina atu o lesona pupuu i le tasi ma le isi.

• Ua faailoa e Sister Silva ni tomai se tele o le a faamanuiaina ai tagata o lana vasega e faataitai. Na te filifili e faia na tomai i le 11 vaiaso muamua i aso e le o faatulagaina ai e aoao atu mai le mataupu e 3.

• I le aso mulimuli, ua ia fuafua e faaiu le kosi i le lesona autu 13: “Ia Agai i Luma i le Faatuatua.”

Fai se fuafuaga e fetaui mo lau vasega. A o e fuafuaina lau faatulagaga, atonu e te manao e saili ni manatu faaalia mai tagata o le vasega po o fea o autu e sili ona fiafia i ai ma fetaui ia i latou.

Manatua, o le sini autu lava o le liua ia Iesu Keriso, ae le o le aoaoina o anomea uma. Aua le soona faatulagaina au vasega. E le mafai ona faanatinati pe faamalosia le tuputupu ae faaleagaga. Ia toafimalie i mea e mafai ona e ausia i se auala anoa i lau taimi o i ai.