Lesona 10

Saili Uiga Faa-Keriso

Tala’i La’u Talalelei, Mataupu 6

“O se tasi o auala taua e saili ai Iesu o le faia lea o se taumafaiga filiga e aoao e uiga ia te Ia ma avea atili e faapei o Ia” (Tala’i La’u Talalelei: O Se Taiala i le Faasoaina Atu o le Talalelei a Iesu Keriso [2023], 124). O le saili e atiina ae uiga o Iesu Keriso e mafai ona fesoasoani ia i tatou e faasoa atu ai le talalelei a le Faaola i se tulaga sili atu ona aoga. Faatasi ai ma le fesoasoani a le Faaola, e mafai ona faasolosolo malie ona tatou atiina ae uiga e fesoasoani ia i tatou e avea atili ai e faapei o Ia.

Iloilo ma Toe Tulitatao

Taitai o talanoaga: Valaaulia tagata aoao e mafaufau i a latou taumafaiga i le taimi nei e faaaoga mea o loo latou aoaoina i le vasega lenei. E mafai ona e valaaulia i latou e fefaasoaai ma se paga pe faatasi o se vasega nisi o a latou taumafaiga.

Gaoioiga Fautuaina e Aoao Ai

E mafai faapefea ona ou avea atili e pei o le Faaola?

Suesue

Taitai o talanoaga: Faaali atu ata o le Faaola, e pei o nei. Valaaulia tagata aoao e faasoa mai uiga faaKeriso latou te vaaia i nei ata. E mafai foi ona outou matamata i “Uiga FaaKeriso” (2:53, ChurchofJesusChrist.org) e fesoasoani ai i tagata o le vasega ia iloa isi faataitaiga o uiga o le Faaola.

O a nisi o uiga o le Faaola e sili ona e faamemelo i ai? Aisea?

Taitai o talanoaga: Faamalamalama atu faapea i lenei lesona, o le a maua ai e tagata o le vasega se avanoa e aoao ai e uiga i le taua o le sailia o uiga faaKeriso i le galuega faafaifeautalai. Valaaulia i latou e saili le taitaiga mai le Agaga Paia ia iloa po o a uiga e finagalo le Alii latou te taumafai e atiina ae i o latou lava olaga. Faasoa faatonuga nei:

Faitau le “Faatomuaga” ma le “Saili lenei Iesu” i le mataupu e 6 o le Tala’i La’u Talalelei (itulau 123–24). Faailoga faamanuiaga e fesootai ma le atiina ae o uiga faaKeriso.

Taitai o talanoaga: Atonu foi e te mafaufau e suesue faatasi le Mataupu Faavae ma Feagaiga 4 e pei ona faamatalaina i le pusa “Suesuega Faaletagata Lava Ia” (Tala’i La’u Talalelei, 123).

Valaaulia tagata o le vasega e talanoaina mea na tulaga ese ia i latou mai mea na latou suesueina. E mafai ona faaaoga fesili nei i lenei talanoaga:

E mafai faapefea e le taumafai ia avea atili e faapei o Iesu Keriso ona fesoasoani ia te oe e avea ai ma se faifeautalai sili atu ona lelei?
O le a le matafaioi ua faia e le Faaola e fesoasoani ai ia te oe ia avea atili e pei o la?

Taitai o talanoaga: A o outou talanoaina le fesili na muamua atu, mafaufau e valaaulia tagata aoao e faitau vaega “O Meaalofa mai le Atua” ma le “O Se Faagasologa Faifai Malie” (Tala’i La’u Talalelei, 124). Valaaulia i latou e sue upu po o fasifuaitau mai nei vaega e mafai ona fesoasoani ia i latou ia malamalama lelei ai i lo latou manaomia ona faalagolago i le Faaola i le atiina ae o uiga faaKeriso.

O le a se mea na fesoasoani ia te oe e alualu ai i luma i le avea atili e faapei o le Faaola?

Faataitai

Taitai o talanoaga: O le vaega lenei o le lesona ua faamoemoe e fesoasoani ai i tagata aoao e fuafua po o fea o uiga o le Faaola latou te mananao e atiina ae. Faaali atu faatonuga nei.

Faamae’a le “Gaoioiga o Uiga” i le faaiuga o le mataupu e 6 o le Tala’i La’u Talalelei (itulau 136–38).
E faavae i au tali, filifili se uiga faaKeriso e te manao e malamalama lelei ai ma atiina ae.
Saili ma suesue le vaega e uiga i uiga ua e filifilia i le mataupu e 6 o le Tala’i La’u Talalelei.

Taitai o talanoaga: A uma ua lava se taimi, valaaulia tagata o le vasega e faasoa atu i se paga po o le fea uiga na latou filifili e suesue i ai, faatasi ai ma se aotelega puupuu o mea na latou aoaoina.

Faatu se sini

Taitai o talanoaga: Tuu atu i tagata o le vasega se taimi e mafaufau ai i mea ua latou aoaoina ma faatulaga ni sini. E mafai ona e faaali atu le vaega lenei e fesoasoani ia i latou:

Fatu se fuafuaga mo le auala o le a e saili ai e atiina ae le uiga faaKeriso na e suesueina. E mafai ona e faaaogaina fautuaga o loo i lalo o le ulutala “O Se Mamanu mo le Avea Atili e Faapei o Keriso” (Tala’i La’u Talalelei, 134) e fesoasoani ai ia te oe. Aua le popole pe afai e te le atoatoa i lenei uiga. Ia taumafai pea ma o le a fesoasoani le Faaola ia te oe.

O La’u sini

O le a ou … (faatinoga o le a e faia).
O le a ou ausia la’u sini e ala i le … (o se fuafuaga faigofie).

Taitai o talanoaga: Afai e i ai se vaega o tupulaga a tagata aoao e faasoa atu a latou tautinoga i le vasega atoa, tuu atu ia i latou se taimi e faasoa mai ai pe faapefea ona latou lagolagoina pe faamanatu atu e le tasi i le isi a o lei amataina le isi vasega.

Le isi taimi

Taitai o talanoaga: Afai ua e saunia e aoao atu le lesona 11 i le vasega e sosoo ai, mafaufau e valaaulia tagata o le vasega e suesue le mataupu e 11 o le Tala’i La’u Talalelei e sauniuni ai. Atonu e te manao e auina atu ia i latou se faamanatu.