Lesona 11

Fesoasoani i Tagata e Osia ma Tausia Tautinoga

Tala’i La’u Talalelei, Mataupu 11

“O le fesoasoani i tagata ia liua ia Iesu Keriso o le totonugalemu lea o le faamoemoega faafaifeautalai” (Tala’i La’u Talalelei: O Se Taiala i le Faasoaina Atu o le Talalelei a Iesu Keriso [2023], 202). O se auala taua e fesoasoani ai i isi i lo latou liua o le valaaulia lea o i latou e osia ma tausia tautinoga. O le tuuina atu o valaaulia aoga e faateleina ai le avanoa o le a osia ai e tagata ma tausia tautinoga.

Iloilo ma Toe Tulitatao

Taitai o talanoaga: Valaaulia tagata aoao e mafaufau i a latou taumafaiga i le taimi nei e faaaoga mea o loo latou aoaoina i le vasega lenei. E mafai ona e valaaulia i latou e fefaasoaai ma se paga pe faatasi foi o se vasega nisi o a latou taumafaiga.

Filifiliga o Gaoioiga e Aoao Ai

Taitai o talanoaga: Filifili ma le agaga tatalo ia vaega e aoao ai e sili ona aoga mo lau vasega. Ia mautinoa e tele se taimi e tuu ai e faataitai ai ma faatatau.

Filifiliga A: E mafai faapefea ona ou fesoasoani i isi ia liua i le Alii?

Suesue

Taitai o talanoaga: Talanoaina faatasi le saunoaga lea mai ia Elder David A. Bednar:

O loo aoao mai pea lava pea e auauna faamaonia a le Alii se tasi o faamoemoega autu o le tatou i ai i lenei olaga faaletino o le suia faaleagaga lea ma liua e ala i le Togiola a Iesu Keriso. (“E Ao Ina Toe Fanau Mai Outou,” Ensign po o le Liahona, Me 2007, 19–20)

Aisea e te manatu ai o le suia faaleagaga, po o le liua, o se tasi lea o faamoemoega autu o o tatou taimi i le lalolagi?

Taitai o talanoaga: Mafaufau e faaali fuaiupu nei e le’i mae’a o ni ulutala i luga o le laupapa:

O le liua i le Alii o lona uiga …

E mafai ona tatou liua ia Iesu Keriso e ala i le …

Valaaulia tagata o le vasega e mafaufau pe faasoa mai pe faapefea ona latou faamae’aina nei fuaiupu e lua. Faamalamalama atu o lenei gaoioiga e aoao ai e mafai ona fesoasoani ia i latou ia malamalama lelei ai po o le a le liua ma le auala tatou te liua ai. Faaali atu faatonuga nei:

Faamae’a gaoioiga suesue nei Faailoga mea ua e aoaoina e uiga i le (1) le uiga o le liua i le Alii ma le (2) auala e tupu ai le liua.

Faitau le vaega ua faaulutalaina “Salamo, Tautinoga, ma le Liuaina” i le mataupu e 11 o le Tala’i La’u Talalelei (itulau 201–2).
Suesue ia le itiiti ifo ma le lua ni fuaitau o mau nei: Ioane 3:3–5; Mosaea 5:2; Mosaea 27:25–26; Alema 5:12–14.

Taitai o talanoaga: A uma ua lava se taimi e aoao ai, valaaulia tagata o le vasega e faasoa mai mea na latou aoaoina. E mafai ona e valaaulia tagata aoao e tusi a latou tali i lalo o le ulutala talafeagai i luga o le laupapa.

E mafai foi ona outou talanoaina faatasi fesili nei:

E faapefea ona fesootai le salamo, tautinoga, ma feagaiga i le liuaina?
Aisea e te manatu ai e na o Iesu Keriso ma Lana Togiola e mafai ai ona liuaina?
O le a se mea ua fesoasoani ia te oe e faaloloto ai lou lava liuaina ia Iesu Keriso?

Faataitai

Taitai o talanoaga: O le gaoioiga lenei e mafai ona fesoasoani i tagata aoao e faataitai ai le faamalamalamaina o upumoni sa latou suesueina i le gaoioiga e aoao ai na muamua atu. Faaali atu faatonuga nei ma tuu atu i tagata o le vasega se taimi e tali mai ai. E mafai ona e atofa i tagata aoao po o paga se vaaiga patino e galulue ai ma fai atu ia i latou e aoao atu isi o e na tofia e galulue i vaaiga eseese.

Filifili se tasi o vaaiga nei. Saunia se tali mo le tagata o loo i le vaaiga e ala i le taliina o fesili o loo i lalo.

E le’i auai lava Christina i se ekalesia. Sa ia lagonaina talu ai nei se manao e latalata atili atu i le Atua. Sa tau mafaufau o ia po o fea e tatau ona ia amata ai.
Na aoaoina Isaako e faifeautalai. I se tasi o lesona, sa aoao atu ai e faifeautalai ia Isaako e faapea o le salamo e aofia ai le liliu atu i le Atua ma aluese mai a tatou agasala. Sa tali atu Isaako i le faapea mai, “Ou te le mautinoa pe mafai ona ou faia lena mea. Ona pau lava o a’u ia.”
Ua matauina e Jasmine isi o e foliga mai e faigofie atu ona tausia poloaiga ma e malolosi atu molimau nai lo ia. E lagona e ia le lotovaivai pe a faatusatusa o ia lava i isi tagata.

O le a se mea e mafai ona e faasoa mai tusitusiga paia po o le Tala’i La’u Talalelei e mafai ona fesoasoani?
O a ni mea e mafai ona e aoao atu e uiga i le Tama Faalelagi ma Iesu Keriso?
O le a se valaaulia e mafai ona e tuuina atu?

Taitai o talanoaga: A uma ua lava se taimi, valaaulia tagata aoao e faasoa mai a latou tali i se paga po o se vaega toalaiti.

Faatu se sini

Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:

Faatu se sini e faatatau i mea ua e suesueina. Faaaoga manatu e pei o nei, pe mafaufau foi i ou lava manatu.

Tusi i lalo lau tala patino, ma faifai pea o le liua. Ia aofia ai auala patino ua uunaia ai e le Atua suiga i lou olaga.
Fesili i se uo po o se tagata o le aiga e uiga i le faagasologa o lo latou liua ia Iesu Keriso.
Tusi ni auala se tolu e mafai ona e sailia ai le fesoasoani a Iesu Keriso e faamalosia ai lou liua patino.

O La’u sini

O le a ou … (faatinoga o le a e faia).
O le a ou ausia la’u sini e ala i le … (o se fuafuaga faigofie).

Taitai o talanoaga: Afai e i ai se vaega o tupulaga a tagata aoao e faasoa atu a latou sini i le vasega atoa, tuu atu ia i latou se taimi e faasoa mai ai pe faapefea ona latou lagolagoina pe faamanatu atu e le tasi i le isi a o le’i amataina le isi vasega.

Filifiliga E: E mafai faapefea e valaaulia aoga ona fesoasoani i tagata e o mai ia Iesu Keriso?

Suesue

Taitai o talanoaga: Faaali atu fesili nei ma valaaulia tagata aoao e talanoaina ma se paga. E mafai ona e amata i le faasoa atu o se faataitaiga mai i lou lava olaga.

O le a se valaaulia na e mauaina ma faatinoina ua fesoasoani ia te oe e te latalata atili atu ai ia Iesu Keriso?
E faapefea ona ese mea uma mo oe pe ana le tuuina atu ia te oe lenei valaaulia?

Taitai o talanoaga: Ina ia fesoasoani i tagata aoao e amata ona suesue e uiga i valaaulia aoga, mafaufau e faasoa atu faatonuga o loo lisiina i lalo. E mafai ona e vaevaea le vasega i ni paga ma tofi atu i paga taitasi se tasi o filifiliga e suesue ai. E mafai foi ona e valaaulia tagata aoao taitasi e faitau se mau se tasi pe sili atu o loo maua i le pusa “Suesueina o Tusitusiga Paia” i le itulau e 203, i lalo o le “Mataupu Faavae mo le Tuuina Atu o Valaaulia.”

Aoao e uiga i le tuuina atu o valaaulia e ala i le suesueina o mea nei i le mataupu e 11 o le Tala’i La’u Talalelei:

O parakalafa e lua ma faailoga pulu i lalo o le ulutala “Tuuina atu ia Valaaulia” (itulau 202)
“Mataupu Faavae mo le Tuuina Atu o Valaaulia” (itulau 203)

Taitai o talanoaga: A mae’a ona latou suesue, valaaulia tagata o le vasega e aotele mea na latou aoaoina faatasi ma a latou paga. Ona mafaufau lea e talanoaina o se vasega fesili nei:

O le a se mea na e aoaoina e uiga i le taua o le tuuina atu o valaaulia a o tatou faasoa atu le talalelei a Iesu Keriso?
O a ni faataitaiga o valaaulia e mafai ona tatou tuuina atu e fesoasoani ai i isi ia o mai ia Keriso?

Taitai o talanoaga: I le avea ai o se vaega o lau talanoaga, e mafai ona e faaali atu le “Valaauliaina o Isi e ‘O Mai ma Vaai’” (1:17) po o le “Valaauliaina o Isi e ‘O Mai ma Fesoasoani’” (1:03). O loo maua vitio uma e lua i luga o le ChurchofJesusChrist.org.

E mafai foi ona e faasoa atu le saunoaga lenei a Elder Gary E. Stevenson:

E faitau fia selau valaaulia e mafai ona tatou tuuina atu i isi. E mafai ona tatou valaaulia isi e “o mai ma vaai” i se sauniga faamanatuga, se gaoioiga a le uarota, se vitio i luga o le initoneti e faamatala ai le talalelei a Iesu Keriso. O le “O mai ma vaai” e mafai ona avea o se valaaulia e faitau le Tusi a Mamona pe asiasi i se malumalu fou i le taimi o maimoaga a o lei faapaiaina. (“Alofa, Faasoa Atu, Valaaulia,” Liahona, Me 2022, 86)

Faataitai

Tuuina Atu ia Valaaulia

O mataupu faavae nei e mafai ona fesoasoani ia te oe e tuuina atu ai valaaulia aoga:

Ia agalelei, patino, ma manino. Faaupu lau valaaulia i le tulaga o se fesili “e te fia po o le a e”. Mo ni faataitaiga, tagai i le “Valaaulia ma le Agalelei ma se Gagana Manino” i le mataupu e 11 o le Tala’i La’u Talalelei (itulau 203).

Molimau atu i faamanuiaga. Faasoa atu lau molimau o le a faamanuiaina e le Atua i latou o e mulimuli i le valaaulia o loo e tuuina atu. E mafai ona e faamatala atu pe na faapefea ona faamanuiaina oe lava ia. Mo nisi faamatalaga, tagai i le “Folafola atu Faamanuiaga i Tagata” ma le “Faasoa Atu Lau Molimau” i le mataupu e 11 o le Tala’i La’u Talalelei (itulau 204–5).

O se faataitaiga lenei o se valaaulia e mulimuli i taiala nei:

Na folafola mai e le Alii faamanuiaga e tele ia i latou o e usitai i le tulafono o le sefuluai. Sa Ia faamanuiaina au lava ia ma lo’u aiga a o matou usitai i lenei tulafono. Ou te folafola atu o le a faamanuiaina oe e le Atua a o e faatinoina le faatuatua ia Iesu Keriso ma totogi le sefuluai. Pe o le a e ola ai la i le tulafono o le sefuluai pe a e papatiso?

Faaaoga laasaga nei e fesoasoani ai ia te oe e faataitai le fatuina ma le tuuina atu o se valaaulia.

Fuafua po o le a se mea e mafai ona e faia e valaaulia ai se tasi e latalata atili atu ia Iesu Keriso. Atonu o se tagata e te iloa po o se tasi e te mafaufau e aoao atu o se faifeautalai.
O faataitaiga o faatinoga e mafai ona latou faia e aofia ai le feiloai ma faifeautalai, faitauina i aso taitasi mai le Tusi a Mamona, auai faatasi ma oe i le lotu, po o le tatalo i le Tama Faalelagi. Mo nisi faataitaiga, tagai i le “Valaaulia e Mafai Ona E Tuuina Atu” i lesona 1–3 o le mataupu e 3 o le Tala’i La’u Talalelei (itulau 32–33, 49, 64).
Faamaumau mea o le a e fai atu e tuuina atu ai le valaaulia. Manatua ia agalelei, patino, ma manino i lau auala. Ia mautinoa e faaaofia ai lau molimau e uiga i faamanuiaga e mafai ona tatou maua a o tatou ola i lenei mataupu faavae.

Taitai o talanoaga: A uma ona faatumu e tagata aoao le pepa e tufa atu, tuu atu ia i latou se taimi e faataitai ai le tuuina atu o a latou valaaulia faatasi ma se paga. Atonu e te manao e faataitai lenei mea a o le’i faataitai e tagata o le vasega na o i latou. Afai e lava le taimi, e mafai ona e valaaulia tagata aoao e faataitai faatasi ma ni tagata se toatele o le vasega.

Faatu se sini

Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:

Faatu se sini e faatatau i mea ua e suesueina. Faaaoga manatu e pei o nei, pe mafaufau foi i ou lava manatu.

Faataitai le tuuina atu o lau valaaulia i se tagata o le aiga po o se uo i fafo atu o le vasega.
Suesue i le vaega “Faasoaina Atu o le Talalelei” i le Potutusi o le Talalelei ma vaavaai mo faataitaiga o valaaulia e mafai ona e tuuina atu i aiga po o uo. Faatino mea e te lagona le musuia e fai.
Valaaulia se uo e te lua o mai i le lotu po o se gaoioiga a le lotu. Faaaoga taiala na e faataitaia a o e valaauliaina i latou.

O La’u sini

O le a ou … (faatinoga o le a e faia).
O le a ou ausia la’u sini e ala i le … (o se fuafuaga faigofie).

Le isi taimi

Taitai o talanoaga: Afai ua e saunia e suesue le lesona 12 i le isi vasega, mafaufau e valaaulia tagata aoao e saunia e ala i le vaavaai atu i le Fetuunai i le Olaga Faafaifeautalai (2013). E mafai ona e auina atu ia i latou se sootaga i lenei punaoa pe faaali atu foi ia i latou le auala e maua ai i le Potutusi o le Talalelei (Potutusi > Tusitaulima ma Valaauga > Valaauga o Misiona > Fetuunai i le Olaga Faafaifeautalai).